¹ fai ka esana mia nggarei naa, pas fe'e fefetu anana, ma ina - ina nara reu se'u Yesus rate'Na rendi no buna rambe yang sira tao hela'ra. ² reu te mete rita rates'a tatanana yang ara tatana rendi'i fatu monae'a ana na'adodo no rates'a, de rates'a mana mbobo. ³ te hu, ara rakando siri'i rates rala reu te Yesus ao sisi'Na nese ena. ⁴ pas ara fe'e du'a-du'a soa no hal naa, nggengger ma atahori rua yang ara pake bua lo'as makandedelak ra rambari risi'i sira boboa nara. ⁵ ina-ina nara ara dere de ara be'ute mata nara, te hu atahori ka rua ra rafade mbali se rae, "saa de hei ima sangga atahori yang fe'e mana masoda'a sia rates'a rala? ⁶ Yesus nda sudi sia ia sa ena, Ana mori bali ena. misineda sa'ka yang Ana nafade neti hei'e pas hei fe'e mia Galilea. ⁷ Ana nafede nae Ama Lamatua Ana'Na ara soro neu atahori-atahori tatao nono'i de'ulakat ara, fo ara salib'E, de Ana mori bali'i sia pas fai ka teluna." ⁸ ma, ina-ina nara rasaneda bali'i Yesus nafade'Na. ⁹ basama ara bali lao hela Yesus rate'Na, de ara reu dui sa'ka yang sira rita no yang sira rena'a lao mia atahori ka rua'ra neu rasul ka sanahulu esa'ra boema neu atahori yang mana tungga Yesus ra. ¹⁰ ina-ina mana dui' nara Maria Magdalena, Yohana, Yakobus ina'na Maria, boema ina ka hira'ra. ¹¹ te hu, rasul nara nda rama here sa'ka yang ina-ina nara dudui nara sa, ara oi fee ina'ra dui e'ediki. ¹² te hu, Petrus fela nambari de ana nela'a Yesus rates'Na neu. Ana nakando rates rala neu de ana be'ute de mete rates rala neu, te hu ana mete nita aka'a side lenan yang ara pake rendi'e mboti neu Yesus ao sisi'Na. basama Petrus lao bali te ana du'a-du'a nae sa'ka yang mete nita na'ka. Yesus Natudu ao'Na neu Mana Tungga Nara Mia Dala Nae Nisi'i Emaus Neu ¹³ faina boe, atahori 2 mana tungga Yesus ara lao desa esa narana Emaus reu yang dodona nda salah sana stadia 60 lao mia kota Yerusalem. ¹⁴ atahori ka rua'ra fe'e olah-olah sa'ka yang sira rena'ra nara. ¹⁵ pas ru'ase fe'e olah-olah boema ara tukar dudu'at, ma Yesus nema deka'se de lao namalolo no'se. ¹⁶ te hu, ru'ase mata nara nenehalang de ara nda rahine Yesus sa. ¹⁷ Yesus nafade mbali'se nae, "hei olah-olah saa naa sia dala ata?" ma atahori ka rua'ra rambari boema metena mata nara sofe' no'a sususa sosona'a. ¹⁸ basama esa narana kleopas ana nafade mbali'E nae, "ne'oke aka'a Hoo ia fo atahori feu'u sia kota Yerusalem ia, de Hoo nda bubulu' sasa boe yang mana dadi'i mia ia, sia fai-fai mate'en nara hia'ra sa?" ¹⁹ Yesus na'ta neu nae, "saa naa?" boema ara dui neu'E rae, "soa no Yesus lao mia Nazaret nema. Eni naa nabi esa yang Ana sofe' no'a kuasa sia dedea o'olah'Na boema tatao nono'i Na sai basa hai nusak mara. ²⁰ te hu, malangga imam-imam'ra boema basa malangga'ra fee huku doki mate neu'E de ara salib risa'E. ²¹ hai mae ne'o fe Ana yang fee hai nusak'ma Israel bebas. te hu, fai ia fai mamate'Na fai ka teluna fai ia. ²² te hu, ina ka hira'ra iara rema de ranggengge hai. pas fe'e fefetu ana na ma ara lao reu se'u Yesus rate dae'Na, ²³ ara reu te ratesa rou ena, Yesus ao sisi'Na nese ena. basama, ara lao bali'i de ara reu rafade mbali Yesus ana nanori nara rae sira rita malaikat esa de ana nafade neu'se nae Yesus mori bali'i ena. ²⁴ basama, hai ka hira'ra lao mi se'u Yesus rate dae'Na de hai losa te hai mete mita'a ratesa rou ena ona'a sa'ka yang ina ka hira'ra dudui nara fa'ara. te hu, sira nda randa ro Yesus sa". ²⁵ basama Yesus nafade mbali'se nae, "atahori ona'a hei iara nggoamara seli de nda mimihere sa'ka mesane yang nabi'ra rafade neti nggi sa. ²⁶ ara rafade rae losa faina te Kristus hambu sususa sosona ona'a iaka deifo Ana nisi'i Eni mandela masa'a naa rala." ²⁷ de, Yesus nafade nalulutu neu'se basa sa'ka yang nenesura'a sia basa susura meumare'a rala soa no Ena ao'Na, lao mia Musa susura'na nema losa nabi'ra susura nara. ²⁸ pas ara lao losa deka no desa esa narana Emaus, ma Yesus lao nakando ona'a fo Ana nae lao nisi'i nusak dodo neu. ²⁹ te hu, ka rua'ra ai ra'ahaha'E. ru'ase hule mbali'E rae, "muhani mo hai sia ia te fai'a bobo' nae ena boema relo'a soko nae'a tena." de, Yesus ume rala neu de Ana sunggu nahani no'se. ³⁰ pas Ana na'abue no'se mia mei nana nininu'a, ma Yesus ha'i nala roti'a boema Ana huleo'e fee'se. Ana bibinggi roti'a, de Ana fee neu'se. ³¹ neu na, ma ara fe'e do rasaneda boema ara rahine Yesus. te hu, nggengger neu ma Yesus mopo hendi'E. ³² basama, esa nafade mbali esa rae, "naa de au tenda ngga foti pas Ana olah-olah no hita mia dala'a nema boema pas Ana dui namemeu susura meumara'a neu hita" ³³ pas fai'na boe, ara fela de ara lao bali'i Yerusalem reu. ara randa ro Yesus ana nanori ka sanahulu esa nara boema atahori-atahori yang mana tungga'ra basa'se ra'abue mia mamana esa. ³⁴ Yesus ana nanori nara rafade mbali atahori ka rua'a nara rae, "Lamatua'a tetebese Ana mori bali'i de Ana natudu ao'Na neu Simon!" ³⁵ atahori ka rua mana tungga'ra boe'o ara diu sa'ka yang sira rita mia dala'a nema. ara dui rae ta'obe foo sira rahine Yesus pas Ana ha'i nala roti'a de Ana bibingga'e. Yesus Natudu Ao'Na Neu Atahori-Atahori Mana Tungga Nara ³⁶ pas atahori ka rua ara fe'e dui sa'ka yang sira rita'ra, ma Yesus nambari'i mia sira talada nara de Ana olah mbali'se nae, "soda mole' neu basa hei.' ³⁷ te hu, basa'se nggengger boema ara ramatau. ara rae ne'o fee sira mete rita nitu'a. ³⁸ basama, Yesus olah mbali'se nae, "sa de hei nggengger boema hei du'a-du'a sia hei rala mara? ³⁹ hei mete mita Au lima nggara no Au ei nggara sie. tetebes ia Au. ima nggama Au boema ama mete mita sie, nitu naa nda ma'ena ao sisi'i boema rui'i ona'a yang hei mita'a saia Au." ⁴⁰ Yesus olah basama, Ana natudu lima'Na no ei'Na neu'se. ⁴¹ ara nda fe'e ramahere hu ara ramaho'o boema ara fe'e du'a-du'a sia rala nara, ma Yesus natane mbali'se nae, "hei fe'e hela nana nininu'u sia ia boe doo?" ⁴² de ara ha'i fee u'u poto esa mana pangga'a neu'E. ⁴³ Yesus ha'i nala u'u a de Ana naa mia basa'se mata nara. ⁴⁴ basama, Yesus nafade mbali'se, "dedea o'olah ia'ka yang Au ae ufade neti nggi pas Au fe'e oo hei. basa sa'ka yang nenesura'a soa no Au sia too lane Musa, too lane nabi'ra, no koa kio a ara dadi." ⁴⁵ basama Yesus nasosoi sira dudu'a nara de ara hambu rahine susura meumare'a isi nara. ⁴⁶ Yesus nafade fai neu'se nae, "hambu sia susura meumare'a nae Kristus Ana hambu sususa sososna'a iaka fo Ana mori bali'i lao mia mamatesa nema sia fai ka teluna. ⁴⁷ boema, atahori tobat fo ara hambu ambon lao mia nara'Na nema fee neu basa nusa'ara, lao mia Yerusalem nema. ⁴⁸ hei iara sa'kasi-sa'kasi basa iara. ⁴⁹ ama bubulu'u, te Au haitua Au Ama ngga fufuli hehelu'Na neu nggi. te hu, ama mihani misi'i kota Yerusalem rala losa hei hambu kuasa lao mia nusa tetu inggu tetu'na nema." Ara So'u Yesus Surga Neu ⁵⁰ basama, Yesus no'e no basa mana tungga nara nisi'i kota dea neu sia mamana'a nara naa Betania. losa naa, ma Ana boti'i lima'Na ata neu de Ana fee ua nale'e neu'se. ⁵¹ pas Yesus fee nala ua nale'e neu'se, ma Ana sara ngga no'se de ara so'u E surga neu. ⁵² de, ara koa kio neu'E basama ara laobali'i Yerusalem reu ro rala nara sofe' no'a ramaho'o. ⁵³ ara rahani si'a Ama Lamatua ume'Na rala fo ara koa kio neu Ama Lamatua nara'Na.