(Woy Wali Iram lo tebok go Mesir lo kua) ¹ Motseglaplu plesagui eygo denok-tiat, Woy Wali Iram go nebut ngge kalik gabe: “Genam sik so kua go nebut atuia, kunala ba lo nando lo semu go, takeduik-takeduik ba no degut go, Genam go Waglo lo kua mot-dak go pen go, nggano, nemotnang go konkebamling so tetebok go, ² nan Mesir sono klong go, ngga ey, Genam lo iwat go-a kua wadong gono, Firaun go tabangmau ba no degut so klong go, nggano, nan Mesir go tabang ba no degut go. ³ No Firaun go tabang mau lo mot nogo suongsut mea taling. Nggano, Mesir go tabang mau ba no degut go logo so motnang nogo kon so mea tui-sing. ⁴ Yang, nemot-a Yerusalem go wengkabui-wengkabui Zoan so gemang go, nggano, tamot-tamot mot-ak go Hemas no mo pupung, ⁵ naklay-naklay suongsut mea tra-lak. Saula ngga logo sogo-sogo seni nemotnang nogo yakua iti go nogo. nggano, nemot logo yakua tebok, nemot go seni kua dali; no, suongsut-a taling go, nemotnang-a mea kukui-sing. ⁶ Nan Negep nogo so kiki nebut pen go. Nan meno diding ey kikidik eygo lo damoy go, duenuduo unen ey duenuduo kemsi eygo lo u kokong go sip ey, lema wit ey lema beno tabang eygo sip so, nemotnang lo nemotnang go taut, nemot go tatondi blo no king go koklong go. Nggano, nemotnang go taut drang naklay unta go besui blo no king go koklong go. Saulatang meno go senikua go nogo so, ⁷ yangga, Mesir saula lo tebok go, nemot go seni eygo yakua lemoy, nggano, nemot go seni kua. Seni so, ngga nemot go sui Genam lo ngge kalik so gabe pu: "Kebali kua go Rahap so mea lemoy." ⁸ Yang, nggeasui go, klong-a nemotnang go nemu damoy so demu no, nggano, sam klaya go ba no se klik. Ngga, nebut pepen genang so lemoy genang. Yansi go nogo, senang so gigit genang sogo so. ⁹ Yang nemotnang ngga way ey plesing eygo saulakuon, wamoy mlue eygo duo-yap, kama kua tutup go denok-tiat, Woy Wali Iram lo mea nguok go nogo; ¹⁰ Nemu so uluik go sedue no pu go: "Nemu kua uluik ey!" Nggano, nemu kalong eygo sedue-sedue nogo: "Sogo-sogo seni eygo genam nogo kua ikum. No, atnang nogo sogo-sogo tasam tom eygo-a se pen! Ikum-a, atnang nogo sogo-sogo seni kua go-a, ¹¹ tap seni eygo sik sogo paysing go, nggano tap meno-a iti ya, Israel go Ki Wali Iram, Teguop Iram go tap lo atnang nogo, ide ey kua taling." ¹² Nggatang so, ngge kalik Israel go Ki Wali Iram, Teguop Iram lo gabe pu: "Nggatang sogo so, motnang lo Ki Wali Iram go nebut gemang mo tenguo. Nggano, motang go saysuk ey kunala eygo sedue, motnang go kin so lelek go sono ne itak. Nggano, takebali piam goso pupluok go sono motnang ne tegui. ¹³ Yang seni so, ngga mot nogo piam konkebamling, demu tema togut go pui sogo kalik so mea gigit, naklay blo dega sogo kalik, dia idi sono bontuik go gigit, nemot togut go pui genang sogo, kekay so saduibong ey mea pling. ¹⁴ Tempayan periuk nemot so sesemu go sedue lo muep go kalik, klum ey yakua tra, nemot lo muep go kalik. Ngga ey naklay kesuop-sing go, kluip klaya nang go yakua ikum. Demusung ba sik so koy iti sogo kalik, kuago bak ba sik so bu gluik go kalik so mea." ¹⁵ Yang, Woy Wali Iram, Ki Wali Iram go nebut ngge kalik gabe, Teguop Kon kua go dega, Israel go Ki Wali Iram: "Tandali motnang-a teguey go, yakot so motnang-a se suing, motnang mea susuoy-sing. Yakot so suing go dabui-a iti go se keng, mot go don-a se kok." ¹⁶ No, motnang suali ey, motnang lo pu go: "Kua, atnag kuda no klak go keda so kuek so!" Yang, motnang keda so kap go mea nega. Mutnang lo pu dali go: "Kuda naklay go dega no genamnang klak so!" Yang, motnang so tutruik go-a kuda naklay dega seni so go-a mea. ¹⁷ Ya, sedue klaya duo nogo sagui semu go sedue seribu lo mea ikum, sedue taidi lo sagui semu go sik so, motnang-a mea kuek, e… di motdak go kalik so meduim blo no motnang mea itak. Nggano, amkasron meduim blo no glok-sing go kalik so mea. Sion susuoy genang sogo tegadi ¹⁸ Ngga tang so, Woy Wali Iram bubung, Nemot go ku, Nemot go klum motnang nogo taling genang sogo ku; Seni so, ngga motnang ey yatrang tui genang sogo so Nemot ip go. Yang, Woy Wali Iram ngga nemudi sogo Ki Wali Iram; Nemot so, bubung go sedue kabung naklay yakay dega ey gemang! ¹⁹ Yang, saulatang Sion ey Yerusalem eygo so susuing go! Senang so motnang u meakua kukluo. Nagono mot lo usi go, Woy Wali Iram lo motnang mea klum; Ku ngganemot no motnang nogo tup go Nemot lo mea wa go. ²⁰ Ngga, nemot-a ten ey bu ey seguay so, Woy Wali Iram lo iti go. No, motnang so nguok go saysuk, ngga ba nogo yakua kok dali. No, mot go nemu-a Nemot sono senang so mea iyalap. ²¹ Nggano, nebut ngge taton sik so pu go, mot go kama lo mea tutup: "Ngge tap seni gabe, tap ngge seguong lo keng go se koklong!" Kua senong, motnang lo nemukum go dabui lek go. ²² Mot go duosana-sanan perak lo sebut go, ngga piam so mea pu. Kuago, emas lo sebut go ngga, mot lo ngganemot ngga sono mea betep. Amka kon eygo betep go kalik so, ngga ey, mea pu nemot sono: "Pung-a! ²³ Ngga ey, Woy Wali Iram lo, wasma nok inim nogo sa iti go mea pu. Nggano, motnang go usu nogo mea kuali, nggano, nan ngga go seni sik so motnang roti tom eygo mata dega so mea dam. Ku ngganemot nogo mot go menay logo neguen pay bata dega nogo, neguen teguop-a mea dedam; ²⁴ Sapi ey keledai miam eygo nan so kebali golo, ten tom eygo-a mea dedam, yam so bajak gono suey go mo semu go nogo. ²⁵ Meduim kangok-kangok go kong so kong go sik so, nggano, nan ngga go seni sik so motnang lo ten tom eygo mata dega so mea dam, sedue kabung leguot genang ku kangok go ngganemot nogo, nagono, menara-menara yam so mo pui go nogo. ²⁶ Yang, banu neblong-a woy neblong kalik so mea pli nggano, woy neblong-a sagon-sagon so da tujuh yam so mea pli. Yangga, ku tujuh yam so woy pli go kalik, Woy Wali Iram lo Nemot go blung go kuo dok go kalik, nggano, demun suey go lo nemot go wim sre go ngga, mea pali-sing. Ki Wali Iram logo idekeba Asyur nogo ²⁷ Woy Wali Iram Nemot go saysuk weng go gemang taling, Nemot go sip ket dega sogo sik so Nemot go dabuipiam koynebleng kalik uwuk go, Nemot lo weng go, utkenuim seguo-suguo sogo, pokpok so uweng go ba lo gemang uweng, Nemot go lomsuk dabui piam lo mo saguip. Nggano, Nemot go nebleng koy kangok golo yam so kukuim go kalik; ²⁸ Nemot go, nebuem nebit ngga butuobu kangok so klak go kalik, nemot go bu, e... blindon yam no gemang pung Nemot lo uweng go, saula-saula waluk genang sogo so, ta lo mea poplong klong. Nggano, tegan uwawi genang tap kua go sono pung genang, saula-saula tang ngga go lom no mea kok. ²⁹ Nggano, usam meno motnang lo mea kluo, kunangglik tete wadi saysuk teguop genang sogo so kukluo go kalik. Nggano, usre so suling ey pepla go sedue kalik so motnang mea uwata. Woy Wali Iram, sedue Israel go Meduim sono klak genang kalik so. ³⁰ Nggano, Woy Wali Iram go nebutklum blong ey mea tup, Nemot go ta don dega eygo mea ikum, dabuipiam kangok go koy nebleng eygo lo dedam go kalik go, ey sa watui dega, nebit ey sa demu kalik go ey. ³¹ Yang, Woy Wali Iram go nebut kluim lo saduibong ey Asyur mea pling. Nemot lo, gada demun lo nemotnang but go ku nogo. ³² Yang, teguoli demun lo ngunguok go ngga, nemot go ngunguok gemang. Nemotnang blo sono, Woy Wali Iram lo bubut go gemang, rebana ey kecapi eygo ey mea kukluing klong. Nggano, Asyur ey Nemot lo ple mea tui, ta blo sono iti golo ple mea pung, Asyur mea but. ³³ Yang, koy puit genang sogo sip, banim sik so dali mo semu-sing: Ngga Iram nogo sogo sip gemang Nemot go kutrui sip bata go no, nan ba dega sono mo tuet, nemot so kuali go, koy ey di eygo lo tram go; Woy Wali Iram go nebuem nebit bulatang klak go kalik go koy lo kukuim go.