¹ Hi Paulus na kanduraya na Sanhedrin dangu hi wana, "Angu dedinggu, nyungga kupalakuya na luringgu wangu paweli etingunggu la hangga nai Allah lupa taka la lodu nahu." ² Hala, na Ratu Bokulu Ananias na paretaha da tau dama talanga ndulakuda la lihinai Paulus kada tabaya na ngarunai Paulus. ³ Hala, hi Paulus hi wanai Paulus lai nyuna, "hi Allah kana tabakau nyumu, ha nyimi tembok papabara wangu cat! Mala nyimi bai uhuku lapa buatangga njalanggu panamatunya la Uku Taurat, taka hi pangga biaminyai na Uku nuna dangu hi parahangu la patabaka nyungga?" ⁴ Kawadaka da tau dama ndualaku la lihina, "Mala kapa njalamunya na Ratu Bokulu nai Allah?" ⁵ Halaka, hi wanai Paulus, "angu dedinggu, nyungga ndaku pianya djaka nyuina na Ratu Bokulu. kanadu, napa tulihu, 'ambu djia paniwamunyaka maakatu na haatu makapipiya na banjarumu.' ⁶ Djiaba tuna, bana pinyakai Paulus da hawiangu da tau dama ninja lai nu ba tau Sadukiha, hi Paulus na pakaluakangu la njuanga Sanhedrin, "angu dedinggu, nyungga duku tau Farisi, ana tau Farisika duku. hida parehaka nyungga lailuna baninya na monunggu dangu na luri belina ma tau meti!" ⁷ Batalanga piniwananya nuna hi Paulus, ka tumbu nanyaka na pahili lai nyuda hapa djiaha da Tau Farisi dangu tau Saduki, dangu kapaiha-ihangu danyaka nyuda. ⁸ Kanadu,wada da tau Saduki nda ningua luri beli, nda ningua Malaikat, dangu mbu nda ningua Ngahu, taka da tau Farisi da parahayaya na ruku nuna mbu halana. ⁹ Hala, katumbu nanyaka na kanyauru pabokulungu dangu bamapiraha dama pingu Taurat welingu kanguhuru tau Farisi da ndualaku dan hida pabiatanya wangu mbenida,"nyuma ndama ngalaanya njalana na tau yiana. nggiki hamana na Ngahu djaka ndia Malaikat ba mbada pabanjaru dananya?" ¹⁰ Hala, bana tamba liaranguka na pahilida, na katiku hurundandu na mangadatu napa da pamanuwa duya hi Paulus pariada da tau dangu nuda, hina wuangu pareta la hurundandu kada puru lapa pitiya hi Paulus welingu la paduada nyuda dangu wahi danya, hala hida karianya la uma ndihi. ¹¹ Hala la rudungu na hau, na ndualaku hi Miri lakaranai Paulus hina wana, "Pamandunya na etimu kanadu nyumu ba mbada pahakahingu wangu pawelietingu dumu na rukunggu Nyungga la Yerusalem, taka batuna nu nyumu lupangu maduka badi hu pahakahingu la Roma." Na pakakangu lapa pametiya hi Paulus ¹² Bana tidunguka na lodu, da tau Yahudi kapahamangu danyaka lapa kambaliku lapa hupa wikida la panda ngangu dangu pangunungu ngga ngarambu lupa da pametiya hi Paulus. ¹³ Ningu tau patu kambulu rihiha dama kahaungu lapa kambaliku yiana. ¹⁴ Nyuda damai la Ratu kapala dangu la ama bokulu, hala hiwada, "Nyuma mbada mbada pamandungu maka wikima hupama nda djia ngangu mamapa lundu kama pametiya hi Paulus. ¹⁵ Nahu, djiaba tuna nu, nyumu, paangungu dangu Sanhedrin, paninya na katiku hurundandu kada puru karianya lai nyumu, mata ka hama djiangu pa mbada pareha pahamu munya na palakarana hala hu buatanya dangu nyuma kama hawanjiru la papametiya ba ndedipa nyuna nama mareninya na pangia yiana." ¹⁶ Djiaba tuna, na anana mini na anawini nai Paulus na ronguya rukuna lapa papayapa ba wada, hala na laku hina tama la uma ndihi, hina paninya hi Paulus. ¹⁷ Hi Paulus na haatu na hurundandu hala hiwananya, "karianya na bidi tau yiana la katiku hurundandu kaba ningu papakaluakana lai nyuna," ¹⁸ Hala, kakaria nanyaka la katiku hurundandu dangu hiwananya, "Paulus, napa tahangu nuna, na paaungga nyungga hina karaika la pakarianya na bidi tau yiana lai nyumu kaba ningu papanina lai nyumu. " ¹⁹ Na katiku hurundandu hina yapaya na limana na bidi tau nuna, hina yilaya la karahana nuna, dangu hina paaranya pamiahanya na bidi tau nuna, "Mala nggarayaka na papanimu lai nyungga?" ²⁰ Hala, hina hiama nyuna, "Da tau Yahudi mbada pahamangu daka la pakaraiya hi Paulus lai nyumu ka puru karianya haromu la sanhedrin, hama djiangu ningu papaarada marihi paihikungu lai nyuna. ²¹ Taka, ambu djia rongu dumuha nyuda kandu ba ningu tau patu kambulu rihiha welingu nyuda dama napunya hi Paulus, ba dangu hupada wikida la panda ngangu pa ngunungu lupa da pametiya hi Paulus. Dangu nahu, nyuda ba panedi danya na patunjumu nyumu aka." ²² Hala, na katiki hurundandu hina paliawaya na bidi tau nuna la palaku, hina pambulunya pani nyuna, "Ambu djia ninguka ngia papanimu kaba mbada pakaluaka dumu ngganyaka lai nyungga na rukuna yiana." Hi pangandinya hi Paulus la kuataku Kaisarea ²³ Hala, na katiku hurundandu nuna na paaunja ba tau maduaha da hurundandu hala hiwananja, "Hawanjiruwa dua ngahu hurundandu, dangu pihu kambulu makaliti njara dangu dua ngahu hurundandu ma ngandi madaka, hala kada laku la Kaesarea, la patailu wana na jamu la rudungu yiana. ²⁴ Hawanjirunya mbunya banda kana kaliti hi Paulus dangu kai karianya nyuna dangu nda nggara ehina lai Feliks, na gubernur nuna." ²⁵ Hala, nyuna hina tulihuya na huratu, hama djiangu yiana: ²⁶ Welingu lai Klaudius Lisias. ²⁷ Na tau yiana da yapaya pariada da tau Yahudi dangu nyuda da tika papameti amayaka bajiaya baku kariangu hurundandu aka una hina luri biapa, ba pinyaka ba tau Roma nyuna. ²⁸ Kaba yaulunggunya papinya djaka nggara lataya hida pabukunya panjala, hiku puru karianya la Sanhedrin da nyuda. ²⁹ Hinaka hiku pinya hida panjala nyuna lailu rukuna da Uku Taurat da nyuda una, taka nda ningu ndokua lata maparakangu lapahuku pametiya djaka ndia la uaka. ³⁰ Taka bapaninggayaka nyungga kaba ninya na kambalikuda lapa lawanya na tau yiana, hiku paringgangu lapa wuangu pareta lama tunya njalana mata nyuda kada paluahanya na papanjala wadanya nyuna la hanggamu. ³¹ Hala, da hurundandu, panamatunya na papareta wanja nyuda, da pitiyai paulus hida karia rudunya lai Antipatris. ³² La hili hau lodu, hida pulinja dama kaliti njara nuda lapa karinya, hala nyuda hida kabeli la uma ndihi. ³³ Bada takaka nyuda la Kaisarea dangu hida patakanya na huratu nuna la gubernur, hala nyuda hida ngandiyai Paulus la hanggana. ³⁴ Bana halaka lapambahaya na ihi huratu nuna na gubernur, hina paaranya la giniya na ngia pawelinai Paulus. Dangu, bana pinyaka nyuna bapawelina la Kilikia hi Paulus, ³⁵ kawanaka nyuna, "nahu nyungga ku rongukau ba ndedipa da taka dama panjalakau. "Halaka, nyuna hina wuangu pareta mata kada rimanya hi Paulus la Uma ndihi bokulu