¹ “Si Ahu tud i nanggor e nulit bo si Amang-Ku tapogimanona. ² Tebe i sisina bea-Hu ahii mamua, poroge-Na bo tebe isisina mamua, beresi-Na, saniboho sia mamua tadoo. ³ Kamotahula dali’im beresi nde i Kukua e mbehua-Hu behow. ⁴ Sumondoio be-Ahu bo si-Ahu asuang hamotahula kele mangasisina ahi’i mamua ambatanganamio, sasia hi’i sumondo atud i nanggor, keleahoahi kamotahula ahii mamua, sahamotahula ahii sumondo be-Sia. ⁵ Si-Ahu tut inanggor bo kamotahula mangasisina. Siseiange sumondo be-Ahu, bo si Ahu asuanga, sisia mamua tadoo, nde satahii bo si-Ahu kamotahula ahii matou tumawoi asia mange. ⁶ Siseange ahii sumondo be-Ahu, sisia i tia a luar kele sisina osa mawela, osa sesendu i totumu osa iwasot a suang imbaha osa tutuu. ⁷ Sahele kamotahula sumondo be-Ahu bo Kukua-Hu sumondo behamotahula, pangeleyen asiamange e nihabogugu, bo kamotahula. ⁸ Akelewaaho Amang-Ku parayowen, awaaho sa kamotahula mamua tadoo bo keleahohahi kamotahula manga murit-Ku. ⁹ Keleaho Amang mahales ia-Hu, keleahahahi Ahu mahales ihamotahula sumondoio a suang imbele-Ku hahi. ¹⁰ Sakamotahula makiit i pereta-Hu, kamotahula sumundo asuang imbele-Ku, kele si-Ahu makiit i pereta i NamangKu bo sumondo a suang imbele-Na. ¹¹ Pahasa iaho ihua-Hu behamotahula, saniboho kosononoyai-Ku, a suanga i hamotahula bo bako io kosononoyaku. ¹² Wai pereta-Hu, saniboho kamotahula dahet makahalesan, kele si-Ahu mahales i homotahula. ¹³ Alahem moho beles e lebe wako darape beles i nesa tow i mehe imbatangana tanu mangaharuana. ¹⁴ Kamotahula meleke bokarua-Hu, sahele kamotahula tumulid asia pereta-Hu be homotahula. ¹⁵ Si-Ahu alam tumoto hahi i hamotahula ata/sosiu, nde sasiu ahii mahalah, asia e tinulid i nawona/tuanga, sumata si Ahu tumoto i hamotahula karua, nde si Ahu i humuam behamotahula asiamange e kinataana-Ku a Namang-Ku. ¹⁶ Ahii kamotahula e nisumisia i-Ahu, sumata si Ahu e nisumisir i hamotahula. Bo si-Ahu i tumatu i hamotahula, saniboho kamotahula moho bo mehe bu’a bo bua’nu iaho tatu, saniboho asia e pangeleyen i hamotahula a Namang karua i Ngala-Ku, iehe-Na behow. ¹⁷ Wai pereta-Hu behow: ihalesange mangatow balina.” ¹⁸ Sahele baoitoba mare’e i how, imuneunange awahem sisia pahamuuan i mare’e i-Ahu darape sihow/kamotahula. ¹⁹ Sahelemange kamotahula dali ambaoitoba, tantu baoitoba mahales ihamotahula ke sawana. Sumata apa’an kamotahula ahi’i dali ambaoitoba, sumata si-Ahu enisumisir i hamotahula amaoitoba, awahem ahokawalian baoitoba mare’e i hamotahula. ²⁰ Imunen asia e mbehua-Hu behamotahula: Esatow ata ahiimoho lebe matatang darape tuanga: Darape silatahula imaua-uah ia-Hu, silatahula hahi e maua-uah ihamotahula; sahele silatahula kumiit i kukua-Hu, silatahula hahi kumiit i kodaitnu: ²¹ sumata pahasa iaho maindo tuliden ilatahula behamotahula karengan i ngalai-Ku, nde silatahula ahi’i mahailala i Sia, e nimasiu i-Ahu. ²² Sahelemange si-Ahu ahii moho imoay i mahoda-hodait be silatahula, silatahula tantu ahii i mesea. Sumata silatahula alam mosau-sauna apa-apaan sea ilatahula. ²³ Sisei maree i-Ahu kele mange sia i maree i Namang-Ku. ²⁴ Satahii Ahu ahii itumawoi atutud ilatahula kele ahii tumulid itow walina, silatahula ahem sea. Sumata iai talewe mandewe silatahula imilahem pahasa ibaho, sumata iharee ilatahula Ahu bo Namang-Ku. ²⁵ Sumata kukua e mbewatih a kaol i torat lekewen ilatahula iharee ilatahula Ahu ahem sea. ²⁶ Sumahi e Mahibor a niwasiu-Hu a’Namang moai, waaho kaulitan i monggongguot e mbehe i Namang si Sia moho Sumairi tanu si-Ahu. ²⁷ Sumata i sairi ihamotahula, nde hamotahula pahamunan bewakarua-rua-Hu.