¹ de, basa atahori-atahori Farisi'ra rakukumbu rala de ara rema ro mana to'u to lane raefafo'ra sia Yerusalem ara rema randa ro Yesus. ² de, ara mete rita Yesus ana nanori nara raa-rinu roti te ara nda safe lolou lima nara'sa. ³ hu na'naa, atahori-atahori Farisi'ra ro atahori Yahudi nara, nda nau raa-rinu sa-sa boe rendi'i sira lima mangegeo nara. naa ara to'u rahere' sira hadat nara lao mia sira bei-ba'i ma'ahulu nara rema. ⁴ boema, kalu atahori-atahori Yahudi'ra bali'i rema lao' mia mamana ma'abubue'a, naa ara nda bole raa-rinu sa boe, hela ara sasafe lolou rala basa sira ei-lima nara dei. boema ara safe hura-ro'a, pingga, nggalas, ceret, basa'se musi safe-lolou'se tungga sira hadat-dala nara. ⁵ basama, atahori-atahori Farisi'ra ro mana to'u to lane raefafo'ra ratane mbali Yesus rae, "saa de Hoo ana nanori mara nda tungga' hadat-dala mia bei-ba'i ra rema sa, te hu ara raa-rinu roti rendi'i sira lima manggenggeo nara?" ⁶ de Yesus nafade mbali'se nae, "mema' tebe Yesaya nafade hela nae hei iara atahori mana leleko'ro, ona'a nene sura' hela nae: 'atahori iara fee hadat neu Au si'a sira bafa nara, te hu rala nara ra'adodo ro Au. ⁷ sira koa-kia Au nara Ngga parsuma' te na'nara ranori atahori fo ara to'u rahere' parenda' lao mia atahori raefafo'a nema.' Yesaya 29:13 ⁸ te ara nda nenene Ama Lamatualain parenda'Na, hei to'u mihere' hadat-dala raefafo'a." ⁹ boema, Yesus nafade'se boe nae, "no hei mihine'e fo nda nau simbo' Ama Lamatualain parenda'Na sa de hei to'u mihere' hadat-dala raefafo'a. ¹⁰ hu na'naa, Musa nafade nae, 'fee hadat neu hei ina'ma no ama'ma', boema 'se'ka mesane yang ana sumba-so ina'na do ama'na, naa huku-doki'e losa ana mate.' ¹¹ te hu, hei mifade mae kalu atahori esa ola' neu ina'na do ama'na nae, 'hoo mae hambu saa lao mia au nema aka'a au fee korban,' ¹² boema hei nda sudi fee ijin neu'e tao meulau saa boe soa neu ina'na no ama'na, ¹³ no naa fo hei mae hei nggarei ta-ta'ao hei tungga'a hei hadat-dala raefafo'ma hihi-nanau'na eni'a mia hei bei-ba'i mara rema. fo hei boeo tao tungga ona'a naa'ka boe." ¹⁴ basama, Lamatua Yesus no'e basa atahori'ra de Ana ola' mbali'se nae, "basa nggi rena mata lolole Au fo hei mihine. ¹⁵ metema hei mia nana-nininu saa fo losa tei'ma rala te ana nda dea bali'sa naa basa naa meulau soa neu ao'ma, te hu metema hei mia-minu fo basana ana dea neu bali'i lao mia tei'na rala naa fo nda meulau'sa soa neu hei ao'ma." ¹⁶ "kalu se'ka ma'ena' ndiki naa ana rena nala ia!" ¹⁷ basama, pas Yesus lao ume rala neu de lao hela basa atahori'ra, ma Yesus ana nanori nara ratane bali'E. ¹⁸ de Ana nafade'se nae, "ia te hei boe nda mihine' sa boe? te hei nda bubulu saa mesan yang mia dea nema nala atahori tei'na rala, naa nda tao na'nggnggeo atahori'na saa? ¹⁹ te, naa rala neu o nda losa nisi'i ate'na rala'sa, te hu losa aka'a ambu'na rala, basana ana dea neu sia kakus'a rala." (ona'a na'ka naa, Lamatua Yesus nafade oi basa nana-nininu'ra basa'se meulau'ru.) ²⁰ Boema Ana nafade nae, "sa'ka yang ana dea neu lao mia atahori ao'na, naa fo manggenggeo'. ²¹ hu naa, basa dudu'a de'ulaka'ra rema lao' mia atahori rala nara, dudu'a de'ulaka' hohongge, nemena'o, tati-mbau atahori, ²² dale-lole', ola' na'tutuda atahori, tipu-laka, langga fatu, ko'ao, boema nda mana mahine hadat'sa. ²³ basa de'ulaka' nara dea rema lao mia atahori rala nara. boema naa tao nalutu'se." Nemehere' Lao Mia Ina Esa Mia Siro-Fenisa Nema ²⁴ lao mia mamana' naa, ma Yesus fela de Ana lao nisi'i mamana esa sia Tirus no Sidon. de, Ana nisi'i ume esa rala te nda nau atahori rita Eni'sa, te hu atahori mete rita'E. ²⁵ basama atahori bubulu' Lamatua Yesus sia naa, ma ina esa ana feto'na esa namahedi dula-dale de'ulaka sofe sia ao'na rala, ina nema de ana sende' lulangga'na nisi'i Yesus ei'Na. ²⁶ ina naa lao mia Yunani nema, bonggi'e mia Siro-Fenisia. Ana nema hule mbali Yesus fo oi hendi'i nitu'a lao mia ana feto'na ao'na rala. ²⁷ basama, Lamatua Yesus nggari dedeat nae, "hela'e fo ana diki'ra raa-rinu ra'abebeta dei. te, nda meulau'sa hita ha'i tala roti yang ana diki'ra ena nara fo hita tu'u fenu busa-fafi'ra." ²⁸ te hu, ina'a na'ta nae, "tebe, papa Lamatua, hu, busa'ra leo-lao sia mei'a rae'na de ara raa-rinu ana diki'ra nana-nininu mana tuda sia mei'a rae'na boe." ²⁹ lamatua Yesus rena nala ta'o naa, ma Ana nafade mbali ina'a nae, "hoo ola' naa tebe, de bali' ume'ma leo!. te nitu'a nela hela hoo ana feto'ma ena." ³⁰ basama, ina'a lao bali' uma'na, de neu te ana feto'na mana sunggu' sia susunggut ata, boema nitu'a nela hela'e ena. Atahori Mbake'a Hai ³¹ basama, Lamatua Yesus lao hela mamana Tirus de Ana lao tungga Sidon nakando dano Galilea neu, nisi'i mamana esa nara'na Dekapolis. ³² boema, ara ro atahori mbake esa yang ana nda ola' nala'sa boe. ara hule neu Yesus fo Ana nggama lima'Na neu'e. ³³ basama, Lamatua Yesus no'e nendi'e lao hela atahori nae'ra. de Ana mbau lima u'u'Na nisi'i ndiki ndola'na rala neu, boema Ana miru, de Ana to'u nala maa'na. ³⁴ basama, Yesus boti'i langga'Na ata neu, Ana hae naru' de Ana ola' nae, "Efata!", naa oi "Tabuka leon!" ³⁵ Ana ola' basa boe, ma atahori naa ndiki'na tabuka, ma maa bara'ai na boe banggana'u, de ana ola-ola'. ³⁶ basama, Yesus no bali'e nisi'i atahori nae'ra mata nara, de Yesus ai'se nae, hei afi'i mifade atahori mae Au uhai' atahori ia'sa, te hu, Ana ai' nala'se te ara reu dui-bengga basa atahori'ra. ³⁷ basa'se tebe-tebe nggngger de ara ola' rae, "Ana tao nala basa iara meulau'. Ana boe'o fee atahori mbake'a rena boema ana ola-ola' nala boe."