¹ Kamurian ni’itu nu limangkoiy mouw pirala nga endo, witu e nedo kalingalah, si Yesus nu mineiy kasi waki Kapernaum, o rumangketouw e nabar, kaa Nisia si witukan em bale. ² Takar meiy mouw se tou-tou meiy minerur i ka’ayo reiy’ mola kasi si tampa, awes tare witu en sinaru em pepalen reiy’. Kasuatan Sia nu maabarla e nuwu’ wia nisea, ³ wawean se tou-tou mineiy se minali wia-Nisia siesa tou kepor, si winulengan ne epat tou. ⁴ Ta’an nisea se reiy’ mete’u mali nisia wia-Nisia kaa se tou kelaker i ti’i, laa o sea muka’ e natep witu natas-Na ; ni’tu nu mina wuka’ mouw sea tumumpame en tetekelan, en tampa ni tou kepor i ti’i timekel. ⁵ Katoroan si Yesus nu limoo’ e imam nea, o lumila’ mouw Sia wia sitou kepor i ti’i: “Heiy oki’-Ku, en dosamu niampunganouw !” ⁶ Ta’an witu e wawean kangkasi rimuber se pirala ahli Taurat, nisea se megheghenang witu e nate nea: ⁷ “Ka’a sitou i yi’i si meila’ tuana? Nisia si maojat si Empung. Seiy si toro ma’ampungla en dosa sa reiy’ si Empung nuesa?” ⁸ Ta’an si Yesus si makarengan minete’ula witu e nate-Na, kaa nisea se meghena-ghenang en tuana, laa o Sia lumila’ wia nisea: “Ka’a kouw maghena-ghenang en tuana witu e natemu? ⁹ Wisa ku’a re’en eng kasa gampang, lumila’la wia sitou kepor i yi’i: En dosamu niampunganouw, ka’apa lumila’la: Tumo’orouw, poponouw en tetekelannu wo kumelang? ¹⁰ Ta’an rio kouw mete’u, kaa wia eng kaoatan i yi’i si Oki’ ni Tou si kuasa ma’ampungla en dosa” – lumila’ mouw Sia wia sitou pekol i ti’i - : ¹¹ “Wia nikoo Kulumila’la, tumo’orouw, poponouw en tetekelannu wo marengouw waki walemu!” ¹² Wo sitou i ti’i tu’u tumo’or, o makarengan mopo en tetekelanna wo mea waki luar witu en sinaru ne tou-tou i ti’i, i ka’ayo sea nu waya se ma’erang laa o lumo’orla si Empung, pokeiyna: “Tanu e nyi’i reiy’pe’ ma’an mekasa loo’on ta.” ¹³ Nu reiy’ mouw i tu Yesus si minea kasi waki li'lik e lour, wo em baya se tou kelaker se mineiy wia-Nisia laa o Sia tumuru’ nisea. ¹⁴ Kamurian eng katoroan Nisia nu makelang melangkoiy witu, Sia lumoo’ si Lewi oki’ ni Alfeus si rimuber witu em bale cukai laa o Sia lumila’ wia nisia: “Kumi’itouw Niaku!” Takar rumedeiy mouw si Lewi laa o kumi’itla Nisia. ¹⁵ Kamurian eng katoroan si Yesus nu mekaan witu em bale ni tou i ti’i, kelaker se mememurut cukai wo se tou-tou maka'kaselokan mekaan mewali-wali ampit Nisia wo se murid-murid-Na, karengan kelaker se tou kimi’iti Nisia. ¹⁶ Witu e nedo se ahli-ahli Taurat wia se golongan Farisi nu limoo’, kaa Nisia si mekaan ampit se mememurut cukai wo se tou berdosa i ti’i, lumila’ mouw sea wia se murid-murid-Na: “Ka’a Sia si mekaan mewali-wali ampit se mememurut cukai wo se tou berdosa?” ¹⁷ Yesus si liminga nyi’a wo lumila’ wia nisea: “Reiy’ sitou segaya’ si mepadungla mengelot, ta’an sitou rara’an; Niaku ku mineiy reiy’ kaa meiy mekekeret se tou ulit, ta’an i te se tou berdosa.” ¹⁸ Witu e mekasa katoroan se murid-murid ni Yohanes wo se tou-tou Farisi se tare maposo, meiy mouw se tou wo lumila’la wia si Yesus: “Ka’a se murid-murid ni Yohanes wo se murid-murid ne tou Farisi se maposo, ta’an se murid-murid-Mu reiy’?” ¹⁹ Wingkot ni Yesus wia nisea: “Toro ku’a re’en se kalo-kalo ni peredegom se moso kasuatan si peredegom i ti’i si mewali-wali nisea? Eng keurean si peredegom i ti’i mewali-wali nisea, nisea se reiy’ toro moso. ²⁰ Ta’an e nedona e laa meiy si peredegom i ti’i si edoni wia nisea, wo witu mouw e nedo ni’itu nisea se laa moso. ²¹ Reiy’ siesa tou tu’u si kumubarla esa nga kisi’ roko’ reiy’pe’ kimo’okos witu e labung tu’a, karengan sa tuana e roko’ i pakubar i ti’i e laa kumurensang nyi’a, weru e laa kumurensang en tu’a, laa o makasela mouw e wirangna. ²² Tuanakan kangkasi reiy’ siesa tou tu’u si mumpunla e nanggor weru witu eng gorem en sompoiy kuli’ tu’a, karengan sa tuana e nanggor i ti’i e laa mirangla en sompoiy i ti’i, i ka’ayo e nanggor i ti’i wo en sompoiyna marua-rua nyi’a neiy i katea’. Ta’an e nanggor weru satorona en tu’utulan witu en sompoiy weru kangkasi.” ²³ Witu e mekasa, witu e nendo Sabat, Yesus si makelang waki uma gandum, wo eng kasuatan makelang se murid-murid-Na se timipu’ e wulisna eng gandum. ²⁴ Takar pokeiy mouw ne tou-tou Farisi wia-Nisia: “Loo’on! Ka’a nisea se masiwo e reiy’ wee siwon witu e nendo Sabat?” ²⁵ Wingkot-Na wia nisea: “Reiy’pe’ ma’an mekasa ku’a re’en kouw maca sapa en tinuanala ni Daud, katoroan nisia wo nisea se maki’i-ki’it nisia se reiy’ sisapa wo kelalenan, ²⁶ kumura nisia nu ghumorem witu eng gorem e Wale ni Empung witu e nedo si Abyatar nu rimuber tanume si Imam Wangko’ laa o kumaan e roti sesakeiyan i ti’i – e reiy’ mete’u kaanen kacuali se imam-imam – wo mineela nyi’a kangkasi wia se maki’i-ki’it nisia?” ²⁷ Laa o pokeiy ni Yesus wia nisea: “E nendo Sabat en tinuanala i wee se tou wo reiy’ sitou i wee e nendo Sabat, ²⁸ Jadi si Oki’ ni Tou nyi’a mouw kangkasi si Tuhan witu e nendo Sabat.”