¹ Deguena Daud srawe go, sedue seni seni so mo lemoy. Yang, nemot-a amka nengkoy eygo lo yam so kebet go, no, deguena saysuk nengkoy kua pung. ² Ngga tang so, nemot go kebali sedue lo pu go: "Duokaguit klaya meno-a se wet! Nemot lo tuam deguena tebok go, sadui yay suing sogo be. Tuiam deguena ey nemot srek go, kin nengkoy tui genang!" ³ Nggano, nan Israel naklay sono gemang wet. Nggano, duokabuit teguop go meno gemang ikum. Sunem sik sogo duokaguit deguena sono wawi go klong genang so. Nemot go sui: Abisag. ⁴ Duo kanguit ngga, naklay teguop dato seni. Deguena go sadui yay suing genang so wawi go gemang klong. No, deguena eygo sadui-a kuakenok. ⁵ No, Hagit go danon Adonia lo dabuita tegue ey gemang pupu: "Deguena sogo genam lo mea suing!" Nemot go plesedue, kuda eygo plesedue naklay yaluim-nawon gono, sedue limapulu yam so, nemot go suongkuno gemang ip-lak go. ⁶ No, ku ngganemot nogo nglangin logo, ngge kalik go maning kua bebat: "Sogo so, ngga kalik pluoktegoy?" Yang, Adonia ngga, nemot go saysuk naklay teguop seni, Nemot ngga, Absalom tui go bu no tui go duo. ⁷ Ngga ey, woy Abyatar ey Zeruya do danon Yoab ey pu go, Adonia ey nebut gemang suing, nemot sono tebok genang sogo so. ⁸ No, Woy Zadok, Yoyada danon Yoyada, nabi Natan, Simei, Rei, nggano Daud go ple pupung go sedue, Nemotnang Adonia go kunala nogo kua duk ⁹ Nggano, Adonia lo, domba, sapi, menay babu go temu ey demu Zohelet dagu no En-Rogel ketang no gemang tong-sing. Nggano, deguena go yaptenglam, naklay, ntatonnang, danonnang, sedue Yehuda, kebali sedue naklay, deguo gemang kung-sing. ¹⁰ No, nabi Natan, Benaya, deguena Daud go plesedue, ngga ey, ntaton Salomo nang-a deguo ngga kua iti. Batsyeba Nabi Natan lo mangking go ¹¹ Ngga ey, Salomo go unen Batsyeba sono, Natan lo nggekalik gemang pen: "Mot kua tup, Hagit go danon, Adonia, deguena Daud kua senong gono, namboy deguena so lemoy go? ¹² Ngga tang sogo so, se tup, mot nogo mangking gabe pensitugu; mot ey mot go duo Salomo eygo wali suing genang sogo. ¹³ Klong-a, deguena Daud go suongku no degut go nemot no se pen: "Tuam tang golo genam no, taeynat go mo pen ngge kalik: 'Mot go duo Salomo lo genam way sogo deguena mea got-yon! Salomo lo genam go sipsuing no deguena sogo mea suing! No, sogo sik so namboy Adonia lo deguena so ne suing?' ¹⁴ Yang, mot maning deguena eygo no, genam degut go, mot lo pen go nebut temu deguena sono mea pen." ¹⁵ Nggano, deguena go suongkuno tegu sogo so, Batsyeba degu ba no degut go gemang ip. Deguena yam so mo srawe seni. Nggano, Sunem kabung, Abisag lo deguena yay gemang susuing. ¹⁶ Batsyeba degut go segabuem unuik go, deguena no takong so. Nggano, deguena lo gemang usi: "Sogo so, mot duing tegoy?" ¹⁷ Way so Batsyeba lo pu go: "Yang, tuam tang gulo genam sono, Woy Wali Iram, mot go Ki Wali Iram go sui no taey mo nat yo, "Seni so, mot go duo Salomo lo, genam way so deguena so genam go sip dali no mea got-yon. Genam go sipsuing nogo nemot lo mea suing!" ¹⁸ No, se senong! Ngeasui go, deguena so Adonia lo mo suing. Deguena tang go, kua senong ne!" ¹⁹ Menay kangok-kangok go, sapi, domba mo ibutsing. Ngga ey, deguena go yaptenglam naklay nogo deguo mo kung-sing, Woy Abyatar, mot go plewengkabui Yoap, No, mot go duo Salomo nogo deguo kua pung ne. ²⁰ Blung Israel go nemu Mot sono tui go gemang bubung. Pen genang sogo, mot kua go nogo, nando lo, deguena mot way sogo ya taling?" ²¹ Kua go, motip go nogo, genam ey, genam go duo Salomo eygo sogo piam so ta mea nat-neyon!" ²² Nggano, Batsyeba deguena ey nebut so maning pepen gono, nabi Natan gemang degut. ²³ Ngge kalik so deguena sono gemang pu: "Ngge, nabi Natan degut go!" Nemot degut go, deguena sono unuik go, e... nebuem nan no kling. ²⁴ Natan lo pu go: "Tuam deguena! Mot tang golo pu go: 'Genam blo logo, Adonia lo deguena so mea suing. genam logo sipsuing nogo nemot lo mea got-yon!' ²⁵ Yang, nemot klong go, menay kangok go, sapi, domba, miam dega so mo tong-sing. Deguena go duo-yap naklay, deguo mo kung-sing nemot lo. Plesedue naklay,woy Abyatar. Nggesui go, nemot go suongku no, tendam budrop, ngga ey sek ey iti go gemang bebega: 'Adonia deguena, Wali wali!' ²⁶ No, mot go tamot Woy Zadok danon Yoyada, ey mot go duo Salomo eygo nemot lo deguo kua pen. ²⁷ Tuiam deguena go duduing no ngge mo lemoy go, sogo so genam mot go koybutasemu nogo kua pen ne, mot mo ip go nogo, deguena sogo nando-a ya suing?" ²⁸ Ngga ey, deguena Daud lo way so pu go: "Batsyeba usi-a, weng-a, deguena go suongku no pla ip!" ²⁹ Ngga ey, taeynat go deguena lo gemang pu: "Woy Wali Iram, genam so koywong diding sik so susuoy go Kiki Iram go sui no gabe. ³⁰ Seni so, Woy Wali Iram, Israel go Ki Wali Iram go sui no taeynat go tegadi dok-yu go kalik, gabe pen-asitugu: 'Mot go duo Salomo lo deguena so genam way sogo mea suing. Genam go sipsuing blo nogo, nemot-a mea suing deguena sogo. Ngga kalik so, nggeasui go ku nogo gabe ya lemoy." ³¹ Ngga ey, Batsyeba segabuem unuik go, e... nebuemnemu nan no kling. Deguena no takong sogo so. Ngga ey gemang pu-natun: "At go tuiam, deguena Daud go wali, senang so wali-wali!" Salomo deguena so tuik go ³² Nggano, deguena Daud lo pu go: "Woy Zadok, nabi Natan, nggano,Yoyada go danon Benaya, usi go se weng!" Ngemotnang weng go, degut go deguena go suongku no gemang ip. ³³ Ngga ey, deguena lo pu go: "Genam go duo Salomo genam go kuda nok unen blo no klak go, kerlam so motnang ey Gihon sono se klong!" ³⁴ Woy Zadok ey nabi Natan eygo lo, Israel go deguena so, nemot ngga no mea tuik. Ngga ey, kabui se u, sek se iti; 'Deguena Salomo, wali-wali! ³⁵ Ngga ey, ibe lo wawi go se weng. Genam deguena go sipsuing blo no degut go nemot se suing! Genam way so, deguena so nan Israel ey Yehuda eygo nogo nemot-a taling. go gabe ya suing" ³⁶ Ngga ey, Yoyada danon Benaya lo pu go: "Seni so wa! Woy Wali Iram, tuiam deguena Daud go Ki Wali Iram lo ngga kalik mo pen gabe!" ³⁷ At go tuiam deguena Daud yay suing go kalik, Salomo yay Nemot lo mea suing. Ngga ey, nemot go sipsuing, babu dega so mea bata. At go tuiam deguena Daud logo sik sogo." ³⁸ Nggano, Woy Zadok, nabi Natan, Yoyada danon Benaya, sedue kabung Kreti ey sedue Pleti ey. Deguena Daud go kuda nok unen blo no, Salomo klak go Gihon sono wawi go gemang klong. ³⁹ Nggano, bala ba sik so, mlay so sre go matu woy Zadok lo iti go, Salomo go beto blo no pi go nemot gemang tuik. Ngga ey, kabui gemang u go, blung naklay lo sek iti go gemang bega: "Wali! Deguena Salomo, wali-wali! ⁴⁰ Ngga ey, blung naklay mesip so Salomo no keng go, sedue kabung lo suling ey negui ey kangok so walop gemang pla. Walop kluim naklay kangok dega, kukunan ngge, pu ya togut? ⁴¹ Adonia ey, nemot go glop naklay nemot eygo, ten yam so dam gono gemang tup. Kabui pum go kluim ngga tup gono, Yoap lo gemang usi: "Yakena sogo, sogo kalik go kluim ne santugun?" ⁴² Maning nebut so Yoap pepen gono, woy Abiatar go danon Yonatan weng go, degut sogo no, Adonia lo gemang pu: "Degut-a! Mot ngge dabui suey go sedue gabe! Mot logo, nebut suey go-a mea pen-sando." ⁴³ Adonia sono Yonatan lo gemang pen: "Kua wa! Ngga, deguena so Salomo-a iImot go, tuiam Daud lo taling go. ⁴⁴ Seni so, woy Zodak ey nabi Natan ey, nggano, Yoyada go danon Benaya ey, sedue kabung Kriti ey seduekabung Pleti eygo lo Salomo wawi go deguena go kuda nok unen blo no klak go. ⁴⁵ Woy Zodak ey nabi Natan ey golo, deguena so Gihon no nemot Salomo mo tuik. Ngga tang so, yakena sono yakay dega ey usre ey mo pepla weng-lak. Yakena kluim dega ey, bubuong dega ey mo lemoy. Ngganemot kluim tup to go gemang. ⁴⁶ Nggeasui go, deguena go sipsuing blo nogo Salomo-a mo suing. ⁴⁷ Se senong, deguena go kebali sedue weng-lak go, deguena Daud ey taluik go suey ngge kalik gemang pu-sing: "Woy Wali Iram go don logo so, Salomo go sui ey sipsuing eygo, babu dega so mea bata, mot go sik sogo!" Nemoy go sipsrek blo sik so, deguena lo ta gemang kokong dali. ⁴⁸ Nggano, nggekalik deguena lo ngge kalik gemang pu: "Seni so, blong iway naklay, Woy Wali Iram, Ki Wali Iram sono se iti! Nemot logo so, genam go sipsuing blo no, Salomo taling go suing go, genam tang go nemu lo gabe ikum-tu!" ⁴⁹ Adonia go glop naklay saduibong ey pling go, ip-lak go, nemot go-nemot go iwotdak go gemang klong. ⁵⁰ Nggano, suali kangok so Salomo sono Adonia gemang tra. Nemot ip go, klong go demusung go matu no ta gemang mlak. ⁵¹ Ngga ey, ngge kalik so gemang pen: "nggeasui go, Salomo sono suali kangok so Adonia lo mo tra." Nngga ey, kap go demusung go matu no ta mlak go ngge kalik gemang pu: '"Esang! Nuey-a, nggeasui go, deguena Salomo lo tanat ey mea pu: 'nemot go tengang lo genam mea kua uluk go kebong sang!'" ⁵² Nggano, sedue Salomo lo mot-dak go gemang pu go: "Nemot ngga, dabui seni eygo, don eygo sedue mo, nemot lo pluok go ngga sogo, nemot go betodop klaya nang go nan sono go mea kua pui. No, dabui piam ikle sik so nemot lo ngga pluok go, idekeba kebong mea tegu dali!" ⁵³ Ngga ey, deguena Salomo lo sedue mot-dak go, demusung matu eygo sik so klong go deguena sono wawi go Adonia gemang weng. Nggano, deguena Salomo lo pu go: "Mot go yap sono klong-a!"