¹ Nan Mesir sono kerlam so nemotnang go yaptenglam ey Yakob ey naklay wen go. Nemotnang go sui: ² Ruben, Simeon, Lewi, Yehuda, ³ Isakhar, Zebulon, Benyamin, ⁴ Dan, Naftali, Gad, Asyer. ⁵ Yakob lo tui golo ke go dabuilap naklay go 70 yam so .Sam Senang meno ba no klik go: 75 yam so. ⁶ Ngga ey, Yusuf gemang kebong. Nggano, ntatonnang ey nemotnang go da naklay gemang kebong dali. ⁷ Israel sikabung lo duo tui go, nok so kua ke, tagu yakua i. Nemotnang miam dega ey ke go. Nggano, don kangok dega so ke dali go. Ngga tang so, nan ngga nemotnang lo se kenok ⁸ Ngga ey, deguena imening golo nan Mesir tamlak go. Deguena ngganemot, Yusuf kua senong. ⁹ Nemot go blung no, deguena ngga lo pen go, "Israel saula ngge mata dega so. Imotnang sik sogo nemotnang-a miam dega ey. ¹⁰ Weng-a, nemotnang nogo kunala temoy no imot ya taling go. Tandali-tandali, nemotnang keke genaning. Nago no, ple lemoy go, klaya so nemotnang ey imot go plesi ey lemoy go, imot ey ple mea tui ne. Nggano, imot sik sogo nemotnang itak go mea klong-lak xt kuek go imot mea itak, imot lo ta meakua mlak." ¹¹ Ngga tang so, ide eygo kebali pluok genang sogo wengkabui-wengkabui, nemotnang blo no gemang taling sing. Kebali ide eygo ta lo pupluok go: Firaun nogo so, nemotnang lo ten ta genang yakena se klik-sing. Yangga, yakena Pitom ey Raamses ey. ¹² No, Israel sikabung lo sinok keke nemotnang miam dega ey ke dali. Ngga tang so, sedue Israel nogo seduekabung suali ey. ¹³ Ngga ey, sedue Israel nogo don ey sedue Mesir lo pupluok. Kebali sesemu genang sogo. ¹⁴ Ngga ey, kebali ide dega eygo lo nemotnang go dabui bete tetaling. Yangga, weng sik so yapklik genang demu duduik go. Nggano, usu nogo kebali meno-meno, ya naklay kebali don dega ey ta lo sedue Mesir lo pupluok go. ¹⁵ Duotui so kabung Israel no tebok go kabung-kabung no, Mesir go deguena lo don ey gemang pu, meno duo go sui Sifra ngga no meno go sui Pua, nemot lo pu go, ¹⁶ "Nago no motnang lo Israel kabung duo tui sogo no tebok go, duo ngga tutui gono motnang se ikum: sedue denok mo, motnang keda so duo ngga se tebuet. No kabung denok-a se itak go wali." ¹⁷ No, kabung-kabung tebok go ngga, Ki Wali Iram no suali so. Nggano, Mesir go deguena lo pu go kalik so nemotnang kua pluok. Nggano, duo tui go itak go uwali. ¹⁸ Ngga ey, deguena Mesir lo kabung-kabung ngga usi go, nemotnang no gemang usi, "Sogo so duo sedue denok itak go wali?" ¹⁹ Kabung-kabung tebok golo Firaun no pu go, "Yang, Ibrani kabung ngga Mesir kabung ey kua kerlam. Nemotnang don dega ey. Tetebok go kabung maning kua pung gono nemotnanng duo mo tui." ²⁰ Ngga tang so, kabung-kabung tebokgo ngga nogo suey so, Ki Wali Iram lo tebok dali. Saulatang ngga, miam dega so gemang se keke. Ngga, seni so miam dega seni so gemang ke. ²¹ Kabung-kabung ngga Ki Wali Iram no suali go tang sogo so, Ki Wali Iram lo tebokgo pluok go kabung-kabung ngga sedue gemang iti. ²² Ngga ey, Firaun lo nemot go blung naklay no gemang pu, "Sedue Israel nogo no tui go, duo sedue denok-a bu Nil ba sono se tetega. No, kabung denok-a naklay wali so se itak."