(Samaria so pen go kiki nebut) ¹ Efraim go sedue-sedue bu lo mau go betokut yakay ngga, mot seglaplu gemang, nemotnang go srem teguop betokut temoy sogo yam so mo kukuok go sogo, yangga, medium blo so gigit go kota, bupay teguop go blo so gigit go anggul bu so dedrop go sedue-sedue lo tram go, yam so mo mawo-sing go! - ² Seni so, don dega eygo sedue-a Woy Wali Iram lo mot-ak go mea weng, Sedue ngga weng genang sogo, nebitklum ey sa demunaglap eygo uweng go kalik go sedue-a. Ngga, kudalu nebit sa eygo lo iti go kalik so. Don ey kusuopklong go kalik sogo sedue-a; nemot lo nemotnang don ey ku sono mea tiglik. ³ Bu lo mawo go wengkabui-wengkabui go betokut srem ku sono masi lo mea gualing-sing. ⁴ Kota ngga go sui blo sono klak go ngga, kuok go mea nega-sing. Nemot ngga, di ara don nemot go in maning kua pung gono seni go kalik so gemang; ngga ikum go, keda so buo go gemang dam. ⁵ Woy Wali Iram don kangok dega go-a, karanggan bunga teguop goso Nemot go blung temu nogo so mea lemoy sang! Ku ngganemot nogo, Woy Wali Iram, Ki Wali Kumam-a blong teguop seni goso mea lemoy seni. ⁶ Woy Wali Iram lo, Ku ngganemot nogo, Woy Wali Iram, Ki Wali Kumam lo yakay nenem nemudi sogo mea iti, waglo nemudi sogo mea iti. Neneyboy so suing go sedue nogo nemudi sogo kunala mea iti, nggano, pahlawannang sogo waglo ple lo yakena yataput no but go klong genang sogo waglo mea iti. Yerusalem go woy-woy bu lo mawo go nogo sogo. ⁷ No, ngge sogo sedue kabung, anggul lo mo yane nggano saguer lo mu rlo. Imam-imam nggano nabi nemot dali kalik, saguer lo mo mawo, anggul lo nemotnang go kunala mo waluk; saguer lo guom-guom so mo lemoy-sing, nemu ikum sogo mo warlok-klong, nebut pu sogo nogo nemotnang mo ulue-sing. ⁸ Yang, nemotnang go meja kusyu lo mo damoy, kui lo mo piam, kon kua go sip kua. ⁹ Nggano, sedue lo pu go: "Nemot go senong ngga nando no ya nguok? Nggano, nando no kuibata masiwalong ya nguok dali? Nemot lo duing go, imot ngga duo masing sui so kekatik go, min sik so demening tong go duo? ¹⁰ Naklay-naklay tap-tap seguai go babu go plon-plon titiat, ngge kalik so se, ngga kalik so se, naklay ya nguok?” ¹¹ Yang, motnang genam nogo ya kua tup go, Amble nebut bluem meno-a Woy Wali Iram lo mot-dak go motnang nguok genang sogo so mea pluep. ¹² Nemotnang sono Woy Wali Iram lo mo pu: “Nimla genang sogo sip ngge go se, don kua go sedue kabung nogo se tebok-sing!” No, Nemot no tup genang sogo moy so sang! ¹³ Kua go, Woy Wali Iram go nebut ngge kalik sogo genam mo tup: "Ngge kalik so se, ngga kalik so se, ngge se tebok, ngga se tebok!" Ngga tang so, motnang go tapmasi koklong go, pui go nogo motnang go ta-masi yakua tega-sing, ngga ey plesi lo mlak go, kuo eygo meakua pung. ¹⁴ Ngga tang so, Woy Wali Iram lo pu go nebut se tup, hai wayang nebut so pepen go wengkabui-wengkabui, Yerusalem sogo blung ta so mlak go amble wengkabui! ¹⁵ Motnang lo ngge kalik pu go tang so: "Motnang ey kekebong ey tegadi mo dok, nggano, sikebong sip ey nebut me suing; nuey-a tegan demun lo don ey mea sesrap, atnang nogo ya kua srap; atnang lo wamoy so mo pen, atnang lo atnang mea tebok, nggano, wamoymlue ba no atnang go saysuk mo son." ¹⁶ Ngga tang sogo so, Woy Wali Iram, Ki Wali Iram go nebut ngge kalik so gabe: "Kubetui don dega eygo-a Sion no Genam lo mea tui; den dega eygo demu meno, demu teguop don dega go-a mea tui, ngga demu kubetui don dega eygo: Nando keng go dabui suali ya kua tetra! ¹⁷ Nemudi sogo wali-a tagu i genang tegan so Genam lo mea lemoy, wali nebuem go-a yam tui genang tegan so Genam lo me lemoy.” Wamoy mlue sogo wengkabui-wengkabui naklay demu naglap sa pu golo naklay kuk go mea klong, bu kangok so klak golo nemotnang lo son go sip ea togut-sing naklay." ¹⁸ Motnang go tegadi kekebong ey dok go ngga naklay mea suep-sing, Nggano, sikebog sip ey motnang nebut pu go ngga senang so meakua gigit; nago no tegan demun don ey sesrap go nogo, masi lo gualing golo motnang mea kusuop-sing. ¹⁹ Use wadikua nemot weng go nogo, mot ku lo mea lek-sing, Ki Wali Iram go nebut motnang senong go nogo, Bebuong ey motnang mea king; ²⁰ Yang, sipsrek tebot go kalik so mea tra, nggano, amka nengkoy eygo tebot go kalik so mea tra. ²¹ Yang, medium Perasim nogo kalik so, Woy Wali Iram mea ip, Gibeon pay nogo kalik so Nemot lo mea pluok, Nemot go tasam-tasam taling genang sogo Nemot go tasam-tasam ngga diding ba logo; Nggano, Nemot go takebali puok genang sogo diding ba lo Nemot go tasam ngganemot sang! ²² Nggatang sogo so, motnang nebut wayang pua pu, motnang go ta-masi so dok go tegan dedawin genaning, genam mo tup, Woy Wali Iram, Ki Wali Iram lo kukunan naklay no kisebui iti genang ngga, seni so mea lemoy. Woy Wali Iram go takebali teguop. ²³ Kama se tui, Genam go nebut bluem nase tup! Se tup, nggano, Genam lo pen go nase tup! ²⁴ Usus so semu go sedue logo, senang so usu yakua tetrok, nan kokop, nggano kukuali? ²⁵ No, nan ngga yam so teguop so semu gono, jintan seguo ey jintan kaut eygo mea kuali. Nggano, yensagot suk namon ey tala-tala so kuali go, nggaey, tatamang meno katang lo mea kuali-sing dali. Naskah Ibrani ba nogo kata meno nemot go seni maning suey so kua senong go gemang. ²⁶ Nemot go Ki Wali Iram lo mo nguok go nogo, kebali ngga pluok genang sogo, nemot mo senung gemang. ²⁷ Seni so, jintan suguo irik genang sogo, taut eretan pengirik lo yakua kebali, nggano, gerobak go roda lo jintan klaut meakua mesuop, no, seglu iwa-iwa sogo lo jintan seguo gemang ya suey-sing, nggano, jintan klaut-a teguoli demun lo gemang ya suey. ²⁸ Nemot so susuey go nogo, naklay daklaya kekay so naklay yakua muep-sing. Ngga kalik so ya kua. Nemot mo senong, sogo kalik so, gerobak lo nemot blo logo ya klak go koklong, nemot go yaen suey so uluot sogo be. ngga, Eretan pengirik Palestina sogo tandali-tandali susuey go naklay kanok sogo yakua! ²⁹ Ngge naklay ngga, Woy Wali Iram, Ki Wali Kumam sik so weng go; Nemot lo pu go ngga diding ba lo, nggano, Nemot go tasam duduing ngga blong dega ey.