¹ Hidda' nyawi dalara'na Sem, Ham, monno Yafet; ana'na Nuh. Hidda ana kabani'na a' nda'di leng'ngapa mbali'nawe wangu kalada. ² Ana'na Yafet Gomer, Magog, Madai, Yawan, Tubal, Mesekh, monno Tiras. ³ Ana' na Gomer, Askenas, Rifat, monno Togarma. ⁴ Ana' na Yawan, Elisa, Tarsis, Kitim, monno Dodanim. ⁵ Wali mbarra 'nda hidda nya'mbawi a' tallara inna kaweda wali ngarra kuwa bangsa a' dang'ngi ne'e uppu bonnu, iya ata-iya ata a' ndeku'ngge panewe'da, wolla uwa'da monno bangsa ndou'nda. ⁶ Ana'na Ham, Kush, Misraim, Put, monno Kanaan. ⁷ Ana'na Kush, Seba, Hawila, Sabta, Raema, monno Sabtekha. Ana'na Raema, Syeba monno Dedan. ⁸ Na' Kush nya' ama'na Nimrod; na' Nimrod ata a' kawunga'na a' ndakkota monno a' manakkata ne'e ponnu tana. ⁹ Nya' ata kalola a' manakkata ne'e arona Maromba Allah. Nya'ka hidda ngge ata mba' panewe, "A' hinna na Nimrod, ata kalola a' manakkata ne'e arona Maromba Allah." ¹⁰ Ka' wungnga sanga'ndi na ne pa'dau, Babel, Erekh, monno Akad, monno Kalne ne'e tana Sinear. ¹¹ Wali' ammi ne'e, kana tama ne'e Asyur. Ne'e nyawe mba'na pakedde'we Niniwe, Rehobot-Ir, Kalah, monno ¹² Resen a' neina ne'e do'ngana Niniwe monno Kalah; ne'e iya wanno a'kalada'na. ¹³ Misraim nya'bana ama'nda ata Ludim, Anamim, Lehabim, Naftuhim, ¹⁴ Patrusim, Kasluhim nya' ina kaweda'nda bangsa Filistin, monno Kaftorim. ¹⁵ Na' Kanaan nya' ama'na Sidon, ana mbodi'na, monno Het. ¹⁶ Wolla uwa'na Kanaan waddeka, ata Yebusi, ata Amori, ata Gergasi, ¹⁷ Ata Hewi, ata Arki, ata Sini, ¹⁸ Ata Arwadi, ata Semari, monno ata Hamati. Mba'lengnga pa'mbawa rapa ngarra kuwana ndu'ndadi na Kanaan a' matallara. ¹⁹ Ne' pa'dounda ata Kanaan a'padalarana wali Sidon aro Gerar ndukki Gaza, monno a' aro Sodom, Gomora, Adma, Zeboim, lappata a'ndukki ne Lasa. ²⁰ Hidda mbana wolla uwa na Ham na ndeku'ndi ndu'ndadi na, panewe nda', pa'dounda, wanno nda, monno bangsa nda. ²¹ Na' Sem, ang'ngua na Yafet monno umbu waika nda' wali ana'na Eber, a' nda'ndi kai'na ana kabani'na. ²² Ana'na Sem, Elam, Asyur, Arpakhsad, Lud, monno Aram. ²³ Ana' na Aram, Us, Hul, Geter, monno Mas. ²⁴ Na' Arpakhsad nya' ama'na Syela; Monno Syela nya' ama'na Eber. ²⁵ Na' Eber nya' ama nda nduada lakawa; na' iya ngara'na Peleg orona ne' tana na'mabokkawe na' ndou patoleka waina, monno hidda waddeka a' ngara na Yoktan. ²⁶ Na' Yoktan nya' ama'nda, Almodad, Selef, Hazar-Mawet, Yerah, ²⁷ Hadoram, Uzal, Dikla, ²⁸ Obal, Abimael, Syeba, ²⁹ Ofir, Hawila, monno Yobab; ngarra kuwa'da ana'na'ndi Yoktan. ³⁰ Ne' padou'nda a'padalarana wali Mesa ndukki Sefar ne'e mbali lete'na timura. ³¹ Hidda mba'na wolla uwa na Sem na'ndekudi nduda'ndi na, panewe nda, tana wanno nda, monno bangsa nda. ³² Hidda mbana, dallarana nduda'ndi na ana Nuh mba'ndeku'ndi silsilah nda' monno bangsa nda'; monno wali'na hidda bangsa-bangsa, ngarra kuwa bangsa a'padalara na ne' tillu ndekana tana, mbapa namalewata wangu kalada.