¹ Jadi, karengan si Kristus si pineme’itanola em peme’itan e nouwak, nikouw tu’u kouw lewo’sa reiy’ kangkasi manginlelutamla en toumu ampit eng genang tuana, – karengan seiy i te si pineme’itanola em peme’itan e nouwak, nisia si minena’ mouw masiwo en dosa –, ² rio e nedo tele’u te’a i pekeka’ara miouwla i ki’it eng kepa’aran ni tou, ta’an i ki’it eng kepa’aran ni Empung. ³ Karengan awesouw eng kelaker e nedo i peka’ara miouwla matuanala eng kepa’aran ne tou-tou reiy’ makasine’u si Empung. Nikouw kouw timou mouw witu e minegheghioan serit, eng kepa’aran, eng katinawean, em pelesir, em pesakeiyan eng kekoo’on wo em pasempean berhala neiy i palouw. ⁴ Kaa ni’itu nisea se ma’erang, kaa nikouw kouw reiy’ kimi’it timelebu’la en tou mewali-wali nisea witu e wunong kareiy’waaran masuat, wo nisea se masero’ nikouw. ⁵ Ta’an nisea se lewo’ sa reiy’ mee pertangongan jawab wia Nisia, si timiro-tiro’ mola ma’akimla se tou matou-tou wo se tou minate. ⁶ Ni’itu eng karenganna takar e Injil neiy mouw i abarla kangkasi wia se tou-tou minate, rio nisea, se masuat tanu em baya ne tou, niakimla eng kenaramen e nouwak; ta’an kaa e roh en toro tumou i ki’it eng kepa’aran ni Empung. ⁷ Eng kesampetan e reiy’ sa mina’asa wo’o sapa en tawi mouw. Kaa ni’itu kuasa’anola en toumu wo maka penesouw, rio kouw toro sumombayang. ⁸ Ta’an eng kasa i paketa-ketare: i koupusola uli-ulit siesa wia se walina, karengan e nupus en timutuwla eng kelaker kasa dosa. ⁹ Weeanola tete’upan siesa wia se walina ampit e reiy’ mengu’ungu-ngu’ungul. ¹⁰ Layanenola siesa wia se walina, minatoroan ampit eng karunia kina’atoanola ne susur tou tanume si mengengurus e le’os witu e nupus karunia ni Empung. ¹¹ Sa wawean tou si mesesusuiy, le’osouw sia mesesusuiy tanume sitou ma’ayola e nuwu’ ni Empung; sa wawean tou si melayanla, le’osouw sia matuanala nyi’a ampit eng kaente’an neiy i anugerala ni Empung, rio si Empung si lo’orela witu e reiy’ sa mina’asa wo’o sapa karengan si Yesus Kristus . Nisia mouw si makapunya eng kalo’oran wo eng kuasa i ka’ayo eng keure-urena! Amin. ¹² Patuari waya i koupus, te’a mouw kouw ma’erang witu layas e napi siksa’an mineiy wia nikoo tanume e nujian. Tanu mokan wawean e nesa kawuntulan ee pasil minamuali wia nikouw. ¹³ Eng kapurikitna, mepa’a-pa’arouw, minatoroan ampit e weteng kina’atoan niouw witu em peme’itan ni Kristus, rio kouw kangkasi kouw toro lumaya’ wo mepa’a-pa’ar witu e nedo Nisia nu mapaloo’o-loo’ola eng kalo’oran-Na. ¹⁴ Ma’aruiyola kouw, sa kouw sinero’an karengan e ngaran ni Kristus, karengan e Roh kalo’oran, nyi’a i ti’i e Roh ni Empung wia nikoo. ¹⁵ Te’a mouw wawean witu e nelet miouw si lewo’ sa reiy’ peme’itam tanume si mememunu’ ka’apa rongkit ka’apa lumelewo’, ka’apa sumeserok. ¹⁶ Ta’an, sa sia peme’itan tanume sitou Kristen, takar te’a mouw sia meirang, ta’an i te satorona sia lumo’orla si Empung witu e ngaran ni Kristus i ti’i. ¹⁷ Karengan en teakan mina’ayo mouw e nedona paakiman ni’i muleiy, wo witu e wale ni Empung nuesa e lewo’ sa reiy’ kasa ketare-tare akimen. Wo sa em paakiman i ti’i ni’i muleiy wia nikita, kumura mouw ku’a re’en eng kesampetanna ampit nisea se reiy’ ma’eman witu e Injil ni Empung? ¹⁸ Wo sa se tou ulit se weitouw mokan reiy’ kelawirala, sapa ku’a re’en e laa mamuali ampit sitou fasik wo sitou makadosa? ¹⁹ Kaa ni’itu le’osouw kangkasi nisea se lewo’ sa reiy’ peme’itan karengan eng kepa’aran ni Empung, sumarakan e imukurna, ampit e reiy’ mena’ masiwo le’os, wia si Sumesiwo si lale’.