¹ “Ghenangenola, te’a kouw matuanala eng kewajiban agamamu witu en sinaru ne tou o rio loo’on nea, karengan satuana, kouw reiy’ maka’ato tetoro wia si Ama’mu waki sorga. ² Jadi sakawisa koo meela esa nga wuntul, te’a mouw koo maabarla eng kapualitan i ti’i, tanu en tinuanala ni tou munafik witu e wale-wale ibadat wo witu e lorong-lorong, rio sea lo’oren ne tou. Niaku ku lumila’me wia nikoo: Eng kaulitna nisea se minaka’ato mouw en tetoro nea. ³ Ta’an sa koo mawee esa nga wuntul, te’a mouw kakete’uan e lawas kawiimu sapa en siniwola e lawas lele’osmu. ⁴ Satorona esa nga wuntulmu i ti’i ni’i weela makiro-kirong, takar si Ama’mu si limoo’ neiy i kakirong si laa sumuli’la nyi’a wia nikoo.” ⁵ “Wo sakawisa kouw sumombayang, te’a mouw kouw sumombayang tanu se tou munafik. Nisea se pa’ar matotorla en sesombayangen nea ampit rimedeiy witu eng gorem e wale-wale ibadat wo witu eng kaengkolan-kaengkolan e lalan wangko’, rio sea loo’on ne tou. Niaku ku lumila’me wia nikoo: Eng kaulitna nisea se minaka’ato mouw en tetoro nea. ⁶ Ta’an sa koo sumombayang, ghumoremouw witu eng gorem eng kamarmu, kusi’in em pepalen wo sumombayangouw wia si Ama’mu waki tampa neiy i kakirong. Takar si Ama’mu si limoo’ neiy i kakirong si laa sumuli’la nyi’a wia nikoo. ⁷ Awes kangkasi witu en sesombayangennu i ti’i te’a mouw koo i kawero-werot tanu eng kenaramen ne tou reiy’ sumine’u si Empung. Pokeiy nea karengan eng kelakerna en tetotoren en sesombayangenna eng kale’ele’an. ⁸ Jadi te’a mouw kouw tanu nisea, karengan si Ama’mu si mete’u sapa em pemandungennu, nu reiy'pe’ kouw kimiwee wia-Nisia. ⁹ Kaa ni’itu sumombayangouw tuana: Ama’ meiy waki sorga Kinudusola e ngaran-Nu, ¹⁰ meiy mouw eng Keraja’an-Nu mamuali mouw eng kepa’aran-Nu wia em bumi tanukan waki sorga. ¹¹ Weeani’itemi keiy wia e nendo i yi’i kekaanen neiy esa nga wuntul ¹² wo ampunganola keiy witu eng kaselokan neiy, tanu nikeiy kangkasi ma’ampungla sitou simelokola wia nikeiy; ¹³ wo te’a mouw pa’alin nikeiy witu eng gorem em pewa’awa’an, ta’an liseiy i tela keiy wia si lewo’ [Karengan Nikoo mouw si makapunya eng Keraja’an wo eng kuasa wo eng kamulia’an i ka’ayo eng keure-urena. Amin] ¹⁴ Karengan sa wona’ kouw ma’ampungla eng kaselokan ni tou, si Ama’mu waki sorga si laa ma’ampungla nikoo kangkasi. ¹⁵ Ta’an sa kouw reiy’ ma’ampungla sitou, si Ama’mu kangkasi si reiy’ laa ma’ampungla eng kaselokannu.” ¹⁶ “Wo sakawisa kouw maposo, te’a mouw tedur eng giomu tanu sitou munafik. Nisea se maseup eng gio nea, rio se tou se lumoo’ kaa nisea se maposo. Niaku ku lumila’me wia nikoo: Eng kaulitna nisea se minaka’ato mouw en tetoro nea. ¹⁷ Ta’an sakawisa koo maposo, lananola eng kokongmu wo rumi’amusola, ¹⁸ rio te’a loo’on ne tou kaa nikoo koo maposo, ta’an i te si Ama’mu waki tampa neiy i kakirong. Takar si Ama’ mu si limoo’ neiy i kakirong si laa sumuli’la ny’a wia nikoo.” ¹⁹ “Te’a mouw kouw maerurla eng harta wia em bumi; wia em bumi se wu’uwuk wo eng karat en tumerila nyi’a wo si rongkit si ghumoghar ampit rumongkit nyi’a. ²⁰ Ta’an erurenola i wee nikoo eng harta waki sorga; waki sorga se wu’uwuk wo eng karat se reiy’ tumeri nyi’a wo si rongkit si reiy’ ghumoghar ampit rumongkit nyi’a. ²¹ Karengan wisa eng hartamu witu, witu kangkasi e natemu witu. ²² Weren nyi’a mouw en solo e nouwak. Sa em berennu le’os, terangouw e minapekasa nouwakmu; ²³ sa em berennu lewo’, reiydemouw e minapekasa nouwakmu. Jadi sa en terang wia nikoo e reiydem, kumura eng kareiydemna eng kareiydeman i ti’i. ²⁴ Reiy’ siesa tou tu’u si toro lumukar wia se rua tuang. Karengan satuana, nisia si laa mari’irisla siesa wo meupusla se walina, ka’apa nisia si laa lale’ wia siesa wo reiy’ malo’orla se walina. Nikouw kouw reiy’ toro lumukar wia si Empung wo wia si Mamon.” ²⁵ “Kaa ni’itu Niaku ku lumila’me wia nikoo: Te’a mouw lieiy witu em patou-touannu, sa sapa em pekekaanennu wo em pekekoo’on, wo te’a mouw lieiy kangkasi witu e nouwakmu, sa sapa e laa labungennu. Reiy’ ku’a re’en em patou-touan i ti’i ni’i paketa-ketare ta’an eng kekaanen wo e nouwak i ti’i ni’i paketa-ketare ta’an e lelabungen? ²⁶ Tu’usanouw se burung-burung waki langit, se reiy’ makeror wo reiy’ meupu’ wo reiy’ maerurla walun witu lumbung, ta’an wineean kumaan ni Ama’mu waki sorga. Reiy’ ku’a re’en nikouw kouw wa’akat lumantouwla se burung-burung i ti’i? ²⁷ Seiy ku’a re’en si witu e nelet miouw kaa eng kalieiyanna en toro mawesla ma’an esa hasta i te witu e lalan em patou-touanna? ²⁸ Wo ka’a kouw lieiy witu e lelabungen? Weeanola ghenang e wungang bakung waki uma, en timou reiy’ mina’ayang wo reiy’ limuwir, ²⁹ ta’an Niaku ku lumila’me wia nikoo: Salomo witu e reiy’ sa mina’asa kamega’anna tu’u si reiy’ minake tanu eng kewangun e meta’asa’an wia se wungang i ti’i. ³⁰ Jadi satuana Empung si simudeiyla e rukut waki uma, e nendo i yi’i wia wo wo’odo ni’i tea’ witu eng gorem e napi, reiy’ ku’a re’en Nisia si laa kasa kasi sumudeiyla nikoo, heiy tou reiy’ kasa ma’eman? ³¹ Kaa ni’itu te’a mouw kouw lieiy wo lumila’: Sapa ku’a re’en e laa kaanen neiy? Sapa ku’a re’en e laa koo’on neiy? Sapa ku’a re’en e laa paken neiy? ³² Em baya ni’itu em peneron ne bangsa-bangsa reiy’ sumine’u si Empung. Ta’an si Ama’mu waki sorga si mete’u, kaa nikouw kouw mepadungla em baya nyi’a i ti’i. ³³ Ta’an serone’la ketare eng Keraja’an ni Empung wo eng kaulitanna, takar em baya nyi’a i ti’i e laa i awesla wia nikoo. ³⁴ Kaa ni’itu te’a mouw kouw lieiy e nendo wo’odo, karengan e nendo wo’odo maka kasusa’anna nuesa. Kasusa’an esa nga endo awesouw esa nga endo.”