¹ Manga tow matagi belasting bo mangatow kaoroan mahi besi Yesus tanu tumanga be Sia. ² Kawalian momuno’-munod mangatow Parisi bo mangatow bēutehan a torat, kuana : “Sia tumirima mangatow mahaoro bo kuman wakaru-harua i yatahula. ³ Kawalian Sia kumua pangandean yai bēsi yatahula : ⁴ Sisea a nepang kamotahula e mbana matus domba, osa sia katala’an esa domba a’ nepanga, ahi’i mepa’io esiow ngawulu bo siow a’tana kauha’an bo moho mangilah e mbehaureng i oho ahad i kaērēana? ⁵ Bo sa kinaērēanam i pa’na ambao paluhana karua kahi. ⁶ Bo hoamatoho sia ambalē sia maniang mangaharua bo manga kataina kuana besilatahula : mekahi wakaru-haruahu apa’an dombahu e mbehatahula kinaērēakum. ⁷ Siahu kumua bēhomotahula : kēlēaho hahi bako kahahi’in a Sorga apa’an esa tow e matobat, lumēbē-lēbē kahahi’in apa’an siow ngawulu bo siow totumu mauleng bo anhi’i sama kaoroan. ⁸ Suma bene sisei mbana doit sangawulu, bo sa’sia katala’an esa a’nepanga hi’i tumutu sosoloan bo mangakas ambale osa pangilahena bo silihina ahad kaereana. ⁹ Bo sa kinaereana sia maniang mangakaruana bo mangakataina osa kumua: mekahi medoro-roro bo siahu apa’an doitku e mbehatala kinaērēanku. ¹⁰ Ihuahu behomotahula : kēlēwaaho hahi bana kahahi’in a malaikat-malaikat Ningumeled apa’an esa tow kaoroan e matobat. ¹¹ Yesus kumua hahi: “Bana tow mahawata’ dua kedong tuama. ¹² Kua kedong kahadan bēsiwapana : Pa’ iyehenemai beahu bētēng arta sawa i hita e tanu betengku. Osa siwapana mebeteng ka’aya’ana be silatahula. ¹³ Tatahulla nendo oho kedong kahadan jumual pahasa betenga oho osa moho a’ ndo’ong dekang. Bibuli sia maroyal arta betenga oho karua menonow manayo-nayow. ¹⁴ Oras doitna inahawum pahasa, lumembo seseped kalêoan a’suang ndo’ong oho bo sia makelam lengey. ¹⁵ Osa sia moho bo matawoi a patuangen a ndo’ong oho. Tow oho masiu sia ambondoi tanu mahiaha tieina (biagen). ¹⁶ Osa sia mabog kuman tubas pakanen itiei, sumata ahem sisei ange mehe kan besia. ¹⁷ Osa sia makelam ke’ada’anna kuana: ime’em katado’oan tow pawaeran i wapahu melebe-lebes (melipa-lipa) pakanen, sumata siahu biai matem kaleoan. ¹⁸ Siahu mahahelamem moho besi wapahu bo kumua besia: Pa’ siahu mahaorow sa’ang Sorga bo besi wapa. ¹⁹ Siahu hi’i mekele patoton bata i wapa’, tuliden ahu kele tow pahaeran iwapa. ²⁰ Osa sia tumod bo moho besiwapana. Anoras sia a’ ndekape, si wapana imalahem isia, osa atena haeye apa’an beles. Siwapana malolah tumirima i sia, tahua’na bo tumimu’ i sia. ²¹ Kua batana besia : Pa siahu mahaorow sa’ang sorga bo besi wapa, siahu hi’i mekele patoton bata i wapo. ²² Sumata siwapana kumua a mangasosiuna : Titoan pêangen noai juba’ a’ mauleng i wake besia bo suangan sising a’ tunduna bo sapatu a’ naena. ²³ Bo minjo kedong sapi kemel, bēlusa sia bo ayom kita kuman karua kahi. ²⁴ Apa’an bata’ku yai i matēm sa’ta malengem tumou, Sia behatalam sa’ta malengem moai. Osa silatahula mekahi-hahi. ²⁵ Sumata bata’na matua a mbedeng bo a noras sia maleng susutem imbale, sia tumanga enu’ poloit bo katar mala’sih-la’sih (masaē-saē). ²⁶ Osa sia tumiang esa tow sosiuna osa tuma’an besia, asia artina pahasa oho. ²⁷ Sowaten i sosiuna : Tualinu malengem moai bo siwapanu lumusa kedong sapi kemel, apa’an sia tumirima maleng karua mauleng. ²⁸ Kawalian kedong matua oho moborog bo ahi’i sia mabog sumuang. Osa siwapana lumuai bo numu bēsia. ²⁹ Sumata sia kumua bēsi wapana, kuana: Kēlēm kaeto’an ahu maselewir siwapa bo ahi’i ahu mahasa lumawah perēnta wapa, sumata si wapa awē mahasa mēhē esa kēdonga bembe osa makahi-hahi bo manga haruahu. ³⁰ Sumata awē kapui mahi ba’ta iwa’pa e maroya-royal arta kasiha’an wapa wakaru-harua teka bēnē sundal, yanasa si wapa imalusan kedong sapi kemel tanu sisia. ³¹ Kua wapana bēsia : ba’ta ku sihow salalu wakaru-haruahu, bo pahasa sawa i’wapa mekēlēwo sawanu. ³² Lo’oren hita mekahi bo mekahi-hahi apa’an tualinu i’matem sata’ malengem i’ tumou, sia bēhatalam bo malēngem kinaērēan.