¹ Kelaker tou se mine’inakutola mereransun e nesa abar tanume em peristiwa-peristiwa minamuali mola witu e nelet ta, ² en tanu neiy i pa’ayo neala wia nikita, waki ketareanna nyi’a mouw se sairi mineren wo se pelayan e nuwu’. ³ Kaa ni’itu, niaku ku simoisapola e reiy’ sa mina’asa peristiwa i ti’i maka le’o-le’os waki asal eng ketareanna, niaku ku minedola kaputusan kaa laa mebebuukla nyi’a pakale’osen i wee nikoo, ⁴ rio koo toro mete’ula, kaa e reiy’ sa mina’asa wo’o sapa neiy i turu’la wia nikoo e nuli-ulit ulit. ⁵ Witu en zaman ni Herodes, raja Yudea, wawean siesa imam mekengaran Zakharia wia se rombongan Abia. Si ka’awuna kangkasi si asal wia se see’ ni Harun, ngaranna Elisabet. ⁶ Nisea nu rua se ulit witu en sinaru ni Empung wo matou-tou maki’it e reiy’ sa mina’asa perenta wo eng katataapan ni Tuhan ampit e reiy’ si walulang. ⁷ Ta’an nisea se reiy’la si oki’, karengan si Elisabet si mandul wo nisea nu rua se langkoiy mouw e numurna. ⁸ Witu mekasa, e nedo i ka’ayola em pontol ne rombonganna, Zakharia si timuanala e lukar ka’imaman witu en sinaru ni Tuhan. ⁹ Karengan eng katoroan ni onde, kumura eng kenaramen, sa metetantula si imam melelukar, nisia mouw si tinu’udek laa ghumorem witu eng gorem em Bait Suci wo tumunu e nukupan witu. ¹⁰ Kasuatan e ni’itu se minapekasa umat se minerur witu luar wo sumombayang. E nedo ni’itu nyi’a mouw e nedo patunuan e nukupan. ¹¹ Takar mapa’ato mouw wia si Zakharia siesa malaikat ni Tuhan si rimedeiy witu esa nga weka lele’os em patunuan ukupan. ¹² Limoo’ eng kapualitan i ti’i sia i kasenge’ wo mineide’. ¹³ Ta’an si malaikat i ti’i si limila’ wia nisia: “Te’a meide’, heiy Zakharia, karengan en sombayangmu e line’ele’ala wo si Elisabet, ka’awumu, si laa tumimea’la siesa oki’ tuama i wee nikoo wo lewo’ sa reiy’ mouw koo ngumaranla nisia Yohanes. ¹⁴ Nikoo koo laa mepa’a-pa’ar wo lumaya’, awesla laker tou se laa mepa’a-pa’ar witu eng katouanna i ti’i. ¹⁵ Karengan nisia si laa mewangko’ witu en sinaru ni Tuhan wo nisia si reiy’ laa kumoo’ anggor ka’apa eng kekoo’on menoek wo nisia si laa mawuta ampit e Roh Kudus muleiymi waki rahim ni ina’na; ¹⁶ nisia si laa sumiwo laker se tou Israel marengi wia si Tuhan, Empung nea, ¹⁷ wo nisia si laa kumelang rumeriorla si Tuhan witu e Roh wo eng kuasa ni Elia kaa laa mesesiwo e nate ne ama’-ama’ murikit wia se oki-oki’na wo e nate ne tou-tou durhaka witu eng genang ne tou-tou ulit wo ampit en tuana metetiro’la i wee si Tuhan esa umat se waar wia-Nisia.” ¹⁸ Laa o pokeiy ni Zakaria wia si malaikat i ti’i: “Kumura mouw kakete’uangku, kaa eng kapualitan i yi’i e laa mamuali? Karengan niaku ku tu’a mouw wo si ka’awuku langkoiy mouw e numurna.” ¹⁹ Wingkot ni malaikat i ti’i wia nisia: “Niaku mouw ku Gabriel melayanla si Empung wo niaku ku neiy mouw i tokemi kaa meiy mesesusuiy ampit nikoo wo kaa meiy ma’ayola e nabar le’os i yi’i wia nikoo. ²⁰ Eng kaulitna nikoo koo laa mawowo’ wo reiy’ mete’u matoto-totor i ka’ayola witu e nendo, witu wisa em baya nyi’a i yi’i mamuali, karengan nikoo koo reiy’ ma’eman witu e lelila’angku laa pakaloo’o-loo’on eng kaulitanna witu e nedona.” ²¹ Kasuatan e ni’itu se tou kelaker se mengena-ngena’ si Zakharia. Nisea se mina’erang, kaa nisia si tuana eng keure witu eng gorem em Bait Suci. ²² Katoroan nisia nu rumou’mi, nisia si reiy’ mouw mete’u matoto-totor wia nisea wo mangarti mouw sea, kaa nisia si limoo’ mouw e nesa pineleloo’ witu eng gorem em Bait Suci. Laa o sia matudu-tudu’ wia nisea, karengan nisia si minena’ wowo’. ²³ Katoroan simampetouw eng kelabotan e nedo lukar jabatanna, sia mareng waki wale. ²⁴ Reiy’ ure kamurian si Elisabet, ka’awuna, gumandong wo eng keurean lima nga sumedot nisia si reiy’ minapa’atola en tou, pokeiyna: ²⁵ “Nyi’i mouw e nesa pasiwo-siwon ni Tuhan wia niaku, wo en teakan Nisia si minepa’ar merere’ila e nirangku witu en sinaru ne tou.” ²⁶ Witu en sumedot ka enem Empung si rimeo si malaikat Gabriel mea waki e nesa kota mekengaran Nazaret, ²⁷ wia siesa reraa si matunangan ampit siesa tou mekengaran Yusuf wia se me’urang ni Daud; ngaran ni reraa i ti’i Maria. ²⁸ Katoroan si malaikat i ti’i nu ghumoremla witu em bale ni Maria, sia lumila’: “Tabea, heiy koo si kinaruniala, Tuhan si rimapit nikoo.” ²⁹ Maria si neiy i kasenge’ liminga en tetotoren i ti’i, laa o mueiy witu eng gorem e natena, sapa ku’a re’en em penoron en tabea i ti’i. ³⁰ Pokeiy ni malaikat i ti’i wia nisia: “Te’a meide’, heiy Maria, karengan nikoo koo minaka’ato e nupus karunia witu en sinaru ni Empung. ³¹ Eng kaulitna nikoo koo laa gumandong wo laa tumimea’la siesa oki’ tuama wo satorona nikoo koo ngumaranla Nisia Yesus. ³² Sia si laa mewangko’ wo laa totoren Oki’ ni Empung Si Kasarakek. Wo Si Empung Tuhan si laa kumaruniala wia-Nisia en takhta Daud, ama’ ne opo’-Na, ³³ wo Nisia si laa mamuali raja wia se kaum see’ ni Yakub i ka’ayo reiy’ siniakaran wo eng Keraja’an-Na e reiy’ si kinesampetan.” ³⁴ Pokeiy ni Maria wia si malaikat i ti’i: “Kumura eng kapualitan i ti’i o wona’ mamuali, karengan niaku ku reiy’pe’la si ka’awu?“ ³⁵ Wingkot ni malaikat i ti’i wia nisia: “Roh Kudus e laa tumumpa wia nikoo wo eng kuasa ni Empung Si Kasarakek e laa tumerungla nikoo; kaa ni’itu sioki’ i laa patoumula i ti’i si laa totoren kudus, Oki’ ni Empung. ³⁶ Wo eng kaulitna, si Elisabet, kawanuamu i ti’i, sia kangkasi si megandong siesa oki’ tuama witu e nendo katua’anna wo e nyi’i mouw en sumedot ka enem wia nisia, si patotoren mandul i ti’i. ³⁷ Karengan wia si Empung reiy’la si mustahil.” ³⁸ Pokeiy ni Maria: “Eng kaulitna niaku i yi’i ku hamba ni Tuhan; mamuali mouw wia niaku i ki’it em patotormu i ti’i.” O laa si malaikat i ti’i tumele’ula nisia. ³⁹ Em pira mola tempo kamurian mae mouw si Maria wo mapawee-wee kimelang waki kakuntungan matorome e nesa kota waki Yehuda. ⁴⁰ Witula sia ghumorem witu em bale ni Zakharia wo mee tabea wia si Elisabet. ⁴¹ Wo eng katoroan si Elisabet nu liminga en tabea ni Maria, kumompo’ mouw sioki’ witu eng gorem e rahimna wo si Elisabet tu’u si mina wuta ampit e Roh Kudus, ⁴² laa o sia maaleiy eng kalegu’: “Binerkatola nikoo witu nelet em baya ne wewene wo binerkatola em bu’ana e rahimmu. ⁴³ Seiy ku’a re’en niaku i yi’i i ka’ayo si ina’ ni Tuhanku si mineiy limalesi niaku? ⁴⁴ Karengan eng kaulitna, katoroan en tabeamu nu mina’ayo witu en talingaku, sioki’ witu eng gorem e rahimku si kimompo’ mepa’a-pa’ar. ⁴⁵ Wo ma’aruiyola sia, si mina’emanola, karengan sapa neiy i lila’la wia nisia e waki si Tuhan, e laa katuana’anla.” ⁴⁶ Laa o pokeiy ni Maria: “Imukurku malo’orla si Tuhan, ⁴⁷ wo nateku melaya-laya’ karengan si Empung, si Lumelawirku, ⁴⁸ karengan Nisia si minee mola ghenang eng kakumengan ni hamba-Na. Eng kaulitna, muleiy i temi en teakan se reiy’ sa mina’asa see’ se laa tumotor niaku mina’aruiy, ⁴⁹ karengan Si Kasakuasa si timuana mola em pasiwo-siwon – pasiwo-siwon wangko’ wia niaku wo e ngaran-Na nyi’a mouw eng kudus. ⁵⁰ Wo e rahmat-Na matumpa wia se tou meide’ Nisia. ⁵¹ Nisia si minapaloo’ola eng kuasa-Na ampit em pasiwo-siwon e lawas-Na wo timabuke’isla se tou-tou tingkeiy e natena; ⁵² Nisia si tumumpala se tou-tou makakuasa witu en takhta nea wo rumakekla se tou-tou kumeng; ⁵³ Nisia si simani’la e reiy’ sa mina’asa e le’os wia se tou maarem, wo rumeo se tou kaya mea ampit e lawas memayos; ⁵⁴ Nisia si timulung si Israel, hamba-Na, karengan Nisia si ghimenang e rahmat-Na, ⁵⁵ tanu neiy i ta’ar-Nala wia se nene moyang ta, wia si Abraham wo se see’na i wee eng keure-urena.” ⁵⁶ Wo si Maria si minena’ wo’o wona’ telu nga sumedot eng keurena mewali-wali ampit si Elisabet, laa o mareng sumeup waki walena. ⁵⁷ Kamurian lekepouw en sumedotna i wee si Elisabet kaa laa metetimea’ wo sia tu’u tumimea’la siesa oki’ tuama. ⁵⁸ Katoroan se ketana’-ketana’na ma’an se kawanua patuarina se liminga, kaa si Tuhan si minapa’ato mola e rahmat-Na tuana eng kewangko’ wia nisia, mepa’a-pa’arouw sea mewali-wali ampit nisia. ⁵⁹ Takar meiy mouw sea witu e nendo kauwalu kaa meiy mesesunatla sioki’ i ti’i wo nisea se mengengaranla nisia Zakharia i ki’it e ngaran ni ama’na, ⁶⁰ ta’an si ina’na si limila”: “Tea’, nisia si lewo’ sa reiy’ ngaranan Yohanes.” ⁶¹ Pokeiy nea wia nisia: “Reiy’la si witu e nelet ne kawanua patuarimu si mekengaran tuana.” ⁶² Laa o sea matudu-tudu’ wia si ama’na kaa mewewueiy, e ngaran sapa ni’i peweweenala wia sioki’na i ti’i. ⁶³ Sia kumiwee watu pepatikan, laa o matikla e lelila’an-lelila’an i yi’i: “Ngaranna nyi’a mouw e Yohanes.” Wo sea tu’u ma’erang em baya nea. ⁶⁴ Wo en toro i te ni’itu kangkasi minawuka’ mola en sumana wo i kewaya mola e lila’na, laa o sia melila-lila’ wo malo’or si Empung. ⁶⁵ Takar kineide’anouw em baya ne tou se maena’ witu eng kaledongna, wo e reiy’ sa mina’asa minamualila i ti’i e minamuali penoto-notoren waki minapekasa kakuntungan Yudea. ⁶⁶ Wo em baya ne tou, se liminga nyi’a, se meghena-ghenang nyi’a wo lumila’: “Mamuali sapa ku’a re’en sioki’ i yi’i ee sangari?” Karengan e lawas ni Tuhan rimapit nisia. ⁶⁷ Wo si Zakharia, ama’na, si minawuta ampit e Roh Kudus, laa o sia mawenti’, pokeiyna: ⁶⁸ “Lo’orenouw si Tuhan, Empung ni Israel, karengan Nisia si limalesi se umat-Na wo mali eng kaliseiyan wia nisea, ⁶⁹ Nisia si timeula e nesa sunge kelawiran i wee nikita witu en see’ ni Daud, si hamba-Na i ti’i, ⁷⁰ – En tanu neiy mouw i nuwu’-Nala rengane’ em purbakala kaa en suma ne nabi-nabi-Na kudus – ⁷¹ kaa laa merereta’mi nikita waki se kesaru-kesaru ta wo witu e lawas em baya ne tou mari’iris nikita, ⁷² kaa laa mapa’atola e rahmat-Na wia se nene moyang ta wo ghumenang en teta’aran-Na kudus, ⁷³ nyi’a i ti’i en tiwa’ neiy i totor-Nala wia si Abraham, ama’ ne opo’ ta, kaa Nisia si kimaruniala nikita, ⁷⁴ rio kita, i kareu’mi witu e lawas ne kesaru, o toro meraghesla wia-Nisia reiy’la si ide’, ⁷⁵ witu eng kakudusan wo eng kaulitan witu en sinaru-Na esa nga umur em patou-touan ta. ⁷⁶ Wo nikoo, heiy oki’ku, koo laa totoren nabi ni Empung Si Kasarakek; karengan nikoo koo laa kumelang rumeriorla si Tuhan kaa laa metetiro’la e lalan i wee-Nisia, ⁷⁷ kaa laa meweweela wia se umat-Na em pangartian lumaa eng kelawiran tumo’otolela witu em paampungan en dosa-dosa nea, ⁷⁸ karengan e rahmat wo en tongkoupusen waki si Empung ta, ampit e wisa Sia laa lumales nikita, Siendo memo’odo waki e tampa rakek, ⁷⁹ kaa laa meteterangla nisea se maena’ witu eng kareiydeman wo witu en tinerungan e maut kaa laa mapatorola e ne’a ta witu e lalan dame sejahtera.” ⁸⁰ Sapa tare sioki’ i ti’i si maawes eng kasela wo maka ente’ mola e rohna. Wo nisia si maena’ waki padang gurun i ka’ayo witu e nendo nisia nu lewo’ sa reiy mapa’atola en tou wia si Israel.