¹ Baisaka, Yesus na panewi ti yidda, "Yauwa lungngu gu mi yimmi ni ma pullu pia, tu ma pirra ra tu ma tanga dengira sia ma aita malli mati labba toma badda etai ni Panyianai Maramba Allah banna mai waina Kuasa." Yesus Dangngui Musa Dangngui Elia ² Dangngu, nammu laddu ti sabali ni hai, Yesus na wandarai Petrus, Yakobus dangngu Yohanes, baisa na karangnga mesa darra ti pannu tadulla ma djaga. Baisai Yesus nappa sepa sada-Na ti saga da yidda. ³ Dangngu, ni kalabina dadi tarrangui dangngu bela langngu takkai. Atta oma ma ma pa bela kalabi ti pannu tana ma sama bela dangnga nggi go yinni. ⁴ Baisa, sungnga ti saga da yidda, Elia dangngui Musa, dangngu yidda tanga panewi dangnga dai Yesus. ⁵ Baisaka, Petrus linna ti Yesus, "Rabi, na dassa langngu takkai tutu ma yami ba o gamma siana. Maika yitta katta wolu taula panyia, sisa tutu mu Yo, sisa tutunai Musa, dangngu sisa tutunai Elia." ⁶ Mulani, Petrus aita na lakkassa amma pa simai mulani ngaradukka da yidda badda ma dauta. ⁷ Baisaka sungnga nassa ni karummangu banna pamawu darra yidda, dangngu da rangngi ni li nimma mai walli go ti karummangu, li-Na, "Nia nikka ni Ana ni pabussa-Gu. Kammi rangngi Yinna!" ⁸ Ti go mema, yidda badda ngadu ti karasa da, yidda aita sullu o makka pa etada sigilanai Yesus. ⁹ Dangngu, ba tanga burru da walli ti tadulla ma djaga, Yesus na panamudarra ka ammba da lolukai ti hega-hega ngerani ni pa etada, labba toma ni Ana Turara banna kaddi walli ti dalu da tu ma mati. ¹⁰ Mulani go, yidda da ketagi go ni panewi tutu da yidda wikki dangngu da pakkatatana na pani ni wukkuni ni murippa bali walli ti dalu tu mati. ¹¹ Baisa, yidda da pakkatanana ti Yesus, "kaddi para ahli Taurat lidda bai Elia pui ni ma mai manyulu?" ¹² Baisa Yesus na panewi ti yidda, Elia na takka manyulukadda tutuni kanna padassa dabbai ngaradukkani. Dangngu, apalinni dangngu ni pa badda tulisada ngeranai ni Ana Turara lappa banna sadukka dangnga dabba ndi dangngu da yekii?" ¹³ Takka, Yauwa ku panewi ti yimmi Elia badda mainakka, dangngu da wolui lappa banna tomai ni pawukkuda, sama tuni nippa badda tulisada ngera na yinna. Para Murid aita da Pakka luama pa Lusa nggi ni Kaballikku wali tu Tu Satu ¹⁴ Sigilani hai, Yesus, Petrus, Yakobus dangngu Yohanes da bali ti Lakawa pa papeka-Na, yidda da eta tu dangu ma kaboguranna ti kalisu da do Lakawa pa papeka, dangngu para ahli Taurat tanga patayakka dai dangngu yidda. ¹⁵ Baisaka, ngaradukkani go ni kabogura tu dangu badda eta sai Yesus da kawautakka dangngu da palai badda yemai Yinna. ¹⁶ Baisaka, Yesus na pakka tanana ti yidda, " Pani ni papa tayakka dangngami dangngu do ahli Taurat?" ¹⁷ Satu walli ti tu madangu do na simai," Gurru, yauwa ku karangngani ni ana maninggu ti Yo mulani yinna na tamani Roh ma wolui yinna ba aita na pia pa panewi. ¹⁸ Banna toma kassa ni Roh banna tama ti sada na, yinna na kapassani ti tana dangngu yinna na palusangngi ni ma kokura wali ti wiwina, dangngu na pakka kirrukkangngi ni undu na, baisa yinna na londurra. Yauwa ku dangngi ra Lakawa pa papeka-Mu kadda wuddai go ni Roh, takka aita da pakkaluama. ¹⁹ Dangngu Yesus na simara yidda dangngu linna, " ta, yimmi tu ma aita pawai! Aita pirratu tarru amma nika bakku karangnga gummi yimmi? ma pirra kalua walli bakku enga dangngagummi? Karangngani ni lakawa ti Yauwa na!" ²⁰ Baisa, yidda da karangngani no ni lakawa ti Yesus. Dangu, ni Roh go banna wanna matasai Yesus, yinna na kapassa-passani no ni lakawa. No ni lakawa kanabu ti tana dangngu na kamunggilla dangngu ni wiwina na palusani ma kokura. ²¹ Sabali ni hai, Yesus na pakkatanana ti ama na no ni lakawa, " badda pirra tarru nika banna dadi go ti yinna?" na simai, " walli ba lakawai. ²² Dangngu go ni roh badda dammanikka banna lebuni ti api dangngu ti we kanna pia mawuttukai. Takka ni dai, Yo nika ba piakadani bau wolu pani-pani, milla ki gamma ati dangngu gata ki gamma ²³ Linnai Yesus ti yinna, " ni ka yo bau kolina? Annga ngaradukka ni ka tutuni yidda ma pawai." ²⁴ Na gesa no ni amana ni lakawa na mangasi dangngu linna, " yauwa ku wai! gataga wali ti aita pawainggu!" ²⁵ Takka Yesus banna etarakka tu dangu badda mai pakka bogurra dangngu gesa, Yinna na kayakkai go ni roh dangngu linna, " yo roh ma kabangnga dangngu ma aita rangngi, Yauwa ku paretawu yo kaulusawu walli ti alakawa no dangngu ambau sulu tama balimau!" ²⁶ Banna baisaka pa kawissaka dangngu na kabali-bali no ni lakawa, baisaka np ni lakawa, takka go ni roh lusanassa. no ni lakasa samatu tu ma matisa baisaka dangu tu malidda, " mati nassa!" ²⁷ Takka hai, Yesus na ketangngi ni lummana no ni lakawa dangngu na pakaddi, baisaka no ni lakawa na dengira. ²⁸ Dangngu, banna tama kai Yesua ti umma, Lakawa pa papeka-Na da pakka tana ti Yinna wikki, " Kaddi yami aita pia bamma wuddai?" ²⁹ Dangngu, Yinna linna ti yidda, "Nimma tu ni gia atapiamani banna lusai tutuni ba waigi sabaya." ³⁰ Wali hammi, Yesus dangngu ni Lakawa pa papeka-Na salaku dangngu da li ti tana Galilea. Dangngu yinna aita na bissu amma ba o tu malakkasangngi. ³¹ Mulani, Yinna tanga ajara narra Lakawa pa papekanna dangngu linna darra yidda, " Ana Turara lappa da yai ti lummada tu, dangngu yidda wukkudai pa pappai Yinna. Dangngu, badda baisaka pa pappai Yinna, taula laddu ti sabalinni hai Yinna na kaddi bali." ³² Takka hai, lakawa pa papeka-Na aita da lakkasamangngi ni wukkuni go ni panewi dangngu da madauta pa katanai ti Yinna. Ni Palumudai Ngerani Herai Ni marisi Pa Kalada ³³ Sabali ni hai, Yesus dangu Lakawa pa Papeka-Na toma dassa ti Kapernaum. Dangngu, Yesus ba o nissa ti dalu umma, Yinna na pakatanana ti yidda, "pani ni pa panewimi ti padua lara?" ³⁴ Takka rinni, yidda dangngu dai mulani ti padua lara yidda da patayakka wikki dangngu olida ngerani hega ma kalada. ³⁵ Baisa, Yesus na madi'ndi dangngu na kayekadarra Lakawa pa papeka-Na ma tummu sakkabullu duada na. Dangngu, Yinna na panewi ti yidda, " nika ni tu satu na bussa pa nyiangngi ni ma manyulu, yinna na nyia ballingngi ni mangngu kamuri waliti ngaradukka dangngu na pajola darra yidda ngaradukkada." ³⁶ Baisaka haina, Yesus na teki ni sa tu lakawa dikku dangngu na padengirrai ti paduada yidda. Dangngu, tanga na sakkullai no ni lakawa, Yinna na panewi ti yidda, ³⁷ "Hega widdi ni ma yemai ni lakawa dikku sama tu ni ngngia ti dalu Ngara nggu, yinna na yemawa Yauwa. Dangngu, hega kassa ni ma yemawa Yauwa, aita yema nauwa Yauwa amma, takka Yinna ni ma Palewa wa Yauwa." ³⁸ Yohanes linna ti Yesus, "Gurru, yami ma etai ni tu ma wuddai ni kaballiku ti dala Ngara-Mu, dangngu yami ma sirini mulani ba tu ma aita keri da yitta." ³⁹ Takkai haina, Yesus linna, "amba mi siri ammani mulani ba aita o tu ma padowi ni pawolu na ni masarri ti dalu ngara-Nggu, piani ti rasi go mema na yura wa Yauwa. ⁴⁰ Mulani, Hegai ni ma aita lawa da yitta, o ni ti kalebu da yitta. ⁴¹ Takka, Yauwa ku peka nggumi ni ma pulupia ti yimmi, hega widdi ma ya nggumi sisa galla we mulani bammi keri Kristus, aita na jallurramai ni kasewana. Ngerani Ba Na Dadi Ni Jala ⁴² Dangngu hega kassa ni ma pamulai ni satu wali ti lakawa-lakawa dikku ni ma waiwa Yauwa no na wolu jala, risi dassani tutuna yinna ni sisa watu kilangan ma kalada da tewillanggi ti kokuna dangngu yinna da lebuni ti tasikka. ⁴³ Dangngu ni lumma mu nika banna pa mulai yo bau jalawu, kadappu ja go ni lumma mu. Risi dassani yo bau tamawu ti dalu muripa dangngu ni lumma ma kadappuna, ka amba dangngu duada lummamu badda lebu nggu ti api ma kadulakka, ti dalu api ma aita mali badda, ⁴⁴ Panyia ni pa aita pia matinarri ni kataru dangngu ni api ma aita badda. ⁴⁵ Dangngu ni wissimu nika banna pamulai bammu jala, kadappu nggi ni wissimu. Risi dassani yo bau tamawu ti dalu murippa danngu ni wissi ma kadappuna, ka amba dangngu ni dua wissimu badda lebu nggu ti api ma kadulakka, ⁴⁶ Panyia ni pa aita pia matinarri ni kataru dangngu ni api ma aita badda. ⁴⁷ Dangngu, ni matamu nika banna pamulai bau jalawu, sikkui go ni matamu. risi dassani bau tama ti Sangaji nai Allah dangngu ni matamu ma sisa na, ka amba dangngu ni duada matamu badda lebu nggu ti api ma kadulakka, ⁴⁸ Panyia ni pa aita pia matinarri ni kataru dangngu ni api ma aita badda ⁴⁹ Mulani, tu satu da pamassi wai ni api. ⁵⁰ Go ni masi dassai, takka go ni masi banna jallurrakassa ni barruni, apalinni yo bau wolui kanna barru bali? Ni masi ka o nggi ti dalu murippa wikkida dangngu pa dami dangnga darra tu sawawi." Ngerani Ni Pasewa