Salomo Napakedde Bait MORI ¹ Mulai bana Salomo bana pakedde Bait MORI ne Yerusalem ne ponnu Letena Moria, ne pandou jenyage MORI bana patingngo wekkina barana Daud, amana Salomo. Salomo napakedde bait ne pandou pasiapana Daud, ne lantai pengirikan douna Ornan, natti ata Yebus. ² Na mulaiwe ne papawilli ne wulla kaduada, tahun kapatana masa paretana. ³ Salomo napakedde fondasi Bait ALLAH ukuran a ullu, malouna touda kabullu meter monno lebarna kabullu meter. ⁴ Serambi aro Bait malouna kabullu meter dekuge lebarna umma, monno madetana enne kabullu meter. Ne danana dilapisi omma rara. ⁵ Bage na ta'idi papan wali wasu sanobar ne rindi koro a kaladana. Bage ne ponnu papan na lapisi omma rara bage nayadi gambar wasu kurma monno rantai ne ponnuna. ⁶ Na hiasa Bait MORI waige togo a manada. Omma rara pawaina omma rara Parwaim. ⁷ Ne danana Bait MORI nalapisi waige omma. Balok langit, ambang, dinding, monno binna a lapisi omma. Ne rindina na ukirai malaikat kerub. ⁸ Bage narawige Padou a Mahakudus. Malouna kabullu meter monno lebarna kabullu meter, dekuge lebarna Bait MORI. Rindi Koro Mahakudus nalapisige omma rara a botona enne ngau talenta. ⁹ Botoda ngara pakuna omma rara limma kabullu syikal. Ne ponnu kaina nalapisige omma. ¹⁰ Na rawina duada malaikat kerub kanna ta'idi ne Koro Mahakudus. Ngara ata a pawilli melapisi ngara malaikat kerub waina omma. ¹¹ Kapana malaikat Kerub masing-masing duada koma limma meter. Malou ngara kapana kabullu meter. Na iya kapa na todo sisi rindi koro. Kapana a eka natodo kapana malaikat kerub a kaduada. ¹² Hinna kaina kapana malaikat kerub a kaduada a malouna dua koma limma meter, na todo sisi wadde wali koro, takka kapana a iya na todo kapana malaikat a ulluna. ¹³ Kapada haida malaikat a duada membentang kabullu meter malouna. Haida malaikat a duada a aro netti Ruang Kudus. ¹⁴ Na raina tirai waina kaba ungu tua, kaba ungu muda, kaba kirmizi monno lenan halus, bage na gambar malaikat ne tirai deta. ¹⁵ Na ta'ina pari'i ne arona Bait MORI, madetana kabullu pittu koma limma meter waina kepala pari'i wali duada pari'i malouna duada kabullu koma limma meter. ¹⁶ Na rai dommoge untaian rantai monno napasangkai ponnuna pari'i. Na raina ngau buah delima monno na ta'ige ne rante deta. ¹⁷ Bage na ta'i na pari'i ne arona Bait MORI, na iya tuba kawana, monno na iya tuba wello. Na pari'i tuba kawana napangarawi "Yakhin" monno na tuba wello, "Boas".