¹ Yesus Na tama walli ti Sinagoge, hailauna o'ni ni tu mati lumma na sakkapapa. ² Da ketinggi Yesus ka etai banna patanggasa ni tu no ti laddu masarri, kapiani badda pa'njala-I Yinna. ³ Baisa Yesus Na panewi ti tu ma mati lumma sakkapapa, "Ndengerawuka paduwa." ⁴ Takkai Yesus linna ndarra, "Appalinni piani ba wolu ni ma ndassa aita wallika ma atta ndassa ti laddu masarri? Pamannuitai ndewa aita pamati?" Takka ndangngu dai. ⁵ Baisaka hai, Yesus Na paelu mbarra da yidda dangngu Na mbani. Milla takka ni ati Na Yesus mabba ni kalada ati da. Linna Yesus ti tu ni ma mati lumma sakkapapa, "Pa'jolanggi ni lummamu!" Takka dinna pajolanggi ni lumma na, makka tanggasanassa ni lumma na. ⁶ Tunnissa nggo yena, ndo tu Parisi manyamaladdasa pa 'bali dangngu pa ndapa dangnga ndarraka tu Herodian ma lawai yinna appa linni sama ba pamati Yinna. 'Dangu Tu Makeri Yesus ⁷ Baisaka, laumalerunassai Yesus dangngu tu papeka Na ti tamma, takka dangu langngu tu walli ti Galilea makeri Yinna, walli ti Yudea, ⁸ Yerusalem, Idumea, ti S'mbali loku Yordan dangngu o'mannu walli ti Tirus dangngu Sidom. Dangu tu ma mai ma rangngi ngarandukanarri ni pawolu-Nai Yesus. ⁹ Takka danguka tu, Yesus palewa narraka tu papeka Na ka da sa'ndia tena sisa ka amba pia ni badda dasikkai Yinna. ¹⁰ Mabba dangu langngu takka ka tu pa patanggasa Nai Yesus, hammi ndarraka tu dangu ma mangngu panyaki na ba pakissi-kissi na ka piani ba jonggara-I Yesus. ¹¹ Takka kamballiku ma irraka da eta-I Yesus, da kasokura ti saganai Yesus dangngu da pakawawukanna, "Yo Ana Nai Allahwu." ¹² Tu anni hai, Yesus na sirilangngu takka ndarra ka ambadda panewi hera-I Yinna. Yesus Na Pe'ndira Sakkabullu Duada Pa Papeka-Na ¹³ Singgilani hai Yesus Na kandekalana ti tandulla dangngu na kayekadarra ngarandukkada tu pawukku Na, tutuni bakarangnga Ni dangngu hammi ndarraka badda tomani Yinna. ¹⁴ Yesus Na pe'ndira sakkambullu duada tu kadda karangngani Yinna dangngu Na palewara badda patomanggi ni panewi-Nai Muri, ¹⁵ Na ya'ndarra 'bisa, kadda wurrakarri ni mangngutana. ¹⁶ Sakkambullu duada tu pa pe'ndira-Nai Yesus: Simon pa pangara-Nai Yesus Petrus. ¹⁷ Yakobus ana nai Zebedeus dangngu Yohanes nyuwwu nai Yakobus; yidda pa pangaranai Yesus Boanerges samanni "Allakawa Guruh", ¹⁸ Anderias, Filipus, Bertolomeus, Matius, Tomas, Yakobus ana nai Alfeus, Tadeus, Simon tu Zelot, ¹⁹ Dangngu Yudas Iskariot, ma pullungani Yesus. 'Bisa ma'ndi-Nai Yesus Walli ni Ti Allah ²⁰ Singgilani hai Yesus na tama ti sisa umma dangngu tu 'dangu, baliwalli dassa badda pakkabuana, takka badda lallu dangu dakka, Yesus dangngu pa peka-peka-Na attapia ammanikka badda nga. ²¹ Mullanikka oli dadi Na badda rangngisa nggo yena, maidassa pateki Yesus, mabba soranassa lidda-Ni. ²² Dangngu mabokul-mabokulla malakkasana Taurat mamburru walli ti Yerusalem liddani Yesus, "Yinna surruka-Nai Beelzebul" dangngu "Yinna mawurrakai kamballiku dangngu 'bisanai ni ma kattowanggi kamballiku." ²³ Takka Yesus Na kayeka'ndarra baisa da pamaina ti Yinna, dangngu Na panewi wai'ndarra pangera, "Appa linni piani kamballiku banna wurrakai kamballiku? ²⁴ Atta na taha ammani ba 'o kakka kerajaan ma mbera dangngu mappa papawikkina, ²⁵ Dangngu ni umma ni mattaissaka banna lawai ni ngera wikkina, ni umma nggo attana tahha ammani, ²⁶ Bai kamballiku ka ma kaddi palawanggi ni ngera wikki na, dangngu mataissaka, attana tahha ammanakka, takka dirra na kanjappu nassa ni lolukani. ²⁷ Atta o'amma tu sa'tu matawanggi ni ummana ni tu ni ma pakkarebuni ngawu na, ba attana manyulu kakka parandi ni tu ma pakkaluwa baisa piani banna rampukai ni ngawu na. ²⁸ Ku pekangguni mapullu pia, ngarandukka da tu ti pannu tana piani podasai ni djala dangngu ngarandukkani ni pullungga ni panewi nda. ²⁹ Takka, herai ni ma pullu wainggi ni Ngasu Matua atta pia patanji ammanikka ba podasanni ni djala ma, makka djala ma atta mbosa sa." ³⁰ Mabba mabokul Taurat ndo lidda-Ni, "Yinna surrukanni kamballiku ma irraka." Oli Dadi-Nai Yesus Ma Pullupia ³¹ Singgilani hai, inna dangngu nyuwwu-Nai Yesus da mai pa'ndengira ti s'mballi umma da palewa tu ka kayekani Yesus. ³² Tu madangu makillurani Yesus liddani, "Elura, inna dangngu nyuwwu-Mu o'darra ti s'mbaliwwu manyarra dawwu you na." ³³ Takka Dinna simai Yesus, linna ndarra, "Herasa ni inna-Nggu dangngu nyuwwu-Nggu?" ³⁴ Baisaka hai, Na elu ndabbara tu ma madiddi ma kalissu-Ni dangngu linna ndarrai Yesus, "Eluraka, nia inna-Nggu dangngu nywwu-Nggu! ³⁵ Mabba hera widdi ma pasalakui ni pawukku Nai Allah, yiddaka anguwa-Nggu dangngu anawinni-Nggu, dangngu inna-Nggu."