¹ Hala na Raja Agripa wana nyai Pauluh, " Nyumu na wuanggau waktu lapa padira wikimu." halai Pauluh na wuanya kariyauku isyaratu dangu na dendiya na limana dangu hina padira. ² " Nyungga ku hanang, Raja Agripa, lapa pandoiya na parakara nggu ba ndedi pa la lodu nahu nyumu lawanya mbulu halana tuduhan weling la kaum Yahudi. ³ Rihima, kaba nyumu ahli kau hanggang la mbulu halana tau Yahudi. Njadi nyungga ku monu nggau nyumu kau torung lapa ronguka. ⁴ Langataka, mbulu halana tau Yahudi da pimanya ba nggiki wana nyungga baku luri piti weling baku munda pa la ndaera nggu dangu la Yeruhali. ⁵ Nyuda da tanda ka nyungga weling la mangiluna dangu da akuya kaba nyungga baku luri hamana tau Parisi, nama dira kapandukuya dala anggama. ⁶ Nahu nyungga kundualaku lai yohu nduna lapa adili kaba nyungga patianggu nya napa ngganapu wana na randinai Miri, Ama nda nyuta. ⁷ Kaba naina duyaka na randi napa patiangu da da hombulu ndambu da huku kaba nyuda dangu paweli etingu da bada hambayang lai Ala lodu dangu rudung. Na lailu naina ndumana pamonunguda la Raja Agripa, da tau-tau Yahudi dama tunduka nyungga. ⁸ Ka nggikina nyimi hi ndai parahaya ya kabaila na hadang weling lametina? ⁹ Kanadu nuna duyaka, nyungga wiki makiraya kaba nyungga lundu kupalakuya na dangu na witing nama tantanya na tamunai Yehu weling la Nazaret. ¹⁰ Dangu, nuna duyaka napa palaku nggu la Yeruhali. Nyungga nda mbulungu paku natau-tau kunduh a napa patama nggu dala hukung, baku halaka pangalanya na mandatu weling la imam-imam kapala, kataka mbu nyuda bada hukung meti, nyungga ku patunju ya. ¹¹ Hala, nyungga kukali hukunja nyuda la Sinagoge-sinagoge dangu pa usaha lapa paksa ha nyuda kada jerikuya, dangu dira mbeni ailulu hanggang lai nyuda, nyungga ku aniyaya ha nyuda, lundu taka la kuatak-kuatak asing." ¹² Ndumana na nama nuna, nyungga ninggapa la anda hanggang la Damsyik, dangu pareta dangu tunggahu weling lai imam-imam kapal. ¹³ MBana tuamaka la tidu lodu, ya raja, la padua anda nggu, nyungga ku itaya hau nama kajilaku weling la awang, na rihipa papatarang weling mata lodu, nama duru winggirungga dangu datau-tau dama laku karia dangga nyungga. ¹⁴ Hala, kaba nyuma mbulu hala ma mapa nyukarungu la dita tana, nyungga ku rongu hau kariyauku nama pani lai nyungga dala li Ibrani, Sauluh-Sauluh, ka nggikina nyumu hiu siksa ka nyungga? Dira hanukaya nyumu bau tilaya na galah rangsang.' ¹⁵ Hala nyungga hiku paarang, ' Ka nggamukau ka nyumu, Miri?' Halai Miri wananja, Nyungga Yehu ka, napa siksamu. ¹⁶ Kataka, hadanguwa hala kau ndualaku wanja da wihimu. Kaba, Nyungga mbada pa itangu ngguka wiki nggu lai nyimi nduma na patunju nggu yiana, jiaya napa mbanjalumu hamana haatu tau pelayan dangu hakahi, nda mbulungu na nduma na witing napa mbada itami, kataka mbu ndumana na witing napa pa ita nggu nggai nyimi. ¹⁷ Nyungga ku pamalundu nggai nyimi weling la bangsa mu yiana dangu mbu weling la bangsa-bangsa hawiangu, nama wada nyuda nyungga ku paraha nggau nyumu, ¹⁸ kau mbunggahu ha da mata da nyuda kapeku pambelingu da nyuda weling lama kapatang hanggang lama hambila dangu weling la kuaha na imblihu hanggang lai Ala kapeku ngalang da nyuda pengampunan hanggang la njala-njala da dangu kada tarima nduma da la padua tau-tau dapa mbada pa hala papa kunduhuha dala pawai da lai Nyungga."' ¹⁹ Maka, Raja Agripa, nyungga ndaku parna a panda tundung hanggang la pa itaya na awang nuna, ²⁰ kataka, lamangilu-mangiluna, nyungga ku patakaya lai nyuda dama ninja la Damsyik, hala la Yeruhali, dangu la mbulu halana wilaya Yudea, dangu mbu la bangsa-bangsa hawiayangu, kaba nyuda lundunguma kada tombatu dangu kada pambelingu lai Ala, dangu lapa papalaku-palakuya hamana dangu napa tombatu wada nyuda. ²¹ Nuna duyaka lati, da tau-tau Yahudi apaka la umanai Ala dangu da mbuhang papametika. ²² Lundu lodu nahu, nyungga ku ngalanya napa namungu weling lai Ala hiku ndualaku nyungga lai yohu ndumana pa hakahi, hamu latau-tau kudu njaka ndia la tau-tau mbokulu dangu ndapa pa pabanjaru wanya na ruku hawiangu, dedi mayaka jaka napa panina da wunangu dangui Musa rukuna nama njadi, ²³ kabai Karitu lundungu ma na harui dangu na hadang beli weling la padua tau meti, Na mbuabarunya nama hambila, hamu la tau-tau Yahudi ato ndia la bangsa-bangsa hawiangu." ²⁴ Pauluh kaba patakanya pa rukuna napa kahirina, Festus wana dangu kariyauku pa mbokulunguna , " Pauluh ka katuaba munyaka nyumu! Napa pimu nama dira danguya nuna na pandoi kau nyumu hi ndau warahu." ²⁵ Katakai Pauluh wana, " Napa tembi nggu Festus, nyungga ndaku katuaba a, kataka nyungga ku patakanya nama padeningu dangu na kariyauku nama tama la kanandingu. ²⁶ Kabai, Raja na pinya na witingu yiana dangu lai nyungga mbu nama kariyauku dangu toru mbeni. Kaba, nyungga kuyakinu kaba nda ningu a hau mbu weling la witing yiana nama loloh weling la pahamatana kaba yiana ndana njadi a la pangia nama hudi. ²⁷ Raja Agripa, ka nyumu parahayaha da wunang? Nyungga ku pinya nyumu parahaya." ²⁸ Raja Agripa wananyai Pauluh, " La waktu nama mareni, nyumu mbada pa yakinu munggaka nyungga lapa njadi tau harani?" ²⁹ Hala, Wanai Pauluh, " Nyungga ku monung lai Ala kana pariangganya ato kana pakanadikuya, nda mbulunguna nyumu a, kata mbulu halana tau nama rongu ka nyungga lodu nahu, njadi pa hama ngga nyungga, dira ana da kalai-lai yiada." ³⁰ Halaka, raja na ndualaku. tuna numbu na gubernur, Bernike, dangu mbulu halana tau nama uhuku danja nyuda. ³¹ Hala, kaba nyuda bada laku warunya napangia nuna, nyuda da kariyauku dangu anguda haatu dangu hawiangu, " Natau yiana ndana palaku aya nggara mbiaya napa rakana hamana dangu na hukung meti ato panjara." ³² Maka, Agripa wananyai Festus, " Natau yiana njadi papahalaya jaka ndana hei banding lai Kaisar."