Apuni aike nen it apuni Yahudi mene weagarinabuogeluk iki laukwa mene Mewenetsasukwa wene ¹ Ineki ake 13 atiba, tugi 12 en holokogo, ati re tugi Adar, inoe kain etage pogot ane ba mel isike yinogo halelogogun iluk inane huli palek mene ati halelogousak. Ineki ake atiba, apuni Yahudi inaselei mene nen apuni Yahudi mene it en inapsiri logolik mawen halogo hisuogoluk ikilaukwa. ² Apuni Yahudi mene inebe o it inabi silike natogotelaukwa, o ukul lopok inoe kain etage pogot Ahasyweros wereke, it inoarik lasak iluk it inala nen aksukwa. Apuni ake omaket halok it lagasaluk hangasusak motok lek halagaike, atiba apuni inukuloak ati inayuk mene hagalaike ati, ³ Ap inetage werek yabu o atoma halarek mene obogat, inougi kaintek ineki eboke mene mel, ap inougi kaintek mal, nen ap inayabu hukutek inoe kain etage werek werekma halarek mene mel, apuni Yahudi mene werekma yabu leberisagarek mene, Mordekhai nen arat it ninoasusak iluk inayuk apik aike. ⁴ At Mordekhai ebe o inoe kain etage werek welagarek oba atoma at ekiba oane werek welaike, nen wene hagalaike mene apuni inabi sili lopok inelu nak hagalaike, atiba nen Mordekhai ake inomat ebe poke ya hagalaike. ⁵ Anogoba nen apuni Yahudi mene inaselei welaikarek mene obogat lek halogo, sige oba inoatukwasik weagarogo laksasukwa, it inetauken inoba ningsek welaukwa higit hogo halukwa. ⁶ O Susan welagarek oba a'la apuni Yahudi mene inoata nen inebe 500 hulaba inoata, ⁷ Nen Parsandata,Dalfon,Aspata, ⁸ Porata, Adalya, Aridata, ⁹ Parmasta,Arisai, Aridai, nen Waizata, ¹⁰ Haman ageinapuri inebe 10 , Hamedata aput, apuni Yahudi mene inaselei welaikarek mene. Mene at he, it en it inagarok yimane timene ake inakiabusak en wanilek. ¹¹ Ineki ake atiba re, apuni Susan welagarek oba inoatukwa mene hesik inoe kain etage werek yogotukwa. ¹² Inoe kain etage werek en He Ester yogotelogolik,' apuni Yahudi mene inebe 500 huliba nen, arat inoata nen Haman ageinapuri inebe 10 nen inomat o Susan welagarek oba nen inoatama. It en arat halah ati re o ap inetage werek hetakit werekma honogoma halama a? yogotak hat en kino egen mene a? ati ebe re hubuk hat wogosugun o. Yogotak hat namene kino egen nogo? atimene higit hogo at hagalasigin.'' ¹³ He Ester en wene oko igilogolik,''Inoe kain etage werek a'la akike oba halok, huek he apuni Yahudi mene o susan werek atoma yogotak yi werek higit hogo hagalausuak nen Haman ageinapuri inebe 10 huli nen he ukuloak eba hele kelogo hisogon.'' ¹⁴ Inoe kain etage werek en anogo halogo hisano iluk wene ike ati higit hogo halukwa. inane amusu palek ati o susan nen wulabukwa,nen it en Haman ageinapuri inebe 10 nen ebe hele keligik hisasukwa. ¹⁵ Tugi Adar ineki 14 en aba apuni Yahudi mene o Susan welaikarek mene inebe natogotukwa,nen apuni inebe 300 huliba o usan welaukwa mene inoatukwa. Atiba nen he, it mene inagarok ake inakiabusak en wanilek, ¹⁶ Apuni Yahudi mene inebe ato, o inougi kaintek inetage werek welaikarek oba welaukwa mene ninoasinogo iluk it inebe omakima natogorogo welaukwa, apuni ake inebe 75.000 huliba it inapsiri welaukwa; ati mene it en yimene timene ake inekiabusak en wanuagaluk ake leberisigilek kamoisukwa. ¹⁷ Ineki 13 oba tugi adar a'la ineki 14 oba, it en yi yabu ti yabu halilek welagat logolik inala hai oba, ineki purim oba hagalaganem isago nigilogousak oba wene ati hagalaike ¹⁸ Ati nen he, apuni Yahudi mene o Susan welaikarek mene ineki 13 nen 14 tugi atiba inebe natogosukwa. It en ineki 15 tugi ati oba welagat welaukwa nen ineki atiba re inala aleken oba isago nikilogousak iluk halogo hisukwa. ¹⁹ Ati nen,apuni Yahudi mene o ekake wutigik welaikarek mene, ineki 14 atiba tugi Adar oba inala aleken hogo isago nigilogolik supuruk isago wogosalagik igilogogun iluk halogo hisukwa. ²⁰ At Mordekhai nen wene hagalike mene ati nen suesika oba holal paligik apuni Yahudi mene obogat o welaikareke lopok inoe kain etage werek Ahasyweros en hagasek welagareke harogogat welaikarek ke ake walegat welaikareke mene obogat inoba lakesike. ²¹ Wam mauge ebe lopok warogo nen tugi ake Adar oba holok hogo ineki 14 nen 15 oba hagalaganem en isago nigilogousak iluk it en halogo hisukwa, ²² Nen ineki ake atiba re apuni Yahudi mene inaselei mene inekimo asusak mene tegelek hano halogo welaukwa,nen tugi ati a'la re, it inebe inapoke hebelarik inayala aleken aike nen leago motok welaukwa mene katok hogo hano welaukwa. It en ineki ati oba re inebe omaket arik isago nikik nen inala aleken hogo, ake supuruk isago wogosalagik nen apuni ake inagarok lek mene wogosik igilogoino. ²³ It apuni Yahudi mene nen arat halogo hisukwasik halilaukwa nen ati re at Mordekhai nen arat suesika oba holal palogo it hesik hisike. ²⁴ At Haman, Hamedata aput, aua agag mene ati, apuni Yahudi mene inom aselei logolik, apuni Yahudi mene nen Pur weagarogo higin iluk abok palogo hisike, ati ebe re weagatik nen it inoatik igeluk oageke jilogo kiba hagalasigin halogo hisike. ²⁵ Anogo mene at he, He Ester waikesik inoe kain etage werek oba kisike, at Haman nen apuni yahudi mene inapotke ukuloak oba wesusak, atiba at Haman nen ageinapuri inom ukuloak waganogo eba hele kelogo pelakesaweno iluk ane keralek suesika oba holal palogo wogotike. ²⁶ Atiba nen he, ineki ake atiba it en etge Purim isukwa, ati re pur egarek ati. Ati nen he, it i'neilaken lakagararek mene inom nen halarek mene inom, obogat suesika oba a'la holal palek werek ati, ²⁷ Apuni Yahudi mene nen halago hesukwa nen it inokawerek hesih mel, it en tagomake mene hesik mel, nen apuni ake inebe obogat it inom omakima asun mene mel, it en ineki ake oba limetigiklek oba eberok motok logolik ineki pire oba wam mauge ebe lopok warogo halelouok iluk isukwasik halogo hisukwa, ²⁸ Nen, ineki ebe lopok atiba oba eberek logolik nen it hobuk talasugun mene mel, o tim palek uguloak lopok mel, iauake welaikarek ke lopok mel, nen o silike lopok mel ineki pire oba lagakogo isago nilik lagalogouak. ineki isago nekarek oba Puram atiba ake apuni Yahudi mene nen hagalaikeoba ati it en tagomake mene ake lek halogo higilek oba eberek motok logolik halomotok logoino.. ²⁹ Nen At He Ester, Abihail eak, Mordekhai eperak, Yahudi mene ati, at en halusak oba at ma re suesika oba palike, ineki ake Parim hesik halelogousak oba suesika ineki pire oba wene ati mene hesik halogo hisukwa. ³⁰ At Mordekhai nen apuni Yahudi mene obogat natogorinapike, o ukul lopok o Ahasyweros welagarek oba mene 127 huliba, aneba nen igilogolik eberogoat nen hinala hano asuak, ³¹ It mene ineki ake inoe kain etage werek Purim hesik halelogousak oba it en ineki ake yiba halelogouok iluk inane huli palogo hisukwa.Mordekhai Yahudi mene ati nen ake heragigilek oba eberek halelaike hake eperak higit hogo, nen He Ester eperak halelaukwa. It en it inokawerek hesik mel nen apuni it en tagomake mene hesik supuruk i nikilek wesa igik nen it leagik igilogosak mene hesik halelougun iluk inane huli palogo arat hisukwa. ³² Agonoba nen He Ester en wene Purim mene halelogousak oba ane huli palogo, nen wene ati ebe holal palogo suesika a'la hisukwa.