¹ Lao esa ma, Lamatua Yesus nanori selu' mia dano Galile bife na. boema atahori nae' rema heo rala'E. de Ana hene nisi'i ofa ata,te atahori nae ra endo ra'abubue mia dano'a bife na. ² Ana nanori atahori nae' mana sia nara nendi' na'asasama duduit esa, Ana dui neu'se nae, ³ "rena matalolole! atahori esa lao neu sela-nggari fini nara. ⁴ de pas ana nggari fini nara, ma ruma tuda risi'i dala'a bife na, de mbui'ra rema tengga rendi'se, ⁵ boema fini ruma tuda risi'i rae fafatu' ata. de fini a faa mori nala ata, te hu rae fafatu de oka'na mbei ana'ka. ⁶ De, pas relo'a natobi nae' boe, ma numbu' naa no oka' nara male de ara meto hendi'se. ⁷ fini ruma fai tuda risi'i unu-hau ana' no nggaut'a talada nara. de fini a mori nala ata, te hu unu-hau ana' no nggaut ara hapi ra'risa'se, boema fini mae ana amori o' nda nambole-boa nala'sa. ⁸ fini ruma tuda risi'i rae isi mana mana gembur a ata. de ranumbu, ra'amoko, rabuna, no ara rambule-raboa. de ruma raboa lao telu nulu, ruma raboa lao nee nulu, boema ruma raboa lao natun esa." ⁹ basama, Lamatua Yesus ola' nae, "seka yang maena' ndiki' naa rena mala matalolole!" ¹⁰ Lele naa Lamatua Yesus mesa'Ne, ma atahori mana sia boboa nara no Yesus ana nanori ka sanahulu rua nara, rema randa ro'E de ara ratane rae dudut'i na'asasama naa arti'na sa?. ¹¹ de Ana na'ta nae, "Au nda ufuni neu hei, Au Ama Lamatua Ngga Nusak'Na sa, te hu soa neu atahori laen, naa Au unori'se endi'i dudui na'asasama ona' iaka, ¹² naa fo, 'mae mata nara mete o, ara nda rita'sa boema ara nda rahine'sa; boema mae ndiki nara mana rena, fo ara rena'o ara nda bubulu'sa. naa fo Ama Lamatua afi' sudi fee ambon neu sala-singgo nara." Yesaya 6:9-10 Duduit' Na'asasama' Atahori Mana Sela-Nggari'a, Lamatua Yesus Nafade Arti'na ¹³ Basama, Lamatu Yesus nafade mbali'se nae, "hei nda fe'e mihine' dudui na'asasama iaka sa do? ta'o be fo hei bisa mihine' dudui na'asasama ona' iaka? ¹⁴ atahori mana sela-nggari Ama Lamatua hara-lii meulau'Na. ¹⁵ fini beka yang ana tuda sia dala' bife na fo mboi'ra reu tengga rendi'se, naa ona' atahori yang ara rena Ama Lamatua hara-lii nasi'a ndikina, te nda doo'sa ma nitu'ra rema fo ara rau' rendi Ama Lamatua hara-lii Na mia'se. ¹⁶ Boema, fini mana tuda sia rae fafatu'a, naa ona' atahori mana rena nala Ama Lamatua hara-lii'Na boema ana mbeda neu rala'na rala fo ana bali' ume'na no nemeho'o. ¹⁷ te hu, Ama Lamatua hara-lii'Na nda na'oka sia rala'na saa. fo mete ma, pas sususa-sosona' nema naa ana lili' hendi Ama Lamatua hara-lii'Na naa. ¹⁸ Boema, fini mana tuda sia unu-hau ana no nggaut talanda nara. naa ona' atahori yang mana rena Ama Lamatua hara-lii'Na. ¹⁹ te hu, ana tasibu no'a eni dudu'a nemetau'na mata-mata' sia raefafo ia, aka' eni raku-tao'na soa no hata-eto raefafo ia, boema dudu'a na aka' si'a hihi-nanau nae namasu'i de tataos nara hapi rala Ama Lamatua hara-lii'Na de ana lili' endi'E. ²⁰ mana tuda sia rae isi mana gembur'a, naa ona' atahori mana rena nala Ama Lamatua Hara-Lii'Na, naa ana mbeda neu rala'na fo ana tungga ona' sa'ka yang Ama Lamatua hihi-nanau'Na fo ana nambule-naboa lao telu nulu, lao neenulu,boema laonatun esa." Afi' tatana Lambu'a Masubu'na Mendi' Boa ²¹ Basama, Lamatua Yesus nafade mbali'se nae, "eni bess, atahori dede nala lambu'a naa ana tatana'e nisi' boa rala do oko'na ana mbeda'e nisi mamana susunggut'a rae'na? ta hu ana mbeda'e nisi'i mamana naru' naa fo manggarelo nala basa'e. ²² hu na naa, nda hambu ma'afuni' saa'ka yang nda nene nita'sa boe, boema nda hambu nefeni' saa'sa boe, basa-basa nara ara ratudu'se. ²³ seka yang mandiki'i naa hela'ne fo ana rena!" ²⁴ Basama, Ana ola' selu' fai nae, "du'a mata lolole Au neneori ngga ia! mete ma hei uku atahori laen tatao-nono'i na, naa atahori'ra o uku hei tatao-nono'i mara ona' naka'ra boe. hu uku neu hei naa ana nalena' ²⁵ hu na'naa, seka yang tungga Lamatua hih-nanau'Na naa ana hambu Lamatua susuelalai'Na, te hu seka yang nda tungga Lamatua hihi-nanau'Na naa, Ana hai nala bali' basa meulau'ra mia'e." Na'asasama No Fini' Ngges'ara ²⁶ Basama, Yesus nafade fai nae, "Ama Lamatua Nusa'Na sama ona'a atahori esa ana sela-nggari sia mole'na. ²⁷ mae atahori naa bali' fo ana sunggu'-fela/hatu rerelona o, ana nda nahine'e fina'a mori fo losa ana na'amoko ta'o ona be saboe. ²⁸ fini'a mori aona sia rae'a ata. ana nanumbu na'ahulu' fo ana na'amoko basana ana nabuna boema ana nambule-boa. ²⁹ fo mete ma losa fai etu-oru'a nema naa tenu mole'a nema fo ana etu-oru nendi mbule-boa nara bali' umena neu." Lamatua Yesus Na'asasama No Fini Ana Diki'a Ano Mori Dadi Neu Hau Huu Ine' ^{30 30} Basama, Lamatua Yesus ola' fai nae, "hita bisa ta'asasama' Ama Lamatua nusa'Na tendi' saa? do hoko'na, tae fee Ama Lamatua Nusa'Na ona' be'ke? ³¹ Ama Lamatua nusa'Na sama ona' fini anadiki'a, hita sela'e neu rae'a rala, fo mae fini naa anadiki na seli' lena' lao' mia basa fini-ngges sara o, ³² te hu, hita sela tale'e naa, basana ana nanambu fo ana mori na'anae dadi neu hau hu ine', dana nara ralongge ramanaru fo basana mbui'ra rema tao nduna nara risi'i dana nara ata." ³³ no Lamatua Yesus dui na'asasama nae' ta'o naa, fo Ana na'alolosa Ama Lamata hara-lii Na neu basa mana sia na fo ara rena. ³⁴ Ana ola' nendi'a na'asasama duduit neu basa atahori mana sia nara, te hu basana Ana dui namemeu neu Eni ana nanori nara mesa'nese. Lamatua Yesus Denu Sanggu Anin'a Hahae ³⁵ fai naa, pas bobo anana ma Yesus no'e nala ana nanori nara de Ana nafade mbali'se nae, "ima fo ata lao tisi'i dano seri' teu." ³⁶ de ara lao hela basa atahori nae' mana sia nara, ara ro Yesus hene ofa ata' reu. boema afa' laen ara o tungga ro se. ³⁷ ara lao rala dano'a taladana ma sanggu anin na nema de ree ra poko ofa'a mia seri-mia seri de oe maso nae sofe ofa rala'a. ³⁸ sangu-anin'a basa naa te Yesus ndae langga Na sia ainulu' ata de Ana sunggu' nasambeta sia ofa'a dea'. basa de, ara rema fafae Yesus rae, "Meser, fela dei! Hoo nda tao afi'sa te hita mate teu a ian. ³⁹ basama, Yesus fela de Ana ai anin a nae, "nene! muloe!" boema anin rena parenda'Na de naloe no ree rao raloe. ⁴⁰ basama, Ana ola' mbali'se nae, "saa de hei mimitau? hei nda miena nemehere' mbei sia hei rala mara rala sa doo?" ⁴¹ ara ramatau raseli' de esa ola' mbali esa rae, "Ia se'ka ? de mae sangu anin no tasi'ao rena parenda Na!"