¹ Si Petrus, sosiu i Yesus Kristus, a manga tow tetela behasereb Pontus, Galatia, Kapadokia, Asia Kecil bo Bitinia. ² Wa’i mangatow pinasisir, iwetenaan i taar i Ningumeled, Amang i hita, bo ê mbelênas i Tutuh saniboho moeman be si Yesus Kristus bo tumirima i pinêretan i ndaha’Na. Merotange bêlês kohombo’ bo sononoi ênow melipa-lipa’ behomotahula. ³ Iharayowêm Ningumêlêd bo Amang Ngêlêdtow i hita si Yesus Kristus, ê napa’an i mbêlêsNa ê mbako imaleng imawatow si Yesus Kristus a nepang i tow i mate, a nêsa wênonowan ê mauhuhu i paharawen, ⁴ nde tumirima i mbeteng ê tahi’i hatutus, bo ê tahi’i ro’na samêh bo ahi’i molatoy, bo ipapa a kaumbungan tanu kamotahula. ⁵ Wa’i kamotahula, embeiaha’an a korowotan i Ningumeled awahem kawahemanu karepet masombo i kawiaan a sinadiam e mbeturu anendo mahahad. ⁶ Mobeatêm a sakumên i aho, mandewe iaitalewe kamotahula a noras i musti tumape morowalina seseped. ⁷ Pandung apahasa iboho wai tanu mawaturu ikawahemanu lebe matatang embaera darape emas hi’i telas, e mbeêpe’an katotu’ana imbaha kawalian kamotahula mahaere darayowen bo konungaan bo sisiri a nendo si Yesus Kristus i mbatangaNa. ⁸ Mandewe kamotahula awe imahasa imilah i Sia, sumata kamotahula mahales i Sia. Kamotahula maheman be Sia, mandewe kamotahula iai talewe ahi’i melilah sia. Kamotahula mekahi awahem sononoi enow bo hii hahua. ⁹ Nde hamotahula behoamatem a patahadan kawaheman, waaho lowid kanalunu. ¹⁰ Malowid awaboho sinolusui i nabi-nabi, eni monobuat imbeles bo kohomba tanu kamotahula. ¹¹ Osa silatahula motu’ul kelembisa e pandung i monggongguot. I Kristus, embana be silatahula, waaho monggonguot awe i sumari i pahasa wapomipih i Kristus e pahasa konungaan ilumalas. ¹² Beturum besilatahula, awahem silatahula hii wati isumelewir bati tanu silatahula. Sumata isumelewir apahasa bewahatau behomotahula tanu amonggongguot lenas, embewasiu i na sorga behuai kukua behamotahula, waaho e nihabog manga kiong i Ngeledtou. ¹³ Iboho kawalian sesei emahauteh, mahatuh bo iwai mio osa pahasa maharaw ambeles bo kohomba behet be hamotahula tepo ambeturu i Yesus Kristus. ¹⁴ Tumowe mange kele manga hedong sa makiit sa naam makii a kahaeween i keted e kumuasa i hamotahula a kawodohanu, ¹⁵ sumata mamoali mange hamotahula leno a penonowana kele si Sia e leno, e nitumiang u hamotahula, nde ahu leno, nitumiang i hamotahula, ¹⁶ nde embewatih, leno hamotahul, nde Ahu leno. ¹⁷ Sa hamotahula kumua Sia Amang, waaho sia hii milah i tokia matepu i pahasa tou kelembisa aho tatawoina, osa penonowanu matalo nde hamotahula bati bahaawitaiambaoitoba yai. ¹⁸ Nde kalahan i hamotahula, awahem kamotahula tinuwaranem anggio penonowannu alahem toro embetaro i nawo-nawo bo hii osa perak bo mas. ¹⁹ Karuai ndaha mahal, waaho ndaha i Kristus e mekele bo daha i mbata iNgeledtou ahem e tatah bo ahem daina. ²⁰ Awe embaoitobba pinomia, sinisirem Sia tanu hamotahula, osa-osa sia mawaturu a kahawuan imbaoitoba. ²¹ Nde si Sia kamotahula meman i Ngeledtou, eni mawatow i Sia anesaan i tow imamatem bo irumayowem i Sia saniboho paharawanu bo kawahemanu a Ngeledtou. ²² Nde hamotahula nimawa lenas imbatangannu osa kumiit a kaulitan, osa hamotahula tumulid imbeles a papogan karuai kaenowan inate saniboho kamotahula totu-totuu mahales karuai kaenowan inatenu. ²³ Nde hamotahula malengem itumow ahii sa bibit telas, sumata bibit ahii telas, waaho kukuai Ngeledtou ulit ahad kaeto-eto. ²⁴ Nde pahasa menonow keleitu noho bo pahasa konungaan keleitu noho mamungang, oho mawela, bo bunganga mawela sa dumabas. ²⁵ Sumata kukuai Ngeledtou ulit ahad kaeto-eto” wai kukua behuai kukua behamotahula.