Woy Wali Iram lo ku teguop inim go mea semu ¹ Hai, Yakob go tang, Ki Wali Iram go nebut ngge se tup, nemotnang sui Israel so pu go, nggano, Yehuda lo tui go tang, Woy Wali Iram go sui no tanat go nggano, Israel go Ki Wali Iram no yang go – no, seni so dabui lo kua ne – ² no, nemotnang go sui yakena teguop go sui no pu go nggano, nemotnang Israel go Ki Wali Iram no tamlak go, Nemot go sui, Woy Wali Iram, Ki Wali Kumam; ³ Woy Wali Iram lo pu go: "Ku nayum gono lemoy go tasam-tasam, ngga, banim sik so Genam lo mo pen-ngu, ngga, Genam lo mo pen-nangu, nggano, mo pepenklong. Nggano, ngganemot nggeasui, lemoy so Genam lo gabe lemoy klong, naklay ngga, dia no gabe lelemoy-sing. ⁴ Yang Genam mo senong, mot ngga tenguo go, wengkabui demu eygo, demu kalik sogo, ⁵ ngga tang so, mot nogo banim sik so Genam lo mo pen; nemot go seni, nggesui maning kua lemoy gono, mo pen-angu. Ngga, mot no Genam lo mo pen, mot lo ya kua pu genang so: ngga, genam go ida lo lemoy go wa, genam go duosana-sanan di sik so at lo semu go ngga lo plenta go wa. Woy Wali Iram pu go Israel suey goso mea lemoy ⁶ Ngga naklay, motnang mo tup nggano mo ikum; monang tang sogo yakua yang ne? tasam-tasam demening go lemoy go, nggeasui sik so motnang nogo so gabe pepen, nggano, tasam-tasam ngga ba no kok go, motnang maning kua senong go ngga, gabe tetaling. ⁷ Nggesui tasam ngga gabe lemoy, banim sik sogo kua, maning go nogo, motnang nggenemot maning kua tup, mot lo yakua pu genang: yang genam ngga mo senong lo! ⁸ Ngganemot mot kua tup, maning kua senong dali, nggano, kama maning kua tenui, banim sik sogo; No, banim so Genam lo ngga mo senong, mot lo genam sono tasam paysing so mo semu, kua seni so mot go mo pluok, nggano, sedue kabung lo mot so pu go: sani ba sik so, plesagui-a sesemu go duo. ⁹ Dabui piam, dabui ba lo nam lo gabe gut-tugun nggano, Genam go sui iway tang sogo so, motnang nogo Genam lo gabe klum sang, ngganemot nogo, motnang tang ey Genam lo kua buin gabe. ¹⁰ Seni so, motnang Genam lo mo teguop-sing, no, peraknang kalik so kua, no, motnang kesengsaraan koy lo Genam lo mo teguop-sing. ¹¹ Genam lo ngga mea semu, Genam tang sogo so, yang Genam tang go tang sogo so Genam lo ngga mea semu. Nago so mo, Genam go sui ya waluk-sing? Genam go blong ngge, meno-meno nogo, yakua iti gabe!" Israel Woy Wali Iram lo mo susuoy ¹² "Genam sono tup-a, hai Yakob, nggano, mot Israel Genam lo mo usi go! Genam kerlam go ngge, banim dega go Genam ngge gabe, yansi go nogo. Genam dali gabe! ¹³ Kukunan kutrui, Genam go ta ngge dali lo kong go, nggano, ut Genam go tasemla idi lo gebe glung. nemotnang go sui, Genam lo temuit-sing gono, naklay-naklay ngga gemang lemoy-sing. ¹⁴ Yaluim-sing gono, motnang se tup! Nemotnang sik sogo, ngge naklay nando lo mo pen? Woy Wali Iram lo nemot klum go, Woy Wali Iram go duduing, Babel nogo sogo mea pluok-sing, nggano, Woy Wali Iram go ta don eygo lo, sedue Kasdim sono go mea taling. ¹⁵ Ngganemot, Genam, At tang golo pen go, nggano, nemot mo usi dali, nemot Genam lo uwawi go uweng go, naklay-naklay nemot lo usey go, seni ey mea lemoy. ¹⁶ Dagu sono, Genam mit no weng-a, nggano ngge se tup: Banim sik sogo, maykok sogo Genam lo kua pepen, nggano, tasam-tasam ngga lemoy go nogo, ngga so Genam gemang." Nggano, nggeasui go, Woy Wali Iram, Ki Wali Iram lo Nemot go Ki Wali Waglo go don lo genam mot-dak go gabe. ¹⁷ Woy Wali Iram-a, mot go Susuoy Iram, Teguop Iram, Israel go Ki Wali Iram lo ngge kalik so gabe pen: "Genam ngge, Woy Wali Iram, mot go Ki Wali Iram, seni eygo-a mot no Genam lo ngunguok go, mot koklong go tap nogo, At lo wawi go gemang koklong. ¹⁸ Genam logo demutrui no, suey so mot lo iikum go, mot go yakay yelung, butuo bu kalik so mea koklong, pang sogo yakua. Nggano, mot go dabui yakay, tandali-tendali biap alui kalik so, mea uweng tong-yakua tong. ¹⁹ Mot lo tui go duo, kaseglok kalik so mot go duo duomdat-yap uttop (kersik) kalik so miam dega ey; nemotnang go sui yakua suep-sing, kua go Genam go suongku sik sogo yakua nega-sing." ²⁰ Babel sik so pung go, Kasdim sik sogo nase kap! Sek iti gono se pepen, nggano, tasam ngge se penklong! Ngga nase pepen klong, e… nan seding no-sding no se pung! Se pen: "Yakob, Woy Wali Iram lo mo kuoy, nemot go tamot so!" ²¹ Nemotnang bunuo kua tra goso, nemotnang kaseglok pay lo Nemot lo wawi go koklong go nogo. Demu medium ba sik so, bu Nemot lo mo pung, nemotnang nogo so. Demu medium nemot lo tegek go, bu kekay so gemang pung. ²² "Sedue piam go nogo, dabui yakay mo kua, ngga, Woy Wali Iram lo pu go.