Aronewe tubana penabur ¹ Mono, Yesu na mulai bana bowo kiana nee uppu loko. Da pakassana bada kaworoni Yesu yidda ata mangieda pongu bage maka na penneni na iyya tiena mono na madi'i nee ponnuna. Bage yidda ata mangieda needi togo tana, uppu loko. ² Mono, Ngia na bowodi mangieda hal waidi aronewe. Nee pengajaran dana-Na, linnadi yidda, ³ 'Rengewe! Wa'ini na iyya penabur a kako bana taddona. ⁴ Maka na dadiwe neya, ne baneni a taddona, yidda pirra winni da kaboula nee uppu lara, yidda keila da mai bada nga'age. ⁵ Ne waddeka na kaboulawe togo tana a pawatuna a idda mangieda tana nage. Ne winni na ngettage bana tubbuwe oronage ne tana ba dana madalege. ⁶ Na mata loddo bana taba wadala, na winni na karra mono oro ba da'i kalarritana, na marokota. ⁷ Ne waddeka na kaboulawe nee tillu tara dana. Bage, na tara na tubbuwe mono na himpitya na winni dukki bana mate, mono da'i bana wuana. ⁸ Takka, ne waddeka na kaboulawe togo tana a dessa mono mangu wuana, na tubbuwe, mono na taba kaladage, mono mangu wuana touda kali lipat, enne kabullu kali lipat, mono ngasu kali lipat'. ⁹ Bage, linna Yesu, 'Garra a mangu katilluna bana rengewe, ga'ini kana rengewe!' ¹⁰ Na Yesu ba neni a kamiesa, yidda ata barra-Na, dugguda yidda kabullu duada rasul, da tuaya barra-Na tubana ne aronewe. ¹¹ Bage, Ngia na waleyi, 'Rahasia nage kerajaan Allah da tekki guge barramu. Takka, barrada ata waddeka, ngara dukkada da tekki dadi waige tuda, ¹² ga'i, 'Lakka da ieta, da ietawe mono dada padde mage; mono lakka da rengewe, da rengewe mono dada pahami mawe. Ga'i yidda ka dada derra kana mono dapa uopi madadi doku da'. Yesaya 6 : 9 - 10 Patekkkida tubana winni nee tudda tubana penabur. ¹³ Bage linna Yesu barrada, 'Dou padde mani na tudda? Pei wa'ina bei paddedi yidda ngara dukkada tudda? ¹⁴ Na penabur na subbarage li'i-Na Marobba Allah. ¹⁵ Yidda dona ata a guggila nee uppu lara, padounage ne li'i-Na Marobba Allah ba subbarage. Ne bada rengewe, bage ammini na muori tana mono na parimage ne li'i-Na Marobba Allah pa sobbarada barrada. ¹⁶ Linna alla dowe, yidda pa sobbara togo tana a pawatuna ngiadoyi ata a rengewe li'i-Na Marobba Allah mono da maringa bada deibawe. ¹⁷ Takka, dana pa kalarrita mawe nee tou danana mono da bertahan sementara kanage. Bage, ba ammi koge mayilla oronage li'i-Na Marobba Allah, da guggila bana. ¹⁸ Mono, waddeka ngiadoyi a kabuola nee tillu tara. Yidda dona ata a rengewe li'i-Na Marobba Allah, ¹⁹ takka ne kawatira ge ponnu tana, mono hawa nafsu tubada poteda, mono pabeida nemmi waddeka na tamayi nee li'i dana-Na Marobba Allah mono na disseyi dukki ba da'i wuana. ²⁰ Takka, yidda pa sobbara togo tana a dessa ngiadoyi ata a rengewe li'i-Na Marobba Allah, da deibawe, mono na wua we, touda kabullu kali lipat, enne kabullu kali lipat, mono ngasu kali lipat'. Tuda tubana pelita. ²¹ Bage, linna Yesu barrada yidda, 'Ne pelita da ngiddi kiwe mono boddalawe nee kabu gantang atau kabu padou beika? Ne pelita seharusnya boddalapowe nee ponnu wa'ina pelita? ²² Oronage, da'ima a kabunni pa dapa bisa ba tekkiyi. Linna alla dowe, da'ima lakka appa rahasia ya oronage neya da patingoge. ²³ Ba wa'iko ata a mangu katilluna bana renge waina, lakka na rengewe!'. ²⁴ Bage, linna Yesu barrada yidda, 'Paate kige appa pa rengemu. Na ukuran pa waimu da ukura wai alla guni, mono wa'i kiapoge pa tabadagu. ²⁵ Oronage ba garra koni a manguna, ngia da ya kiani, takka garra koni a idda manguna, lakka appa nadi a wa'ina barrana da deke nadi'. Tudda tubana winni. ²⁶ Bage, linna Yesu, 'Kerajaan Allah linna wa'iwe na iyya ata a sobbarana winni togo tana. ²⁷ Na a sobbarana na dura mono na kedde loddo mono gedde, mono ne winni na palousoge tibbuna mono na tubbuwe. Na a sobbarana winni dana padde mage pei wa'inage bana dadiwe. ²⁸ Ne tana mangu wua douge. Na ullu tibbuna, bage wullina, bage wiesa kamagge nee wua danana. ²⁹ Ne bada moddu yidda wiesa kamagge, na ata na ngettana bana mai saruobuyi oronage bana dukki bawe rapa ba kunni'. Tudda tubana wiesa lenga. ³⁰ Bage, linna Yesu, 'Appa pawaiko dage bata pa tuddawaige ne Kerajaan Allah? Atau, appa tudda pawaidage bata banding waige? ³¹ Ne Kerajaan Allah mirrika wiesa lengawe pa sobbara togo tana, lakka na wiesana ba ngiana a ki'i pongana walina wiesa waddeka ne ponnu tana, ³² takka ba sobbara koni, na wiesa na tubbu mono na louka pa kaladana walina ngara dukkada pataddo nee uoma dana, mono na palousodi cabangna a kaladana bage yidda keila a wurruna da rawina padou manededa nee kabuna'. ³³ Ne ba waige tudda a linnana a mangieda, Yesu na padukkige li'i-Na Marobba Allah barrada yidda, a linna bana pa renge bada. ³⁴ Dana pernah ki bana panewe ba dana waina tudda, takka Ngia na palarage ngara dukkanage barrada yidda murita-Na. Yesu na pangauya kapote. ³⁵ Mono, netti loddona, ne mamale linna Yesu barrada yidda murita-Na, 'Mai kata kako nee bali suoba'. ³⁶ Ne bada duddakadi yidda ata mangieda, da ngiddiya Yesu bana palolo dengadi yidda bada tama nee tiena dana padou-Na Yesu. Mono, yidda tiena waddeka da palolo denga-Ni. ³⁷ Bage, na kedde kapote a kaladana mono na ngalungu bonnu na weitakadi yidda tiena bage yidda tiena da bonnuna we'e. ³⁸ Takka, na Yesu neeni uppu tiena, a dura togo lunna. Bage, da pakedde-Ya mono lidda-Ni, 'Guru, ne You dou peduli mawe bata binasa?' ³⁹ Bage, Yesu na kedde mono na kayakani na kapote, bage linnani na bonnu, 'Kadenna! Kamattaka!' Bage, na kapote na ngau mono na kadenna. ⁴⁰ Bage, linna barrada yidda, 'Appa maka mi madauta? Da'ima ate waimi?' ⁴¹ Da madauta pongu mono lidda iyya mono waddeka, 'Garra Ngia naya? Bage na kapote mono bonnu maka da waiwa-Ni?'