¹ Ettipona, ne katerridekkana tana, a panewe waina iya panewe. ² Bage, a dikki ne'e timora, a tabbokawe ne tana mara ne'e tana Sinear monno a dangngi wa'i ne'e. ³ Apaendage, "Maida kata raina tanapapepe kata tunnu paduawi". Bage katawaidi etti tanapapepe pa'li togodi monno aspala nya pakadakka wai'nda. ⁴ Bage hiddage ba tekkiwe, "Maida kata padede iya wanno a tuba toro ndouda itto monno tolakana a ndukki ponnu langita; monno maida kata elle ngara a tuba toro ndouda itto. Ga'i kadata mawewarakana ne'e katerridekkana tana". ⁵ Takka, na mburru Maromba Allah nbana etawe ne wanno monno tolakana parai nda a madeta. ⁶ Kahinna ge Maromba Allah, etawi, hidda iya bangsa, monno ngara kuwa a waina panewe a sama, ne wuddi kawungnga na appa we papande parai nda; dallu da'i ba ngarra kuwa pabeinda nda ndadi. ⁷ Maida kata mburru monno ta'dauda ne panewe nda, ga'i ka'nda dommukawe ne panewe ndouda iya ata iya ata. ⁸ Nya kana Maromba Allah, na tallaradi iya pa'dou iya pa'dou, ndukkiwe mba ndundakage ne wanno papawillinda. ⁹ Nya'ka ne pa'dou kapangara ngge Babel, oronawe na Maromba Allah mbana dau'ndawe ne panewe katerridekkana tana,monno wali wa'i ne'e pa'dou na Maromba Allah mbana tallaradi ne katerridekkana tana. ¹⁰ Hidda nyawi lara pa'li na wolla uwa na Sem. Hetti mba ngngau douna Sem, nya mbana ama na Arpakhsad, mbana malawiwe nduada ndouna mbana keddewe ne wangu kalada. ¹¹ Mba lengapa ama nai Arpakhsad, na Sem na toleka capo limma ngngau douna monno wa'i capu'ndi ana kabani monno ana mawinne na waddeka. ¹² Mbana tolekapo na Arpakhsad touda kabullu limma douna, nya' mbana ama na Selah. ¹³ Mba' lengapa ama nai Selah, na Arpakhsad na toleka capo pattangau touda douna monno wa'i capudi ana kabani monno ana mawinne na wadekka. ¹⁴ Mba touda kabullu douna na Selah mbana toleka, nya' bana ama na Eber. ¹⁵ Mba' lengngapa ama nai Eber, na Selah na toleka capo pattangau touda douna monno wa'i capudi ana kabani monno ana mawinne na waddekka. ¹⁶ Mba' touda kabullu patta douna na Eber mbana toleka, nya' mbana ama na Peleg. ¹⁷ Mba' lengngapa ama nai Peleg, na Eber na toleka capo pattangau kabullu douna monno wa'i capudi ana kabani monno ana mawinne na waddekka. ¹⁸ Mba tauda kabullu douna na Peleg, nya' mbana ama na Rehu ¹⁹ Mba'lengngapa ama nai Rehu, na Peleg na toleka capo nduangau nnyu'a douna monno wa'i capudi ana kabani monno ana mawinne na waddekka. ²⁰ Mba' touda kabullu nduada douna na Rehu, nya' mbana ama na Serug. ²¹ Mba'lengngapa ama nai Serug, na Rehu na toleka capo nduangau pittu douna monno wa'i capudi ana kabani monno ana mawinne na waddeka. ²² Mba' touda kabullu douna na Serug, nya' mbana na ama na Nahor. ²³ Mba' lengngapa ama nai Nahor, na Serug na toleka capo nduangau douna monno wa'i capudi ana kabani monno ana mawinne na waddeka. ²⁴ Mba' nduakabullu nnyua douna na Nahor, nya' mbana ama na Terah. ²⁵ Mba' lengngapa ama nai Terah, na Nahor na toleka capo ngngau kabullu nnyua douna monno wa'i capudi ana kabani monno ana mawinne na waddeka. ²⁶ Mba' pittu kabullu douna na Terah mbana toleka, nya' mbana ama na Abram, Nahor, monno Haran. ²⁷ Hidda nyawi lara pa'lina wolla uwa na Terah. Na Terah nya' mbana ama na Abram, Nahor, monno Haran. Na Haran nya' mbana ama na Lot. ²⁸ Na Haran na mate wa'i ne aromata na Terah ama na, ne'e tana npadau ndadi wa'i na, ne'e Ur-Kasdim. ²⁹ Na Abram mbada Nahor a ndeke mawinne ntuba'da; Sarai hinna ngara na mawinne na Abram, monno Milka hinna ngngara mawinne na Nahor, ana na Haran. Na Haran nya' ama nda Milkha mbada Yiska. ³⁰ Na Sarai ndanna pati'aki nya' nka'dai ana na. ³¹ Terah na ngindiwa Abram ana na, Lot ana na Haran, umbu na, monno Sarai wasse na, mawinne na Abram wali Ur-Kasdim aro ne'e tana Kanaan. Mba' lengngapa ndukki ne'e Haran, engawa'i mbadi nemme. ³² Nduangau limma douna mado'i toleka na Terah, mbaka wuddi na mate ne'e Haran.