¹ Memo’odope’ kasa se imam-imam kepala ampit se tu’a-tu’a wo se ahli-ahli Taurat wo se minapekasa ne Mahkamah Agama en tabulelengouw em pinaesa’an nea. Nisea se timorongku si Yesus laa o mali-Nisia wo sumarakan-Nisia wia si Pilatus. ² Pilatus si minueiy wia-Nisia: “Nikoo ku’a re’en koo raja ne tou Yahudi?” Wingkot ni Yesus: “Nikoo nuesa koo limila’la nyi’a.” ³ O laa se imam-imam kepala se mina’ayola kelaker en teturean nea wia Nisia. ⁴ Pilatus si minueiy kasi wia-Nisia, pokeiyna: “Koo reiy’ ku’a re’en meela wewingkot? Loo’onouw kumura eng kelakerna em pature nea wia Nikoo!” ⁵ Ta’an si Yesus si kasa mouw reiy’ miningkot, i ka’ayo si Pilatus si mina’erang. ⁶ Minamuali mouw kenaramen kaa laa mewewayala siesa tou niukum witu en susur e nendo wangko’ i ti’i i ki’it em pakiween ne tou kelaker. ⁷ Wo witu e nedo ni’itu wawean siesa tou si mekengaran Barabas si pinenjarala ampit se pirala tou rumerontak walina. Nisea se simiwo mola em pawunu’an witu em parontakan. ⁸ Takar meiy mouw se tou kelaker wo makiwee rio en teakan eng kenaramen i ti’i eng ki’itala kangkasi. ⁹ Pilatus si miningkot nisea wo mueiy: “Sapa ku’a re’en nikouw kouw mepa’arla rio i wayakula si raja ne tou Yahudi i yi’i?” ¹⁰ Nisia si memang mete’u, kaa se imam-imam kepala se simarakanola si Yesus karengan eng kadangkean. ¹¹ Ta’an se imam-imam kepala se minulela se tou kelaker o laa kumiwee rio si Barabasouw si’i wayanala i wee nisea. ¹² Pilatus si mekasape’ kasi mingkot wo mueiy wia nisea: “Sa tuana, sapa ku’a re’en e lewo’ sa reiy’ siwongku ampit sitou patotoren niouw raja ne tou Yahudi i yi’i?” ¹³ Takar nisea se marekeiy kasi, pokeiy nea: “I salibla Sia!” ¹⁴ Laa o lumila’ si Pilatus wia nisea: “Ta’an eng kalewo’an sapa ku’a re’en en siniwo-Na mola?” Ta’an nisea se maka ente’ mola marekeiy: “I salibla Sia!” ¹⁵ Wo karengan si Pilatus si pa’ar mepepa’arla e nate ne tou kelaker i ti’i, sia i wayanala si Barabas i wee nisea. Ta’an si Yesus si siniasana laa o i sarakannala kaa si laa i pesesalibla. ¹⁶ Kamurian se suraro-suraro se minali si Yesus witu eng gorem e istana, nyi’a i ti’i eng gedung paadilan, wo kumeret se minapekasa ne pasukan merur. ¹⁷ Nisea se limabungla eng karaiy buwung wia-Nisia, o mayamla e nesa mahkota tetunean wo meela nyi’a witu natas eng kokong-Na. ¹⁸ Kamurian sea muleiy mawee ormat wia-Nisia, pokeiy nea: “Tabea, heiy raja ne tou Yahudi!” ¹⁹ Nisea se minewee eng kokong-Na ampit en tabelang, wo rumura’la-Nisia wo kumurur sumempe-Nisia. ²⁰ a Nu reiy’ mouw e menero-nero’la Nisia o i rou’ neala eng karaiy buwung i ti’i wia-Nisia wo pakela kasi wia-Nisia e labung-Na. 20b Kamurian si Yesus si niali witu luar kaa si’i pesesalib. ²¹ Witu e nedo ni’itu lumangkoiyouw siesa tou mekengaran Simon, sitou eng Kirene, ama’ ni Aleksander wo ni Rufus, si werukan mineiy waki luar kota, wo sitou i ti’i si paketeran nea mesa’an en salib ni Yesus. ²² Nisea se minali si Yesus waki tampa mekengaran Golgota, e makapenoron: Tampa en Tereuka’. ²³ Laa o sea meela e nanggor sinewok mur wia-Nisia, ta’an Nisia si simede’la nyi’a. ²⁴ Kamurian sea sumalibla Nisia, laa o sea meteng e labung-Na ampit makoba’ witu nyi’a kaa se metetantula e weteng niesa o niesa. ²⁵ E nendo jam sembilan katoroan Sia nu neiy i salibla. ²⁶ Wo e nalasan ka’a Sia niukum en tinotor witu em patikan neiy i wee witu: “Raja ne tou Yahudi”. ²⁷ Mewali-wali ampit Nisia neiy i salibla se rua penyamun, siesa si witu esa nga weka lele’os-Na wo siesa si witu esa nga weka kawii-Na. ²⁸ [ sa tuana lekepouw e nats Alkitab lininga: “Nisia si laa i kareken witu e nelet ne tou-tou durhaka.”] ²⁹ Se tou-tou melangkoiy maname se maojat Nisia, wo eng kasuatan nisea nu makuyungla se meila’: “Heiy Koo si pa’ar mereronga’la em Bait Suci wo pa’ar mereredeiyla nyi’a sumeup witu en telu nga endo, ³⁰ tumumpa momi witu en salib i ti’i wo lawirenola en tou-Mu!” ³¹ Tuanakan kangkasi se imam-imam kepala mewali-wali se ahli Taurat se menero-nero’ wia Nisia witu e nelet nea nuesa wo sea meila’: “Tou walina se linawir-Nala, ta’an en tou-Na nuesa e reiy’ kelawiran-Nala! ³² Le’osouw si Mesias, Raja ne Israel i ti’i, tumumpami witu en salib i ti’i, rio ta lumoo’ wo ma’eman.” Awes tare se rua tou neiy i salibla mewali-wali ampit Nisia se masese’la Nisia kangkasi. ³³ Witu en jam dua belas, kareiydeman en simongkouwi e minapekasa en daerah i ti’i wo minapawee-wee mina’ayo en jam tiga. ³⁴ Wo witu en jam tiga maaleiy mouw si Yesus ampit en suara kaente’: “Eloi, Eloi, lama sabakhtani?”, e makapenoron: Empungku, Empungku, ka’a Koo tumele’ula Niaku? ³⁵ Liminga e ni’itu, se pirala tou rimedeiy witu se limila: “Loo’on, Nisia si makeret si Elia.” ³⁶ Takar meiy mouw siesa tou ampit e wungang karang, sumosouwla nyi’a witu eng gorem e nanggor esem laa o tumude’la nyi’a witu e wa’atang tabelang wo meela si Yesus kumoo’ ma’an limila’: “Le’osouw ta ma’ana’ wo lumoo’ sapa ku’a re’en si Elia si meiy kaa meiy metetumpala Nisia.” ³⁷ Laa o maaleiy mouw si Yesus ampit en suara kasa ente’ wo sumarakanla e nyawa-Na. ³⁸ Katoroan e ni’itu en tabir em Bait Suci minaparua waki atas mina’ayomi rarem. ³⁹ E nedo si kepala pasukan nu rimedeiy minesaruan ampit Nisia si limoo’ eng kinepepate-Na en tuana, o lumila’ mouw sia: “Uli-ulit sitou i yi’i Nisia mouw si Oki’ ni Empung!” ⁴⁰ Wawean kangkasi se pirala wewene se maloo’mi waki wa’akat, witu neletna si Maria Magdalena, si Maria ina’ ni Yakobus Muda wo si Yoses, ma’an si Salome. ⁴¹ Nisea nu waya se kimi’itouw si Yesus wo melayanla-Nisia witu e nedo Nisia nu waki Galilea. Wo wawean kangkasi witu kelaker se wewene walina se mineiy waki Yerusalem mewali-wali ampit si Yesus. ⁴² Kasuatan e ni’itu e nendo mawengi mouw, wo e nendo ni’itu nyi’a mouw e nendo patiro’an, nyi’a i ti’i e nendo melelaa Sabat. ⁴³ Kaa ni’itu si Yusuf, tou Arimatea, siesa anggota Majelis Wangko’ si’i parerio-rerior, nisia kangkasi si mengena-ngena’ eng Keraja’an ni Empung, si mineranila en tou sumaru si Pilatus wo kumiwe e mayat ni Yesus. ⁴⁴ Pilatus si mina’erang katoroan nu limingala kaa si Yesus si minate mouw. Takar sia kumeret si kepala pasukan wo mueiy wia nisia sapa ku’a re’en si Yesus si minate mouw. ⁴⁵ Ni’itu nu liningana mola em peila’la ni kepala pasukan, nisia si pa’ar mineela e mayat i ti’i wia si Yusuf. ⁴⁶ Yusuf tu’u si timeles e roko’ lenan, kamurian sia tumumpala e mayat ni Yesus witu en salib wo kumafanla nyi’a ampit e roko’ lenan i ti’i. Laa o i gholeiynala Sia witu eng gorem eng kubur eng kiniar witu eng gorem eng kuntung watu. Kamurian i wolonnala e nesa watu witu em pepalen eng kubur i ti’i. ⁴⁷ Maria Magdalena wo si Maria ina’ ni Yoses se limoo’ wisa si Yesus neiy i gholeiyla.