¹ Nyi’i mouw eng kinetareani e' nabar leos mekepaare'n tanume si Yesus Kristus, Oki’ ni Empung. ² Tanu neiy i kepatik witu eng kaol ni nabi Yesaya: “Loo’onouw, Niaku ku rimeo si neiy i toke-Ku rumeriorla wia Nikoo, nisia si laa' tumiro’la e lalan i wee-Nikoo; ³ wawean en totor ni tou mengale-ngaleiy waki patar rebet: Tiro’onola e lalan i wee si Epung, rondorenola e lalan i wee-Nisia ⁴ tuana mouw si Yohanes pembaptis nu minapa’atola waki patar rebet wo maaleiyla: “Makedo’ mouw wo i wee mola en toumu baptisen wo si Empung si laa maampungla en kaselokan.” ⁵ Laa o meiy mouw wia nisia se tou-tou waki minapekasa en daerah Yudea wo em baya ne penduduk Yerusalem, wo eng katoroan nisea nu maaku en dosa nea sea baptisen witu en temberan Yordan. ⁶ Yohanes si minake eng karaiy wu’uk ni onta wo ne’ereten kuli’, wo eng kekaanenna se kompo’ wo e madu en talun. ⁷ 7 Nyi’i mouw neiy i abarnala: “Nu reiy’ mouw niaku si laa meiy Nisia si lebe makakuasa ta’an niaku; mewewengkur wo mewewuka’ en tali kasut-Na tu’u niaku ku reiy’ waar. ⁸ 8 Niaku ku mebaptis nikouw ampit en dano, ta’an Nisia si laa maptis nikouw ampit e Roh Kudus.” ⁹ Witu e nedo ni’itu o meiy mouw si Yesus waki Nazaret waki tana’ Galilea, wo Nisia si binaptis ni Yohanes waki temberan Yordan. ¹⁰ Witu eng katoroan Nisia nu rumou’mi waki rano, Sia lumoo’ e langit mina wirang, wo e Roh tanu si burung pombo en timumpa witu natas-Na. ¹¹ Laa o kalinga’anola en totor waki sorga: “Nikoo mouw koo Oki’-Ku neiy-Ku i koupus wia-Nikoo mouw Niaku mepa’ar.” ¹² Makarengan nu reiy’ mouw i tu si Roh si mina'akala Nisia mea waki patar rebet. ¹³ Waki patar rebet i ti’i Nisia si minena’ epat nga pulu’ nga endo eng keurena, neiy i pewa’awa’ ni Iblis. Nisia nu maname si witu e nelet ne tekapen-tekapen siru wo se malaikat-malaikat melayanla Nisia. ¹⁴ Si Yohanes nu sinikopouw meiy mouw si Yesus waki Galilea maabarla e Injil ni Empung, ¹⁵ pokeiy-Na: “Nedona e lekepouw; eng Keraja’an ni Empung en tawi mouw, Makedo’ mouw wo ma’emanouw witu e Injil!” ¹⁶ Katoroan si Yesus nu makelang masusu liliek e lour Galilea, Nisia si limoo’ si Simon wo si Andreas, patuari ni Simon. Nisea se kasuatan mapitarla em puket waki lour, karengan nisea se mememuket sera’. ¹⁷ Yesus si limila wia nisea: “Meiy, kumi’itouw Niaku wo nikouw kouw laa Kusiwonla mememuket tou.” ¹⁸ Laa si Simon wo Andreas sea tu’u makarengan tumele’ula em puket nea wo kumi’itla Nisia. ¹⁹ Wo si Yesus nu minapawee-weela em pakela-kelangan-Na e noki’pe’ kasi, linoo’-Na si Yakobus, oki’ ni Zebedeus, wo si Yohanes, patuarina, se kasuatan matu’utul em puket witu eng gorem e lodeiy. ²⁰ Yesus si makarengan kimeret nisea wo sea tumele’ula si ama’ nea, Zebedeus, witu eng gorem e lodeiy mewali-wali se tou-tou paweeanna tetoro laa o kumi’it Nisia. ²¹ La O Nisea i ka’ayola waki Kapernaum. E nendo Sabat mamuleiy mouw, Yesus si makarengan ghimorem witu eng gorem wale ibadat wo mee teturu’. ²² Nisea se ma’erang malinga em paturu’-Na, karengan Nisia si mawee teturu’ wia nisea tanume sitou makakuasa, reiy’ tanu se ahli-ahli Taurat. ²³ Witu e nedo ni’itu witu eng gorem e wale ibadat i ti’i wawean si esa tou sinelaran ni roh lewo’. Sitou i ti’i si marekeiy: ²⁴ “Sapa e nurusan-Nu ampit nikeiy, heiy Yesus tou Nazaret? Nikoo koo mineiy kaa meiy mepepunengla nikeiy? Niaku ku mete’u seiy Koo: Si Kudus waki si Empung.” ²⁵ Ta’an si Yesus si rimekak nisia pokeiy-Na: “Menes, rumou’ mola wia nisia!” ²⁶ E roh lewo’ i ti’i magho’ogho’ sitou i ti’i, wo eng kasuatan nisia nu marekeiy eng kaente’ palingan o sia rumou’la wia nisia. ²⁷ Nisea nu waya se ma’erang, i ka’ayo nisea se minesesusuiyla nyi’a, pokeiy nea: “Sapa e nyi’i? E nesa teturu’ weru. Nisia si mengila-ngila’ ampit eng kuasa. E roh-roh lewo’ tu’u em pinerenta-Na wo nisea se lale’ wia-Nisia.” ²⁸ Laa o rumangketouw eng karepetna e nabar tanume Nisia waki e reiy’ sa mina’asa ruuna waki e minapekasa Galilea. ²⁹ Kinerere’umi witu e wale ibadat i ti’i Yesus ampit si Yakobus wo si Yohanes se minea waki wale ni Simon wo ni Andreas. ³⁰ Si ina’ manuang ni Simon si neiy i katekel kaa si rara’an minasu’. Nisea se makarengan minakite’ula eng ka’ada’anna wia si Yesus. ³¹ Sia lumalesla en tampa ni wewene i ti’i, wo eng kasuatan timiboiy e lawasna Sia mongkela nisia, laa o mere’ila em pasu’na. Kamurian si wewene i ti’i si melayanla nisea. ³² Melelaa mouw wengi, si endo nu timenemouw, alinomi wia si Yesus em baya se tou peme’itan rumara wo se sinelaran ni setang. ³³ takar muyutouw se minapekasa penduduk eng kota i ti’i witu en sinaru em pepalen. ³⁴ Nisia si lime’osla kelaker tou se peme’itan e minegheghioan rumara wo minure’la kelaker setang: Nisia si reiy’ mineela se setang-setang i ti’i sumusuiy karengan nisea se sumine’u Nisia. ³⁵ Memo’odope’ kasa, e nendo reiydeme’, Sia tumo’or wo mea waki luar. Nisia si minea waki tampa kapenesan wo sumombayang maname. ³⁶ Ta’an si Simon wo se kalo-kalona se timodeiy wia Nisia; ³⁷ eng kinekeka’ato neala Nisia sea lumila’: “Em baya ne tou se menero Nikoo.” ³⁸ Wingkot-Na: “Meiy mouw ta mea waki tampa walina, waki kota-kota minetawian, rio maname kangkasi Niaku ku ma’abarla e Injil, kaa ni’itu Niaku ku mineiy mouw.” ³⁹ Laa o mea mouw Sia waki e minapekasa Galilea wo maabarla e Injil witu e wale-wale ibadat nea wo meure’ se setang-setang. ⁴⁰ Siesa tou rara’an kusta si mineiy wia si Yesus, wo eng katoroan nisia nu kimudu witu en sinaru-Na o sia makisawang-Nisia, pokeiyna: “Sa Koo pa’ar, Nikoo koo toro i te lumenasla niaku.” ⁴¹ Takar i kaoghe mouw e nate-Na kaa en tongkoupusen, laa o Sia mayatla e lawas-Na, o lumelerla si tou i ti’i wo lumila’ wia nisia: “Niaku ku pa’ar, mamuali mouw koo lenas.” ⁴² En toro i te ni’itu kangkasi minere’i mouw e rumara kusta ni tou i ti’i, wo nisia si minalenas. ⁴³ makarengan Sia rumeo sitou i ti’i ampit si kasa ngine’enge’an: ⁴⁴ “Ghenangenouw, te’a mouw koo makite’ula sapa-sapa tanume eng kapualitan i yi’i wia si seiy i te tu’u, ta’an mea mouw, i papa’ato mola en toumu wia se imam wo sumempe mola tanume eng kinalenasannu en sesempean, neiy i perentala ni Musa, tanume em bukti wia nisea.” ⁴⁵ Ta’an sitou i ti’i si minea mabarla e minamuali i ti’i wo rumangketla nyi’a minea wisa-wisa, i ka’ayo si Yesus si reiy’ mouw mete’u kasi mapaloo’-loo’ola megheghorem witu eng kota. Sia mena’ witu luar witu en tampa-tampa kapenesan; ta’an se tou se reiy’ mena’ kangkasi mengeiy wia-Nisia waki e reiy’ sa mina’asa ruuna.