¹ Danggu banna baissasa ni landdu kapittuni, Maria Magdalena, Maria inna nai Yakobus lappakai Salome mbadda sidaka rempah-rempah salaku pa burrini minyai Muri Yesus. ² Mbaru-mbaru pungnguni, laddu pakka sisa waini ti minggu haina. Banna sungga ni mata laddu da mai ti rati. ³ Yidda badda panewi dangngu olida "Hera ni mapaka nggainggalanggi ni watu. Walli ti malowi batama ti rati nggo?" ⁴ Takka, badda pangadunaka hallu Desa, yidda etaddasa ni watu makalada mbadda kainggaladasa. ⁵ Dangugu badda tamaka ti rati yidda etadasa ni masalemu tau nai kalambi bela mandiddi ti langgi kawana, yidda kawautakadasa. ⁶ Baisaka, yinna panewinasa ti yidda "Amba kawauta kada, yimmi manyarrammi Yesus tu Nasaret pa mbadda sarikka. Yinna mbadda kaddinaka. Yinna atta omani sia. Ngadu ni panyia ni pama pama turruwai-Dai. ⁷ Takka, salakuka, pekandara alakawa paanjara-Na dangngui Petrus ba Yinna mbadda manyulunaka walli ti yimmi ti Galilea. Hai sambali yimmi patabuka dangngani Yinna samani pani ni patakki waina ti yimmi." ⁸ baisakka, lusadasa dangngu palaidasa walli ti rati nggo mulanika yidda badda kandandaka dangngu badda kapotuka, dangngu yidda atta opatanjima pa lolukada ti tu sawawi mullanika badda mandauta. [Dangngu ngara ndukka ndabbanari ni papareta waina ti yidda kadda pekani Petrus dangngu olina, yidda patomanggi ni panewi makadumbuka. Baisaka haina, Yesus wikki mapalewana yidda walli ti pasungnga loddu toma ti patama laddu, kapatomanggi ni panewi ma bisa ma atta njappu tutuni ni muripa ma atta mbosa Amin.] Yesus Patakka Wikkina Ti Ana Papapekana ⁹ Bana kaddikai Yesus mbaru-baruni ni laddu pakka sisa waini ni minggu haina. Yinna kawungnga pungnguni bana patakka wikkina ti Maria Magdalena walli ni ti yinna Yesus napa lusangngi ni pittu roh jahat. ¹⁰ Baisaka yinna na salaku dangngu na pekandara yidda ma karangngani Yesus sementara yidda sandukkandai dangngu mangasidai. ¹¹ Badda rangngisai bana muripa Yesus dangngu bada etasa yidda atta dawaimai. ¹² Ti sambalini madadi haina, Yesus napatakka wikki mangnguna ti sada sawawi ti tu maduadana yalli ti yidda. Ma salaku ti Desa. ¹³ baisaka yidda balidasa dangngu pekadara olida sawawi, takka yidda ndo atta dawai mangngu mara. Yesus Napanewi Ti Ana Papa Pekana ¹⁴ Baisaka hai, Yinna patakka wikki nasa ti sakka bullu sisa ana papa pekana mandidi dai bata nga Yinna tegur naraka mulla nisa ni atta pawaida dangngu kawatunga ati da. yidda atta da waimara tu ma etai Muri bana baisaka pa kandai bali. ¹⁵ Dangngu Yinna Muri panewi ti yidda, "salakuka ti ngarandukka ni ni pannu tana, lolukai ne panewi ma pullu pia ti ngara ndukka dabba nari ni papa dadina. ¹⁶ Hera nimma mbadda pawai dangngu ma kolina we maringngi we malala yinna ma kolinggi ni muripa, tekka herani ma atapawai attana kolimanggi ni muripa. ¹⁷ Dangngu ni tan'da-tan'da ndo na kerira yidda mapawai; walli ti ngara-Nggu yidda da pamaleruri ni ma atta ndassa; yidda badda panewi waidai silu wuddi; ¹⁸ Yidda ketana mandu waidai lummada, dangngu yidda unnu moru pa mati dangnga, takka yidda ata da matima; yidda da jamara tu ma ana lalu, dangngu tu ma anna lalu da tanggassa" Yesus Nasawi Ti Awangu ¹⁹ Baisaka Muri Yesus banna panewika ti yidda, Muri madedikannasa ti awangngu dangngu mandiddinasa ti langgi kawananai Muri Allah. ²⁰ Baisa, yidda salakudasa dangngu ngindidassa ni ngara-Na ti mbe-mbe nussa. sementara Muri banna koru manggandara yidda dangngu napamandungai ni panewi-Na melalui tan'da-tan'da ni makerira.