Lamatua Yesus dadineu mana soi tefa hita. ¹ Ananggeru, au sura dedea o'ola ru ia ra soa neu hei fo hei afi tao sala. Te hu, hambu esa tao sala, hita ta'ena mana soi tefa sia Ama Lamatua mata na, fo na Lamatua Kristus Yesus yang mana sia ndo tetun na. ² Eni mana dadi neu tunu hotu dadame soa neu hita sala kilu na. De nda aka hita salah kilu na, te hu basa rae fafo a sala kilu na. ³ Ba'u data na hita bubulu no tahine Ama Lamatua, de hita tao tungga sa ka mana dadi neu Eni to'to lalane na. ⁴ Ata hori ra ra'o ia, "Au uhine Ama Lamatua," te hu nda tao tungga Lamatua to'to lalane na, na ana ona a ata hori mana peko leleko de meu mare a nda sia ralana. ⁵ Te hu seka tao tungga Lamatua hara li na, susue Ama Lamatua tebe-tebe dadi neu teme sia ao na rala. Ba'u data na hita bubulu tae hita sia Lamatua rala. ⁶ Ata hori mana nafade nae eni leo sia Ama Lamatua rala, ana harus leo ona'a Lamatua Yesus mori. Sue lai torono boe ma tao tungga Ama Lamatua Hi'hi ma na'nau na. ⁷ Torononggeru yang au sue, au nda sura parenda feu soa neu hei sa, te parenda mbara'a yang hei to'u e eni do' ena. Parenda mbara'a na'ka dadi neu Lamatua Hara li na, yang hei rena eni so'sosa'na. ⁸ Te hu, au boe, sura parenda feu mana ndo tetu soa neu nggo, yang mana sia Lamatua rala boe ma hei rala, karna ma'a hatu ana lao'ena de manggarelo tebe-tebe ana nema ena. ⁹ Ata hori ra ola rae eni sia manggarelo'a rala, te hu ana namanasa torono na, na nara na, ana fe'e sia ma'a hatu'a rala losa ia. ¹⁰ Ata hori mana sue lai torono na, leo sia manggarelo'a rala de' nda hambu sa mesa na fene na'a tunu sa. ¹¹ Te hu, kalu ana namanasa torono' na, ana leo lao si'a ma'a hatu'a rala. Ana nda bubulu ana lao benu sa, karna ma'a hatu'a tatana mata na. ¹² Au sura neu hei, hai ananggeru, karena Lamatua narana hei sala kilu mara, nene soi tefa basa e'na. ¹³ Au sura neu hei, hai papa-papa, karna hei bubulu Lamatua eni ma sososana. Au sura neu hei, hai ana-ana monetena, karna hei tao hendi nitu malakat'a. Au sura neu hei, hai ananggeru, karna hei mihine Ama Lamatua'ena. ¹⁴ Au sura neu hei, hai papa-papa, karna hei bubulu Lamatua eni ma sososana. Au sura neu hei, hai ana-ana monetena, karna hei ma'adere, no hei leo sia Ama Lamatua Harali'na rala, no hei tao hendi nitu malakat'a. ¹⁵ Afi sue lai raefafo ia, do basa mana sia raefafo na rala. Hambu esa sue lai raefafo'a, susue Ama Lamatua nese rala na rala. ¹⁶ Karna basa mana sia raefafo'a rala, na hihi ma nanau ao sisi, hihi ma nanau mata, no momori mana koao yang nda lao mia Ama Lamatua nema sa, te lao mia raefafo nema. ¹⁷ Raefafo ia ana mana mopo no basa hihi ma nanau'na, te hu ata hori mana tao tungga Ama Lamatua hihi ma nanauna ana mori losa dona neu. Afi tungga mo nda mana hi Lamatua Kristus sa. ¹⁸ Ananggeru, faira mana basa; ana ona'a hei rena, rae nda mana hi Lamatua Kristus ana nema, de fai ia nda mana hi Lamatua Kristus, hetar rema'ena. Ba'u data na hita bubulu tae fai ia faira rate'e. ¹⁹ Ara lao' ma hita rema, te hu hita nda lao mia sira rema sa, kalu ara lao ma'hita, na ara leo ro hita raka ndo'a, te hu ara lao hela hita'ena, hu na hita bubulu ara nda lao mia hita nema sa. ²⁰ Te hu, hei mi'ena eko feo mia dula dale'a de hei bubulu basa se. ²¹ Au sura neu hei, hei bukan nda fe'e bubulu meu mare'a sa, te hu karna hei bubulu'ena no karna nda hambu fo pepeko leleko lao mia meu mare nema sa. ²² Seka mana peko leleko na'ka, kalu bukan eni nda mana mahine Lamatua Kristus? eni fo nda mana mahine Lamatua Kristus, eni ata hori yang mana nda nahine Ama Lamatua no Ana mone ise na. ²³ Seka yang laka fo nda nahine Ana sa, ana bo nda na'ena Ama sa. Te hu, seka yang nahine Ana, ana bo na'ena Ama. ²⁴ Hela fo sa ka yang hei rena eni sososa'na leo nakando sia hei rala. Mete ma sa ka yang hei rena eni sososa'na leo nakando sia hei rala, hei bo leo mikindo sia Ana no Ama rala. ²⁵ No ia fo hehelu fufuli yang Lamatua fe hela neu hita, na mana mori losa do'na neu, fo nda mana mopo sa. ²⁶ Basa sa ka yang au sura feneu hei ia, na'ena kaitan no atahori mana nae tao fe hita nda tahine Lamatua sa. ²⁷ Te hu, lopo linu yang hei simbo lao'mia Lamatua nema, ana mori naka ndo sia hei rala, de hei nda nafi sangga ata hori nema nanori hei sa. Te hu karna lopo linu mia Lamatua nema, nanori hei momori mana sia meu mare'a rala, bukan pepeko leleko, fo hela ona be na Lamatua nanori neu hei, hei sia Lamatua rala mikindo. ²⁸ Fai'ia, ananggeru, leo misi Lamatua rala, fo Ana nema natudu ao na, hita ta'ena nemehere ao sisi de hita nda mae sia Lamatua nenema na sa. ²⁹ Te hu hei bubulu basa, ia nda-nda mesan, hei bo bubulu bahwa hita inggu atahori mana tao meu lau, na nene bonggi rae lao mia Lamatua nema.