Ne Kota Ai na moddawe ¹ Bage, MUORI na panewe barrana Yousa, 'Dou madauta kana mono dou mangieli ate kana. Ngiddiyi ngara dukkada tentara a patauna mono ngettana kako ne'e Ai. Paddege, yidda limma-Gu na yaguni na tokko Ai, atada, padouna mono luodana. ² Pa dadige barrana Ai mono tokkona a linnana parawimi barrana Yerikho mono tokkona, takka yidda douda mono rangada parima dommodi. Tauyi yidda ata kada kabunni ne'e lira nage ne kota'. ³ Bage Yosua na siap dugguda ngara dukkada tentarana bada kako ne'e Ai. Yosua na pedeyi touda kabullu rata ata, pahlawan a kullisa, pa patukana bada kako gedde dana. ⁴ Linnadi bana patukadi, 'Pangeddage, kabunniwu ne'e lira nage ne padou. Dou marro kana walina ne'e padou, mono ngettana yemmi ngara dukkami. ⁵ Yauwa mono ngara dukkada ata a palolo dengaga ma barrage ne padou. Ne bada louso kona bada gobba gama, a linnana nettiya, ne yamme ma kiedu. ⁶ Da dieku gama, ga'i ka laikuyi bada ga'ige ne padou. Oronage, ba lidda, 'Da kiedu walina barrada a linnana nettiya'. Ba linna kowe, ma kiedu walina barrada. ⁷ Keddewu walina padou kabunnimu ga'i kou douge ne padou. MUORI, Marobba Allahmu na yagudi ne'e limma danamu. ⁸ Ne bana dekewe ne kota, mi tunnu powe waige api. A linnana ne li'ina MUORI, diekuge! Lolowe, ga'i kei diekuge ne patekkigu' ⁹ Yosua na patukadi bada kako ne'e padou kabunnida mono da dangngi ne'e Betel mono Ai, tuba barat nage Ai. Bage, Yosua na taddo ne'e barrada yidda ata ne gedde. ¹⁰ Kuoka, Yosua na kedde kabu gedde ki'i mono na yiepadi atana. Bage, na kako dugguda yidda rato ata Israel ne'e aroda atana ba sagana Ai. ¹¹ Ngara dukkada tentara atana a diekuni na kkao bada barrage bage da dukki ne'e aro kota. Da rawina karieka ne'e tuba utara Ai, mono ngaba a ne'ena tillu yidda mono Ai. ¹² Yosua na pedeyi limma rata ata mono na tauyi bada kabunni barra Betel mono Ai, tuba barat nage ne padou. ¹³ Na pamadidi yidda atana linnayi : Ngara dukkada tentara ne'edi tuba utara, mono ne dalarada lira tuba barat nage ne padou. Mono, ne gedde Yosua na kako ne'e tillu ngaba. ¹⁴ Na tokko Ai bana ietaya kabu gedde ki'i, ngia mono ngara dukkada atana, yidda ata ne'e kota dana da ngettana bada kako patauna bada gobbadi yidda ata Israel ne'e karape letena bali nage ne tana. Takka, dana padde mage ba wa'i ata a kabunni ne'e lira kota. ¹⁵ Yosua mono ngara dukkada ata Israel da kako mirrika palu lira dadi, bage da kiedu sagana ne'e maredda tingngi dana. ¹⁶ Ngara dukkada ata a wa'ina ne'e kota dana da patukadi ga'i kada ruotiyi ne'e lirada. Yidda ata ruotiyi da diekuni Yosua ga'i ka laikuya bana marroge ne kota. ¹⁷ Da'ima lakka iyya ata a dangngi ne'e Ai mono Betel a idda ruotiyi ata Israel, mono da duddakage ne kota bana mawukkewe ne ba nedi a ruotiyi yidda ata Israel. ¹⁸ MUORI na panewe barrana Yosua, 'Pajuolage ne nobbu a wa'ina limma danamu a sagana Ai, oronage Baku yagudi barramu'. Bage, Yosua na keketawe nobbuna a wa'ina ne'e limma danana tuba Ai. ¹⁹ Yidda ata a kabunni da kedde walina ne'e padouda na Yosua bana pajuolani limmana. Da malle bada tamage ne kota, da dekewe, bage da tunnuwe ne kota waige api. ²⁰ Yidda ata Ai bada gillakage lira, da ietawe ne koto api a penne togo langita. Dada kullisama bada kiedu lakka gie dou, oronage yidda ata a malle ne'e maredda tingngi dana da bali lira bada ruoti baliyi yidda ata a ruotiyi. ²¹ Oronage, na Yosua mono ngara dukkada Israel bada ietayi yidda ata a kabunni bada dekewe ne kota mono ne koto api bana pennewe, da bali lira mono da pamateyi yidda ata Ai. ²² Da lousona yidda waddeka ata Israel walina kota dana bada gobbadi yidda ata Ai, bage da ma ngappeta tillu ata Israel, da pa aro wekkina ni'iya mono da pa aro wekkina ne'eya. Oro a linnana, da pamateyi mono da'ima lakka iyya ata pa ga'ida a muorika. ²³ Takka, tokko Ai da yoppa muorikaya, mono da ngiddiya barrana Yosua. Pata patau a Bo'una. ²⁴ Yidda Ata Israel bada ba pamateyi ngara dukkada ata Ai ne'e padou patau dana oro yidda ata a ruotiyi ne'e maredda tingngi dana, mono ngara dukkada da mate oro mata beddila dukki bada modda kua, bage ngara dukkada ata Israel da bali ne'e Ai mono da tauyi waidi mata beddila. ²⁵ Ngara dukkada ata a mate ne loddo, lakka kabani mono mawinne, wa'idi kabullu duada rata ata, ngara dukkada ata Ai yi. ²⁶ Yosua dana tengngi maya limmana a pajuolana nobbu, dukki ngara dukkada ata Ai bada mate. ²⁷ Takka, ranga da mono douda ne kota da parimadi yidda ata Israel, a linna bana patekkina MUORI papatuka nani Yosua. ²⁸ Yosua na tunnuwe Ai mono na wai padou a pabuduna dukki murri wali murri wali, ne padou a karrana dukki ni'i loddo. ²⁹ Tokko Ai da tieruni ne'e togo wasu dukki mamale. Ne bana tama mata loddo, Yosua na patukana ata ga'i kada paburruni na ata mate walina togo wasu mono ka letoni aro binna kalada kota. Na padedeyi ne'e ponnuna yidda watu kalada papabudu, a wa'ipona dukki ne'eya. Pabacada Tubada Kanurru mono Aura ³⁰ Bage, Yosua na padedeya kabubbu tubana MUORI, Marobba Allah Israel, ne'e togo letena Ebal, ³¹ a linna bana papawedeya Musa, Atana Muori barrada ata Israel, a linnana a matulisa ne'e buku Ukkuna Musa. Ne kabubbu da rawige walina watu pa dapa kasapi, pa dapa wai pogo. ne ponnuna, da yauya na patieba patunnu tubana MUORI mono patieba pamanumara wai. ³² Na tulisayi ne'eya yidda ukkuna Musa ne'e togo watu, patulisa aroda ata Israel. ³³ Ngara dukkada ata Israel, yidda rato, yidda ata a pamadiyi pasukan mono yidda ata paresa da dede balina na tabut, aroda yidda rato walina kabisu Lewi a keketaya na tabut paparasina MUORI. Lakka yidda ata a mai mono ata Israel takka, yidda waddeka da aroge ne letena Ebal, a linnana nettina papatukana Musa, atana MUORI, ga'i ka pamaringiyi yidda ata Israel. ³⁴ Bage, na bacayi ngara dukkada patekki ne'e Hukum Taurat dana, kanurru mono aura, a linnana a matulisa ne'e Kitab Taurat dana. ³⁵ Da'ima lakka iyya patekki papatukana Musa pa dapa bacana Yosua ne'e aroda ngara dukkada ata Israel, mono barrada mawinne mono lakawa mono yidda ata a padieku.