(At Salomo Nen Nala Kalek Wonom Iluk Sapan Isike Wene) ¹ Salomo, Daud aput, ebe inoe kain etage werek hagalalaikesik oane werek welaike, Ninopase Etage Pogot Walowak en serogo motok welaike. At en Salomo etage werek halogo hsike. ² Salomo nen agoromi Israel mene mel yogosasike. Ap ukuloak hugi inebe esa holek 1000 huliba nen 100 huliba mene at en yogosigilogolik, nen ap kintek inebe lopok obogat Israel mene nen ukuloak welaikarek higit hogo. ³ Atiba lagakogo Salomo nen apuni inebe obogat lapukogo omakima o Gibeon ukuloba warogo loletarek oba laukwa. O atoma o lese apiaikarek oba Musa nen wutike, Ninopase Etage pogot ane yogosagarek mene, akeba at nen apuni Israel mene o ikebe apuni lekma welaukwa. ⁴ At Daud en arat Ninopase Walowak ane wene warek o Kiryat-Yearin en apokogo wolok hilaike, nen at en o lese wene warek ati logousak oba arat wutikesik o Yerusalem hilaike, ⁵ At Bezeel, Uri aput, Uri Hur apur wulikin perunggu halike. Wulikin perunggu ati ebe o Gibeon o lese tegelek hano wurik'mo soulam welaike, Salomo nen apuni ati inom Niopase Etage pogot oba wene ake higit hogo yogosoagaluk kino yogosugun 'iluk o Gibeon laukwa. ⁶ At Salomo ebe wulikin perunggu halek oba lagesikesik Ninopase Etage pogot elokoma o lese apiaikarek oba wurik'mo nen 1.000 huliba nen warogo opoloba etu lolitike. ⁷ O huako ati like Walowak en Salomo elokoma weinem aikesik nen wene mel yogotike, "Namene ake kino egen halok nen An nen ake wogosigin o.'' ⁸ At Salomo nen Ninopase Walowak yogoti logolik, "Hat en arat Daud oba hano mene halogo hisigin, nopase inoe kain etage werek welaike oba an nopase nen Hat en an wetewerogo inoe kain netage werek ket mene halogo hanep. ⁹ Yogotak ya Ninopase Etage pogot Walowak, Hane huli hisigin mene Daud oba hisogo wela, an nopase hesik hat en arat an wetewerogo hanen mene nebe inoe kain netage werek apuni inebe apigat mene hesik nen higit apuni wulage heke motok apik. ¹⁰ Yogotak nala kagalek nen wene nelu logousak oba wonom, atiba an nen apuni hano hagasek logolik kwe higit lasak mene yogosigiloigin. Apuni yi ake welek mene nen higit hogo halogo hisogon motok lek Hat en ake leberisegen lek halok he.'' ¹¹ Ninopase Walowak en Salomo yogotilogolik, "Hat wene ati mene hesik kino egen nen hat hagarok, yimene timene hesik kino egen lek, hogorinaparek mene athe haselei mene walasusak nen hebe heluk motok uan at logousak, a'nogo mene at he hala kagalek logousak nen wene helu logousak hesik enak hat kino egen, hat en apuni An mene hesik wene higit hogo palelogousak oba, apuni An nen wetewerogo hisasigi mene hesik hat en hagasek logoino. ¹² Atiba, An nen hat hala kagalek nen wene heluk logeinok en wokosigin, a'nogo mene at he An nen hagarok heimo walalak logeinok en wokosigin, hagarok yimene timene augutapelogousak oba inougi kaintek inetage werek mene ake welaike lek mene wokosigin.'' ¹³ At Salomo o lese apiaikarek oba wurik'mo o Gibeon ukuloa warogo loletarek oba nen herakuluk o Yerusalem apuni Israel mene inoe kain etagerek hagaselok loigeluk walike. (Salomo Nen Ap Weim Mene Esa Omamerogo Halogo Hisike Wene) ¹⁴ At Salomo nen weim mene keretah wam kuda oba lagilik kalogo laikarek mene natogorogo hisike. Atiba at mene 1.400 kereta weim mene nen 12.000 ap esa wam kuda oba lagilik lagalogousak mene hisasike. At en o sili kereta weim halarek obake nen o Yerusalek o at welagarek oba haligik hisike. ¹⁵ O Yerusalem, Salomo emas nen perak eparak higit helep apik'mo nen e cedar apik e ara oguluk sireke hugi welaike. ¹⁶ At Salomo wam kuda o Mesir nen o Kewe mene haluagaluk wene hisike. Oko wanuke inoe kain etage werek mene wam kuda o Kewe mene oko wanarek higit hogo. ¹⁷ Oko wanuke Inoe kain etage werek mene o Mesir kereta weim yabuke oko eka 600 syikal perak nen wam kuda oko eka 150 syikal perak mene oba wanukwa. Atiba lagakogo it en wam kuda nen kereta weim yabilogosak mene ati ap inougi kaintek inetage werek obogat lapukogo o Het mene nen inougi kaintek inetage werek Aram mene inoba oko wanukwa.'' iluk isukwa.