¹ Te’a mouw koo kete wia se tou tu’a, ta’an i te togorenouw sia tanume si ama’. Togorenouw se tou-tou muda tanume se patuarimu, ² se wewene-wewene tu’a tanume si ina’ wo se wewene-wewene muda tanume se tuarimu ampit e wuta kamurnian. ³ Ormatela se balu-balu se uli-ulit balu. ⁴ Ta’an sa siesa balu si makapunya oki’ ka’apa puyun, satorona nisea i ti’i ketare-tare se ma’ajar lumukar wia se kaum ne me’urangna nuesa wo sumuli’ em budi ne tu’a wo ne nene nea, kaa ni’itu mouw e mekepa’aren wia si Empung. ⁵ Kasuatan siesa balu si uli-ulit balu, si neiy i tele’ula maesa-esa, si minee e narapanna wia si Empung wo si timentem witu em pengiween wo en sesombayangen oat o wengi. ⁶ Ta’an siesa balu matou-tou mewah wo si kasa mouw lebe, nisia si minate mouw nu matou-toupe’. ⁷ I nge’enge’ mola eng kapualitan-kapualitan i yi’i kangkasi wia se balu-balu i ti’i rio sea tumou ampit e reiy’ si sering. ⁸ Ta’an sa wawean siesa tou si reiy’ mapiarala se kawanua patuarina, sapape’ kasi se esa nga pumpun em balena, sitou i ti’i si murtad wo si lumantouwla eng kawuruk wia se tou reiy’ maka iman. ⁹ Se neiy i patikla tanume se balu, nisea i te se reiy’ minawa’mi waki enem nga pulu’ nge te’un, se mekasa i te maka tu’atuama ¹⁰ wo se niato-ato mola matuanala em pepa’ayangen e le’os, tanu e meurus se oki’, mawee tete’upan, maoas e ne’a ne patuari-patuari esa nga iman, matulung se tou matou-tou witu eng kase’esekan – e nulitna nisea se minake mola e reiy’ sa mina’asa eng kalempotan kaa laa mesesiwo le’os. ¹¹ I sede’ mouw em pepatikan se balu-balu lebe muda. Karengan sakawisa sea mekasa sineritla eng kabirahian en tuma’atasla nisea waki si Kristus, nisea i ti’i se pa’ar kumaweng ¹² wo ampit kumelongla eng kelale’an nea eng ketarean wia-Nisia, nisea se minapa eiy e nukuman witu en tou nea. ¹³ Awes kangkasi ampit kumaluar ghumorem em bale ne tou, nisea se nimaramla en tou memala-malas wo riy’ kaa e memala-malas i te, ta’an kangkasi merawi-rawit wo menewok-newokla eng kapoongan ne tou walina wo meila’la eng kapualitan-kapualitan reiy’ waar. ¹⁴ Kaa ni’itu niaku ku pa’ar se balu-balu muda se kumawenge’ kasi, maka’ato oki’, ma’aka-aka e rumah tanggana wo te’a mawee to’otolan wia si kesaru kaa laa memuru-murukla e ngaran ta. ¹⁵ Karengan se pirala balu se neiy mouw i kaseip kimi’it si Iblis. ¹⁶ Sa siesa tuama ka’apa wewene ma’eman si makapunyala weteng me’urang balu, satorona sia si sumawang nisia i ka’ayo sia te’a mamuali pemesa’anen wia se jema’at. Ampit en tuana se jema’at se toro sumawang nisia nu uli-ulit balu. ¹⁷ Penatua-penatua se le’os em pa’aka-aka’anna se waar pa’ormaten maka rua lumepet, i paketa-ketare nisea se ampit e mengente’ me’ulit makhotbah wo mawee teturu’. ¹⁸ Reiy’ ku’a re’en eng Kaol Suci e limila’: “Te’a mouw koo metetongko’esem en suma ni sapi si kasuatan meirik,” wo kasi, “siesa tou memema’ayang si waar maka’ato en tetorona.” ¹⁹ Te’a mouw koo mesesungkul en teturean wia siesa penatua kacuali koo dinukung ne rua ka’apa telu tou sairi. ²⁰ Nisea se masiwo en dosa satorona se togorennu witu en sinaru em baya ne tou rio se walina i ti’i tu’u se meide’. ²¹ Witu en sinaru ni Empung wo ni Kristus Yesus wo ne malaikat-malaikat pineleng-Na ni’i owerkula ampit e makauli-ulit wia nikoo: ghenangenola en teturu’ i yi’i reiy’ ampit em papokeiyla wo minta’ mouw witu e reiy’ sa mina’asa wo’o sapa reiy’ ampit e mesangaweka. ²² Te’a mouw koo matuyu-tuyu tume’upla e lawas witu siesa tou wo te’a mouw ka’alian witu en dosa ne tou walina. Tayuranouw eng kamurnian en toumu. ²⁴ En dosa ne pirala tou en timeroa’, tanu mokan e mareriorla nisea mea waki paadilan, ta’an en dosa ne pirala tou kasi en tare mouw i te pakaloo’o-loo’ola eng kamurian. ²⁵ Tuana mouw tu’u em pasiwo-siwon e le’os i ti’i e makarengan pakaloo’o-loo’ola wo sa reiy’ tuana, nisia si reiy’ mete’u mapawee-wee minena-ena’ neiy i kakirong.