¹ Ta’an e Roh ampit e ledos limila’la kaa witu e nedo-nedo kamurian, wawean tou si laa mamurtad laa o kumi’itla e roh-roh sumeseip wo en teturu’ ne setang-setang ² kaa e le’ekok ponge’ ne menenowo-menenowo e nate nuranina minakela en cap nea. ³ nisea i ti’i se mepalouw sitou kumaweng, mepalouw sitou kumaan eng kekaanen siniwola ni Empung rio ampit em patotoran syukur eng kaanela ne tou ma’eman wo se simine’u mouw eng kaulitan. ⁴ Karengan em baya en siniwola ni Empung i ti’i e le’os wo e nesa tu’u reiy’la si haram, sa sungkulen ampit em patotoran syukur, ⁵ karengan em baya nyi’a i ti’i eng kinudusla e nuwu’ ni Empung wo kaa en sesombayangen. ⁶ Ampit e reiy’ maena-ena’ mapaghenangla eng kapualitan-kapualitan i ti’i wia se patuari-patuari ta, nikoo koo laa mamuali esa pelayan le’os ni Kristus Yesus, minadidik witu em poong-poong e iman ta wo witu en teturu’ segaya’ eng kini’itmu mola eng keurean i yi’i. ⁷ Ta’an wa’akaten en takhayul wo e numan ne nene-nene tu’a. Latinouw en toumu rumaghes. ⁸ Latian e nouwak minakar i te em peka’ara’anna, ta’an e rumaghes i ti’i eng ka’ara’an witu e reiy’ sa mina’asa kapualitan, karengan en tina’apungan en ta’ar, le’os i wee em patou-touan en teakan ka’apa tu’u i wee em patou-touan e laa meiy. ⁹ Lelila’an i yi’i e nulit wo e waar sungkulen eng kawutana. ¹⁰ Ni’itu mouw eng karenganna nikita ta mengente’ me’ulit wo me’inakut, karengan nikita ta minee em paarapen ta wia si Empung matou-tou, lumelawir em baya ne tou, si kasa i paketa-ketare nea nu ma’eman. ¹¹ I abarola wo i turu’ mola em baya nyi’a i ti’i. ¹² te’a siesa tou tu’u si mapokeiyla nikoo koo kumeng karengan nikoo koo muda. Mamuali mouw patoka’an wia se tou-tou ma’eman, witu e lelila’annu, witu em pasiwo-siwonnu, witu e nupusmu, witu eng kelale’annu wo witu eng kasuciannu. ¹³ Kasuatan e ni’itu, i ka’ayo niaku nu meiy tumentemola witu mewaca eng Kaol-kaol Suci, witu mewewangun wo witu mawee teturu’. ¹⁴ Te’a pepar witu mepakela eng karunia wia nikoo, neiy mouw i weela wia nikoo kaa e wenti’ wo ampit em pinate’upan e lawas ne sidang penatua. ¹⁵ Weeanola ghenang em baya nyi’a i ti’i, tumou mouw witu nyi’a rio eng kemajuannu em pakaloo’o-loo’ola witu em baya ne tou. ¹⁶ Weeanouw ghenang en toumu nuesa wo weeanouw ghenang en teturu’mu. Tumentemouw witu em baya nyi’a i ti’i, karengan ampit sumiwo en tuana nikoo koo laa lumawirla en toumu wo em baya ne tou se liminga nikoo.