¹ O kaloho’anange en tanda wangko wana langit: Wehan wewene esai kinungkungani yendo, oi serap wia mbawa’ na’ena’ o wehan nesa mahkota ne mapulo rua bintang wia natas ro’okosena. ² Nisia mahawa-awake o nisia mangingal, ka pe’ndis rendai ma-ka’kanak osia me’reke-rekei ka sumakit. ³ O kaloho’anange nesape kahi tanda wana langit; o loho’onome i naga merah padam ka sela’ ro’okosena pitu’ o susungena mapuluh’ o wia natasi ro’okosena mbewehan pitu makota. ⁴ O nipusena, simaputako sanga patelu bintang wana langit, o sea pingkilena mange witu natasi koatan. O Naga nisia, timo’or nimasaruan oi wewene ma’kanak ti’i, ka mo-lo’moti yanakena; sa sia nimo ka’naki. ⁵ O sia kuma’naki yesa yoki’na Tuama, ima uruse pakasane bangsa o biwiwel besi; kasenge’mokani, yonki’na nisia, niamo kahaten o sia tingkas wanamangei Yempung na’an witu ruruh’munanNa. ⁶ Wewe nisia timingkas wanamange tampa rei’sa tou (padang gurun) niasia sinadia’ano ni Yempung tampa, nage pu’urusani-Sia wia mariwu rua-ngaatus nenem ngapuluh’ nendo kaurena. ⁷ Mamoali wana Sorga patokolan wangko. Mikhael na’ane malaekatena, matokol simarui Naga, o naga nisia, patulungene malaekat-malaekatena. ⁸ Ta’an nisea rai mamoali tumahang; o nisea raimo wana tantu tampa wana sorga. ⁹ O naga wangko nisia ka’apa loloi tuamo, ipaila’ iblis ka’apa Setang e simesatako pakasai koatan, nai pingkil wana bawa’; nisia nai pingkil wana koatan, mawali-wali oe malaekat-malaekatena. ¹⁰ Oaku sumongolange suara karekei wana mange Sorga tanai’: “Tekan mbiamo keselamatan o kuasa o papimpineni Yempungeta o papa’apa’aranNa iniurapenNa ka’ nainamo pingkil wana bawa’ e melapo-lapore patuarita, malapori nikita nendo ombengi wiasi Yempung. ¹¹ Nisea kimalahmako nisia ka daha’ni Anak Domba o lili’la’ nai lila’ nea. Ka nisea rai’ maupusi mukur nea mahakari pakolanoan (alam maut). ¹² Ni’itumo, memela-mela’mo e sorga o pakasai nikamu waya e wanamange. Silaka nikamu e koatan o lour! Kai setang timumpamomange wana nikamu nisia kainde’engkani rendai, ka pa’ilekena nisia ra’imoure’. ¹³ Mako maileki’i naga nisia ka, naimo pingkil wana natasi koatan, osia ki’itenai wewene kimanakako Yoki tuama ni’itu. ¹⁴ Iwewenei nisia, winehanako rua lelempari burung nasar wangko rendai, osia toro lumempar mange wana tampana witu padanggurun, ka mbanamange nisia piniara, nimarou’an o tampani loloi’nisia, mahakari nesa masa o rua masa o sangapah’rua masa. ¹⁵ Tumondongako, loloi nisia rimeputi rano wia semurena, tanua kawangkoi so’so’ tomoromakoi weweni ti’i ka nisia pa ayur witu poso’so’an ni’tu. ¹⁶ Ta’an koatan nimai sumawange wewene nisia. Nisia nimuka’ semurena o lumo’mot so’so’an i ni reputi nagawia semurena. ¹⁷ O sia gumah’loi naga nisia wiai wewene ti’i, osea angena tokolene keturunana walina e maki’i-kiiti tiniro’ni Yempung na’ane wewehan nai li’lani Yesus. ¹⁸ O nisia nimeno’ono’orete wana lour.