(Saula-saula ey Edom eygo nogo kisebu) ¹ Saula-saula ngge sono weng-lak go se tup-lak! Nggano, motnang saula-saula tang-tang se ikum! Kukunan ey nemot go seni naklay ey tup-a, kukunan ey nemot ba sogo naklay eygo se tup. ² Yang, saula-saula nogo Woy Wali Iram go dabui sadui babu dega, nggano, saula-saula go plesedue nogo, Nemot go dabuipiam kangok dega, nemotnang ngga, naklay kua genang sogo so, Nemot lo mo pu gemang. Nggano, but go kebong-sing genang sogo so, nemotnang ngga dali mo ta-sing. ³ Nemotnang go, sedue kabung mo tuk-sing go, dia sono mea ikak go tega-sing, nemotnang go temoy tega go sik sogo, nemon kangok go tingin go mea klak, meduim-meduim blo logo, butuo bu kalik so nemotnang go kin mea ngengang. ⁴ Yang, ut blo logo ple sedue daley naklay mea muep seni. Nggano, ut tang go, samnang kalik mea rlok, nemotnang go plesedue naklay mea leguot-sing. Anggul dop net go kalik mea tuot go net, Di ara dop teglik go kalik, mea teglik-sing. ⁵ Yang, Genam go tengang klewang ut ba sogo, dabui piam go mo teteglok gabe. Se ikum, nemot logo Edom ey mea neybong. Edom ngga, yam so tuk genang sogo so Genam lo mo pu go saula tang gemang. ⁶ Seni so, Woy Wali Iram go kleweng klaya, kin lo sebut go gemang, nggano, benay lo mo sebut dali. Yangga, domba nok ey kambing kemsi eygo kin, nggano, domba kemsi go kin ey benay ey golo sebut go. Yang, Bozra no Woy Wali Iram lo ibot-sing go menay ngga. Nggano, kekay so miam dega ey nan Edom no ibot-sing go. ⁷ Bentang-benteng truik go kerlam so pui go kebong, sapi kemsi nok ey, sapi kemso don eygo ey, kerlam so mea pui-sing, nemot go nan naklay kin lo mea say-sing. Nggano, nemot go benay lo nemotnang go nan ngga mea say-tram-sing. ⁸ Ngga, Woy Wali Iram go way nang sogo ku gemang. Nggano, Sion go sogo-sogo nguok genang sogo ku gemang. ⁹ Edom sogo butap-butap, iwot go aspal butuo so way so mea lemoy. Ngga ey, nemot go nan naklay belerang so mea lemoy; Nan ngga, aspal koy blon go dedsing go kalik so mea gigit. ¹⁰ Kuklik-kublong, nan ngga go koy sut genang sogo yakua. Nemot go ndop keklak go, senang so mea gigit. Nan ngganemot, duo no-duo no naklay kurluk-sing go mea gigit. Sip ngga logo, sedue kabung yakua klong weng, senang so ngga kalik so mea. ¹¹ Nebo isuali lo ngga nogo mea susuing, wadiwi ey sawap ey walam eygo-a ngga ba lo mea pling go uwet-lak. Ngganemot, bluot-bluot so, ulue so Woy Wali Iram lo mea lemoy, Nemot go atuia duduing kalik seni, mea lemoy. ¹² Ngga ba nogo kudidemat lo mea susuing-lak, nggano, nemotnang go wengkabui-wengkabui mea nega-sing; ngga nogo, deguena so itak go susuing go kua. Nemot go wengkabui naklay yam so mo nega-sing. ¹³ Nemot go yeung nogo, wong didring-a mea pung-sing, tema temoy logo, putrimalu ey tegan diding eygo-a mea pung. Ngganemot nogo, duen uduo go sip so mea lemoy. Nggano, isuali go rlam sip so mea lemoy. ¹⁴ Ngga nogo, uduong menay ey, duen uduo eygo tegu go sip so mea lemoy. Nggano, kudidemat lo nemot go andua ey tegu genang sip so mea lemoy; wadi-wadi go dabuilap-a ngga sogo gemang. Nemotnang go dia suing genang sip so, gemang lemoy. ¹⁵ Ngga nogo, lema samkali ut klik go si gemang tui-sing, si blo lo srek go e… si mea wang-sing; wi dendang seguong-a ngga nogo gemang yaluim, Nemotgo-nemot go unen ey kamsi ey banom-banom. ¹⁶ Woy Wali Iram go sam ba no wet go se ikum; Menay ngga naklay sik sogo, klayanang go meakua itak. Nggano, meno logo meno sik sogo yakua nega gemang. Ngga kalik so, Woy Wali Iram go lom ba sik so pung go nebut gabe! Nggano, nemotnang Ki Wali Waglo tang golo mo yaluim-sing gemang. ¹⁷ Nemot tang go, undi mo betep, nggano, nan ngganemot tegan yamtui lo mo wasey-sing. Nemotnang lo mea susuing, e... senang so mea susuing. Duo no-duo no ngga seguong so mea susuing-lak.