¹ A’ nendo i Sabat Yesus moai a mbale’ i nesa Pahalasan i manga tow Farisi i human biboho. Pasaha i molulutai modawa-dawat i Sia mauleng suma ta’pia. ² I mahi esa tow pahadosan a’e’ bo kama i morolembutem tumotod a sasaangeNa. ³ Kua i Yesus a manga beutehan a torot bo manga tow Farisi, kua- Na : “Bo do’na pemaulengan tow a endo i Sabat suma ahii? ⁴ Pahasa bati metetewio. Osa takaa-Na kama tow pahadosan osa iwamauleNga osa iwasiuNa sia mohonem. ⁵ BehuaNa a manga tow : Si sei behomotahula ahii iluai batana suma sapina behasuang a’ pariri, mande a nendo sabat ? ⁶ Silatahula ahii baranei lumawah i Sia. ⁷ Apa’an Yesus milah, awahem manga sahei mongika dumatuh a tampa pasirian, behuaNa ajaraniai besi latahula. ⁸ Sahow beundang a pesta pakawēngan, nai dēhow dumatuh a tampa pasirian, ndesa silatahula imundangem esatow lebe pasirian ndesihow. ⁹ Saniboho sia, imundangm ihomotahula, naam moai osa kumua behow : lehe tampa iai besia. Awahem kaw monokia nde moho dumatuh atampa behen (ambawa). ¹⁰ Sumata sarehow beundang, moho dumatuh atampa behen (ambawa). Mane’ mahawale moai kumua behow : karua ayom dumatuh atampa mauleng. Asakumiboho Sihow tumirima siri’ a sasa’angan i pahasa tamu balina. ¹¹ Awahem pahasa tow matatang imbatangan sisia ambawa bo sisei kênêng batangan, sisia ipa’ amatatang. ¹² Behua i Yesus a tow mawalu i Sia : “Sarehow tuulid pesahei’an endo suma pesaheian bengi, na de how mawalu (mawenot) manga karuanu bo manga sanganah suma sanga waleanu bo manga katainu siha’, apa-apaan silatahula mêbawalasan osa mawalu (mawenot) i how, osahow mahaere suli’ (balas). ¹³ Sumata sarehow tumulid pesaheian, mawalu (mawenot) manga tow lengei, tow da’i bo tow ahii halapang, keleaho tow ahi’i melilah. ¹⁴ Asakumeniaho sihow ênow, nde silatahula alahemoho nawa’awa iwalasna behow. Osa how mahaere balas (suli’) a nendo kinatowan i manga tow mauleng. ¹⁵ Tumanga i kodait i aho a nesa manga sahei kumua besi Yesus : “Mosononoi tow sinahei a Kerajaan Allah. ¹⁶ Sumata kua i Yesus besia: Bana esa tow tumilid pesaheian bako osa sia mawalu (mawenot) tadoo tow. ¹⁷ Pamuna’an pesaheian iwalai, behuana asosiuna ihuamange a manga pinamenot : ayom nde pahasa sinadiam. ¹⁸ Sumata pahasa silatahula kumua ahu mahiapung. Apahamunan kumua besia : siahu itumeleswe bondoi osa mohowe pilahen, pangeleyeku apunganange ahu. ¹⁹ Balina kumua siahu itumeleswē lima par sapi kabiri nde musti moho êpe’an, pangeleyeku apunganange ahu. ²⁰ Balina kumua siahu ihumaroape mio kalianemoho ahi’i ahu matau moai. ²¹ Malengai sosiuna osa behuana pahasa a tuang. Osa moboro tuanga behuana a sosiuna : mapatiro moho a pahasa dalan bo dalan a kota peangenoai manga tow lengēi bo manga tow da’i, tow ahi’i melilah bo manga tow ahi’i halapang. ²² Sosiu lumapor : tuang asia pinereta i tuang belapaikum, sumata banawe tampa. ²³ Behua i tuang a sosiuna : moho andalan bako bo têmbêram osa lesē’ēn manga tow biboho sumuang, nde balēhu hi’i toro satahi’i pulingen. ²⁴ Apa’an ihuaHu behow: Hi’i rona esa tow a’manga tow ê wa’i bēnot kuman pakanen pesahēianku. ²⁵ Asakumeniaho tado’o totumu lululutenange lumas si Yesus a’ ndalaNa. Osa pilaheNa silatahula kuaNa : ²⁶ Sa’esa tow moai bea Hu ahi’i sia mare’e si wapana, si mamana, karoanga, bo manga bata’na, pogna tuama suma bene’, bo kanaluna mio, ahi’i sia mamoali muritKu. ²⁷ Sisei ahi’i mabog maluha i salibna bo lumas si Tuhan, ahi’i sia mamoali murit-Ku. ²⁸ Sisei asakumen i homotahula sa’tumod esa menata ahi’i dumatu’pē osa tumulid bo tumēbē imbaēra ndesa ahii doro doit mawalawug tawoieniaho? ²⁹ Saniboho sabepa’nam daleh sa’ahi’i halawus, osa pahasa tow milah monero’ i sia, ³⁰ Kuanilatahula : tinodemilatahula, sumata ahii ihalawus. ³¹ Osa, kolano sisei moho mapêpang lumawah kolano balina ahi’i dumatuhpe osa tumimbang, kēlēmbosa sangawuluribu tow do’na lumawah duangawuluribu tow ? ³² Sa’ahii, kumirim sosiu, asakumen kasēhēd dekape’ osa tumaan pangebean kosononoian. ³³ Keleaboho esa-esa tow asakumen i homotahula, ahi’i mabog lumepot pahasa sawana, ahii rona mamoali muridku. ³⁴ Asin totu’u mauleng, sumata saaho nasin metawar, kelembisa do’nawe mo’asin? ³⁵ Alanemoho mbaera mauleng ambondoi keleaboho pupuk, betia’na mange moho. Sisei bana talinga tumanga, sarorona tangaannange.