Kota Padou amana wai ¹ Napanewe MYORI barrana Yosua, patekkina: ² "Tekkida ata Israel hinnawe, patutuge kota toramu padou amana waimu, patekkibana MYORI papa dukkina Musa barramu. ³ Bagarra kuni apamate ia ata dawali kalaki atekina, nya pakedu waina nee, monno da tuntu ta pongnguba nee padou pa amana waina ba pamate kaia. ⁴ Ne bana dukki ne ia kota pa dou kedu waina, nadede bellipo arona binna gerbang kota monno tekkie salahna barrada tua-tua adoudi kota-kota. Hida a deiba pongnguwa ne kota dana monno yai padou pa nee wai, na dangngi marenga Dengadi hida ata. ⁵ Hida ata awolawa kapa matekai bahidai, dayakadai limma detada, orona bana pamatea ole atana da wali kalaki atekina, monno dabenci ulluwa wai kinai. ⁶ Nya na dangngi pongngupo ne kota padukki waina dukkie rapana rapana bapa kuwana jemaah baadila, monno bawaidi imam besar bana dadie mate. Nyaba na oda apamate ata bana wali bali kotana monno ummana, pakitana nee kota pa wali waina banna kedu. ⁷ Hida ata apasigilawe: Kadesh ne Galilea, ne letedeta Naftali; monno Kiryat-Araba, ne Hebron lete detana Yehuda; ⁸ Ne bali loko Yordan, nee bali timur Yerkho, hida ata atentukage Bezer, ne mareda benango, nee mareda gugun, wali kabisu Ruben; bage Ramot nee Gilead wali kabisu Gad; monno Golan nee Basan wali kabisu Manasye. ⁹ Hida nyadu ngarakuwa kota paka logada ngara kuwa ata Israel monno ata eka adangngi nde tilluda ba kedu wai nee, gai ngara kuwa ata apamate ata dawali kalaki atage, kada matekana limma detada ata atuntutai kapa matekai bahidadi, dukkie aryo bapa kuwana jemaah.