¹ Daud kebong genang ku se dedegu. Danon Salomo no, ngge kalik gemang pen: ² "Kukunan nogo wali, genam gabe ya yam. Ngga tang sogo so, mot go dabui don se kok! Ngga ey, sedue so se ip! ³ Woy Wali Iram, Ki Wali Iram nogo takebali, dabui lo keng go se pluok-tegoy. Nemot go tap Musa logo demutrui no pen go, demu-demu naklay suey so dabui lo se keng! Mot go takebali seni ey tagot genang. Igo sogo seni teguop so buo genang. ⁴ Ngga tang sogo so, Woy Wali Iram go tegadi ngge kalik genam no dok go ngga, lemoy genang. Nemot lo ngge kali tegadi dok go: "Mot go duo sedue denok lo suey so, dabui lo kengduk so, Genam go suongku lo Genam lo pen go kali koklong go, mot go duo no-duo no Israel go deguena go sipsuing sik sogo, duono-duono meakua tong-sing!" ⁵ Nggano, Israel go plewengkabui namon Ner go danon Abner ey Yeter go danon Anasa eygo, Yoab lo but go kin pi go, ngengam ku no ple ba nogo kalik so tebadali so kin pi go. Ngga ey, nemot go kuibey ey masisuk eygo bano kin ngga mo say. Tasam ngga, mot mo senong. ⁶ Mot-a, kunala temoy no se suing. Sedue seni ngge, suey so dabui yakay ey sedue kebong go sip nogo klong genang. ⁷ Gilead sik sogo sedue, Barzilal go danonang nogo, klum ey se tetaling. Nemotnang nogo ten, mot logo tendam sip sik so iti go se dam. Ngga kalik dali so genam nogo nemotnang lo mo iti tebok dali. Ku, mot go aka Absalom suali so genam kap go ku nogo. ⁸ Ngga ey, Bahurim sik sogo tang Benyamin Gera go danon Simei, mot ey maning gemang. Genam so piam kuaseni go nemot lo mo pu, No, nggablo idi lo bu Yordan no, genam nemot lo gemang wawi. Ngga ey, Woy Wali Iram go sui no, tanat ey genam lo mo pu: "Tengang logo nemot meakua but go kebong-srelu." ⁹ No, nemot nogo idekeba way kua iti-srelo. Yang, seni so, mot ngge, senongkalong eygo sedue, mot lo mea senong, nago suey go-a ya pluok, nago piam go-a yakua puok! Sedue seni ngge, kebong go sono dabui yakay ba lo ip genng." ¹⁰ Ngga ey, Daud kebong go, asi babunang ey, Daud go yakena Yerusalem no gemang tuet. ¹¹ Seni so, Blung Israelno deguena so Daud lo tamlak go yaguisa empat pulu yam so. Rehobot sogo, yaguisa tuju yam so, Yerusalem sogo yaguisa tiga puluh tiga yam so. Salomo ey Adonia eygo. ¹² Salomo-a nglangin Daud go sipsuing no deguena sogo gemang suing. Nemot go sipsuing blong naklay don dega ey. ¹³ Ku meno so, Hagit go danon Adonia, Salomo go unen Batsyeba sono weng go gemang usi: "Mot ngengam ey iti go weng?" Nemot lo way so pu go: "Yang, ngengam ey gabe!" ¹⁴ Ngga ey, Adonia lo gemang pen: "Nebut dato pen so genam weng go wa!" Ngga ey, Batsyeba lo pu go: "Pen-sando-a!" ¹⁵ Batsyeba sono Adonia lo gemang pen: "Esang! Mot mo senong. Deguena so suing genang genam logo mea dali. Nggano, blung Israel lo duing go, genam lo deguena se suing. No, sipsuing ngga, mot go duo go ta sono Woy Wali Iram lo iwat go tang so mo pui. ¹⁶ Ngga tang sogo so, genam go wadong klaya gabe, mot logo kua tenguo-sando!" Way so, Batsyeba lo pu go: "Pen-sando ya!" ¹⁷ Nggano, Adonia lo pen go: "Nggeasui go, deguena Salomo ey pen go, Abisag Sunem kabung ngga, genam no kabung so ya itak?Ngge, deguena logo mea kua teguo." ¹⁸ Ngga ey, way so Batsyeba lo wa go: "Yang, nebut ngga deguena ey genam lo mea pen." ¹⁹ Nggano, deguena Salomo sono Batsyeba gemang weng, Adonia lo wadong go nebut ngga pen genang so. Ngga ey, unen sono takong genang so wisi so deguena gemang ip. Nggano, deguena go sipsuing blo no Salomo gemang. No, deguena unen suing genang sogo, tasemla idi no sipsuing kong dali. ²⁰ Ngga ey, kabung ngga lo gemang pen: "Wadong seguay go meno klaya mea pen-salu, kua teguo" Ngga ey, deguena lo pu go: "Pen-sando-a! Genam logo mot lo wadong go yakua tenguo wa. ²¹ Nggano, unen lo gemang pu: "Sunem kabung Abisag ngga, Adonia sono senunnang so itak ya!" ²² Unen sono, deguena Salomo lo ngge kalik gemang pu: "Sunem kabung Abisag ngga, sogo tang so Adonia nogo so ne wadong to? Adonia deguena sogo sipsuing-a adong dali ya! Nemot ngga, genam go aka trang lo. Nemot no tebok go sedue-sedue, Woy Abiatar, Zeruya go danon Yoab gemang. ²³ Ngga ey,WoyWali Iram go sui no, tanat go deguena lo gemang pu: "KiWali Iram go takebali genam nogo ngge kalik gabe; no, Adonia go wadong ngge, nemot tang golo nemot go dabuilap lo mea king-sing!" ²⁴ Nggesui go, Woy Wali Iram, Kiki iram logo tang so aya deguena Daud go sipsuing no deguena so genam mo temuit. Nggano, Nemot go tegadi dok go kalik, genam nogo sinok mo tui. Nggeasui go, Adonia nogo idekeba iti go, nemot se kebong!" ²⁵ Ngga ey, deguena Salomo lo Yoyada go danon Benaya go ta sono Adonia iti go, blindon tong go Adonia gemang kebong. ²⁶ Nggano, Woy Abyatar sono deguena lo pu go: "Mot go usu Anatot sono mot se klong! Seni so, mot nogo idekeba, mot se kebong! No, nggeasui go ku nogo, at lo mot yakua but go kebong. Yang, deguena Daud at go aya go suongku nogo, Woy Wali Iram go Tegadi peti, mot lo mo ek go tang so. Nggano, aya lo lek go koy diding wong kalong, kerlam so mot ey mo lek dali!" ²⁷ Ngga tang so, Woy Wali Iram go woy kebali sik sogo, Abyatar gabe tong. Eli go yaptenglam so Silo no Woy Wali Iram lo no pen go nebut, Salomo lo gemang lemoy. ²⁸ Nebut ngga, Yoab tup go, -seni so, Yoab nemot Adonia no keng nogo, nemot-a Absalom nogo Yoab kua keng- Woy Wali Iram go bala ba sono Yoab kap go demusung go matu no ta gemang mlak. ²⁹ Ngga ey, nebut ngga, deguena Salomo no gemang pen: "Seni so, Woy Wali Iram go bala sono Yoap kap go, demusung ketang no gemang susuing." Ngga ey, Yoyada, Benaya go danon Salomo lo mot-dak go gemang pu: "Klong-a, Yoab, blindon nase tong!" ³⁰ Ngga ey, Benaya Woy Wali Iram go bala sono degut go, Yoap no gemang pu: "Ngge kalik deguena lo pu go: 'Dia sono mot se pung!" No, way so Yoap lo tenguo go: "Kua! Genam ngge no kebong so!" Nemot lo pu go nebut ngga, deguena no klong go Benaya lo gemang pen, Yoab lo ngge kalik gabe pu, "genam nggeno kebong so!' ³¹ Nggano, deguena lo pu go: "Nemot tang so pu go kalik nase lemoy. Blindon tong go mu no se tuet!" At ey aya ey go blo sono, tebadali Yoab lo glung-sing go kin ngga, ngga sono nase ka-sing. ³² Nemot go saysuk tang go nogo nemot tang so kin na pi. Seni eygo sedue, kuklue kua go sedue namon, nemot tang golo mo but-yom. Aya deguena Daud go tengang lo nemotnang mo but,. Aya Daud tang go kua senong. Yangga, Ner go danon Abner Israel go ple wengkabui ey Yehuda go ple wengkabui Amasa Yater go danon ey. ³³ Nemotnang go kin ngga, Yoab tang go wengkabui ey nemot go yaptenglam eygo blo sono, senang so iti go se glung-sing. No, Daud go mlenawalasrang nemot go sipsuing eygo-a senang so wali-wali so Woy Wali Iram lo susuoy-sing go se gigit. ³⁴ Nggano, Yoyada go danon, Benaya klong go, Tengang lo Yoab lindon tong go, nemot go yap neguen pay sogo no mu no gemang tuet. ³⁵ Ngga ey, Yoyada danon Benaya-a plewengkabui so Yoab way so deguena lo gemang taling. Ngga ey, Woy Abyatar way sogo, woy Zadok-a deguena lo gemang taling dali. ³⁶ Ngga blo idi lo, deguena lo sedue mot-dak go Simei wawi genang so gemang ngge kalik gemang pen: "Yerusalem no mot go yap klik, gono, ngga no se susuing. Sip ngga sik sogo, sip meno nogo pung go kua klong! ³⁷ Ngga sik so, pung go klong go, Kidron butuo li go klong go, mot but go mea kebong. Seni so ngge se senung! Mot kebong go kin, mot tang go blo no mea glung." ³⁸ Nggano, deguena sono Simei lo pu go: "Yang, tuiam deguena lo pen go kalik so genam lo mea keng." Ngga ey, ku kata yam so, Yerusalem so Simei suing go. ³⁹ Yagui nangglik so suing gono, Simei go koybutasemu namon, deguena Gad, Maakha go danon Akhis miy sono gemang kap. Ngga ey, Simei no sedue lo gemang pen: "Yang, mot go koybutasemunang Gad so gemang." ⁴⁰ Ngga ey, Simei nemot go kudanok tegan dok go Gad sono, Akhas mit no nemot go koybutasemunang ey tegu so genang klong. Ngga ey, tandali Gad sik so wawi go Yerusalem sono gemang weng. ⁴¹ Ngga no, nebut ngga, Salomo no gemang pen ngge kalik: "Gad sono Yerusalem sik so Simei klong go, tandali mo weng." ⁴² Nggano, deguena lo sedue mot-dak go, Simei usi go nemot sono weng go gemang usi: "Genam lo mot no Woy Wali Iram go sui no, tanat ey mo pen-yu ngge kalik: 'Sip ngge sik sogo, mot pung go klong go, mot seni so ngge se senong! Ngga, mot but go mea kebong. Nggano, genam sono mot lo mo yang yo: 'Mot go nebut no genam mea keng-lu!" ⁴³ No, sogo tang so, Woy Wali Iram go sui no tanat ey pu go, Nemot ey genam lo pen go nebut nogo, mot takua mlak ne?" ⁴⁴ Nggano, Simei sono tandali deguena lo pu go: "Mot tang go, mot go dabui ba sogo taybat piam go mo senong. Genam go aya Daud no mot lo pluok go taybat. Mot go taybat ngganemot, mot tang go saysuk sono Woy Wali Iram lo iwot go mea taling! ⁴⁵ No, deguena Salomo-a Woy Wali Iram go suongku no, Daud go sipsuing don dega eygo so, gabe ya lemoy, senang so don ey lemoy go mea gigit. ⁴⁶ Nggano, Yoyada go danon Benaya sono deguena lo pu go, Simei go blindon tong go, gemang kebong. Salomo go ta ba no, sipsuing blong ngga, don dega eygo so gemang babu.