¹ Te’a kouw maakimla, rio kouw reiy’ akimen. ² Karengan ampit em paakiman pepaken niouw kaa laa maakimla, nikouw kouw laa akimen wo e nukuran pepaken niouw kaa laa meukur, e laa i ukurla wia nikoo. ³ Ka’a ku’a re’en koo limoo’ e lele’esek witu em beren ni patuarimu, kasuatan em bangin witu eng gorem em berennu e reiy’ kete’uannu? ⁴ Kumura mouw o koo toro lumila’ wia si patuarimu: I waya mola niaku ku rumeu’la e lele’esek i ti’i witu em berennu, e nulitna wawean wangin witu eng gorem em berennu. ⁵ Heiy tou munafik, i reu’ pe’la rior em bangin witu em berennu, takar koo laa lumoo’ maka le’o-le’os sa merere’ula e lele’esek i ti’i witu em beren ni patuarimu.” ⁶ Te’a kouw maweela em barang kudus wia si asu wo te’a kouw melawala e mutiaramu wia si tieiy, rio te’a i pele’e-le’ekna ampit e ne’ana, laa o sia murikiti kumurensang nikoo.” ⁷ Kiweenouw, takar e laa i weela wia nikoo; seronouw, takar kouw laa maka’ato; tumengkorouw; takar em pepalen e laa i wuka’la i wee nikoo. ⁸ Karengan susur tou si makiwee, si weean wo susur tou si masero, si maka’ato wo susur tou si matengkor, wia nisia em pepalen ni’i wuka’la. ⁹ Wawean ku’a re’en siesa tou wia nikouw si mee watu wia si urangna, sa sia makiwee roti, ¹⁰ ka’apa mee leloiy, sa sia makiwee sera’? ¹¹ 11 Jadi sa nikouw nu lewo’ kouw mete’u mawee em pawee le’os wia se urang-urangmu, sapape’ kasi si Ama’mu waki sorga! Nisia si laa meela e le’os wia nisea se makiwee wia-Nisia.” ¹² “E reiy’ sa mina’asa eng kepa’arannula rio siwon ne tou wia nikoo, sumiwo mouw en tuana kangkasi wia nisea. Ni’itu mouw em pumpun e minapekasa nukum Taurat wo eng kaol ne nabi. ¹³ Ghumoremouw tumoro em pepalen peset i ti’i, karengan em penarouw wo em pelasouw e lalan matoro eng kapunengan, wo kelaker tou se maghorem matoro nyi’a; ¹⁴ karengan em pesetouw em pepalen wo kiselouw e lalan matoro witu em patou-touan, wo se toyo’ se tou minatola nyi’a.” ¹⁵ “Mategha-teghamouw wia se nabi-nabi palsu se meiy wia nikoo me’ulu-ulur si domba, ta’an eng kaulitna nisea mouw se serigala lela’. ¹⁶ Waki wu’ana mouw kouw laa sumine’u nisea. Toro ku’a re’en sitou tumipu’ em bu’ana nanggor witu eng kongkom tetunean ka’apa em bu’ana ara witu e rukut tetunean? ¹⁷ Tuana mouw susur e nakana le’os mawua’la wu’ana le’os, ta’an e nakana reiy’ le’os e mawua’la wu’ana reiy’ le’os. ¹⁸ Mamuali ku’a re’en e nakana le’os i ti’i mawua’la wu’ana reiy’ le’os, ka’apa tu’u e nakana reiy’ le’os i ti’i mawua’la wu’ana le’os. ¹⁹ Wo susur e nakana reiy’ mawua’la wu’ana le’os, tantu mouw em pelen wo i terek witu eng gorem e napi. ²⁰ Jadi witu em bu’ana mouw kouw laa sumine’u nisea. ²¹ Reiy’ susur tou si maaleiy wia-Niaku: Tuhan, Tuhan! Si laa ghumorem witu eng gorem eng Keraja’an Sorga, ta’an i te si masiwola eng kepa’aran ni Ama’-Ku waki sorga. ²² Witu e nendo kamurian laker tou se laa maaleiy wia-Niaku: Tuhan, Tuhan, reiy’ ku’a re’en nikeiy keiy mawenti’ karengan e ngaran-Nu, wo matuanala kelaker mujizat karengan e ngaran-Nu kangkasi? ²³ Witu en toro ni’itu mouw Niaku ku laa makaredeiyla wia nisea wo lumila’: Niaku ku reiy’pe’ ma’an mekasa sumine’u nikouw! Rumou’ mola wia-Niaku, nikouw nu waya si meneniwo eng kalewo’an!” ²⁴ “Susur tou si liminga em patotor-Ku i yi’i wo matuanala nyi’a, nisia si masuat ampit sitou sama’, si rimedeiyla em balena witu natas em batu. ²⁵ Kamurian tumumpa mouw e naro wo meiy mouw en songker, laa o toroni e reghes em bale i ti’i, ta’an em bale i ti’i e reiy’ rimonga’ karengan neiy i redeiy witu natas em batu. ²⁶ Ta’an susur tou si liminga em patotor-Ku i yi’i wo si reiy’ matuanala nyi’a, nisia si masuat ampit sitou we’engel, si rimedeiyla em balena witu neris. ²⁷ Kamurian tumumpa mouw e naro wo meiy mouw en songker, laa o toroni e reghes em bale i ti’i, i ka’ayo i karonga’la em bale i ti’i wo eng kasa hebat ee pasil e minateri.” ²⁸ Wo nu reiy’ mouw si Yesus nu kimawusla e lelila’an i yi’i, ma’erangouw se tou kelaker i ti’i liminga en teturu-Na, ²⁹ karengan Nisia si mawee teturu’ wia nisea tanu sitou maka kuasa, reiy’ tanu se ahli-ahli Taurat nea.