¹ Nggianja ni panewi ma kawungnga ni ma'ndassa Yesus Kristus, Ana-Nai Allah, sammani ni patullisa ti mbukku kalada Yesaya: ² "Etasa! Ku papangindini ni pappalewa-Nggu mamma nyulunggu You ni ma sa'ndianggi ni larra tutu-Mu. ³ 'O nggi ni li tu ma pawalana ti maradda ngginangu: sa'ndiani lara tutu-Nai Muri, patanjisanni ni larra-Na" ⁴ Baisaka, Yohanes na parissara tu ti marad'da ngginangu, 'dangngu na panewi mullanissa parissara, ni ka marriaka tutu ni mapodasarri ni djala. ⁵ 'Dangngu ngarandukka 'da tu Yudea 'dangngu ngarandukka 'da tu Yerusalem 'da mai ti Yohanes. Na parissara ti loku Yordan 'dangngu yid'da 'danna pekadarrika ni ndoku djala 'da. ⁶ Ni pa pakinai Yohanes ni wullu unta 'dangngu leku 'banggi kalitta ni pa wonjillanna ti banggina. Ni pa nga na kabala dangu kanena uttangngu. Yesus Na Patomanggi ni Panewi Ma Ndassa-Nai Allah ti Galilea ⁷ Na panewi Yohanes dangngu linna: "Ti sambalinggu yauwana, 'o pu ni ni sa'Tu marisi pa kalada walli ti yauwana, yauwa atta panyiamanni bakku karoduka dangngu pasili Ni leku salapa wissi -Na." ⁸ Yauwa kuparissa wainggummi we, takka Yinna ni ma mai sambalinggu yauwana, parissa wainggumi Ngasu Matua. Yohanes Na Parissai Muri Yesus ⁹ Dangngu ni ti laddu-laddunggo dadinassa, Yesus pa mai Na ti Nasaret, ti manua Galilea dangngu na parissai Yohanes ti loku Yordan. ¹⁰ Banna wuwwaka walli ti we, Yesus na eta ni awangngu na pa bawini dangngu ni Ngassu Matua ma paeru ti ma sanggukku djawa ma pawurrungnga na mburru ti taddu-Na, ¹¹ dangngu 'o nggi ni li walli ti awangngu, "Yo ka Ana pa mbussa-Nggu, ti Yo ka pa manawwara-Nggu." ¹² Na nggesa ti sambali ni hanina, ni Ngasu M'atua Na karangngani Yesus ti maradda ngginnangu. ¹³ Yesus ba 'o ni ti maradda ngginangngu pata kambullu laddu Na dangngu na kakai kaballiku. Yesus haini ti padduwa 'ba nda-'ba nda ma sawadda dangngu malaikat ma nggata-Ni Yinna. ¹⁴ Ba tinggallusai Yohanes , Yesus Na salaku ti manua Galilea dangngu Na patomanggi ni panewi ma ndassa-Nai Allah. ¹⁵ Baisa Na Panewi, " Tomanasa ni rasini, tukki nassa ni Sanga'ndi-Nai Allah. Marriaka dangngu waisa ni li Nai Allah ni ma'ndassa!" ¹⁶ Banna Salakkui Yesus ti karasa tamma Galilea, Na etarrai Simon dangngui Anderias ni nyuwwuna tangnga wallasadai njiala ti tamma Galilea mulla kaddani ba tu majiala la da. ¹⁷ Baisaka, Yesus nappa newi ti yidda, "Keri wakka Yauwana, Yauwana ku taumi yimmi ti majiala oli nappa tu." ¹⁸ Simon dangngu Anderias da nggesa badda 'dunjakanggi ni njiala da. Baisa, didda keri Yesus. ¹⁹ Tomaka banna salaku maleru, Na etai Yakobus ana nai Zebedeus dangngu Yohanes ni nyuwwu nahai ndarra ti tena tangnga pa ndassa dai njiala. ²⁰ Baisa Yesus Na nggesa pa pandowu ndarra dangngu yidda na da dunjakani ni ama da, Zebedeus ti tena dangngu tu pa mbaya da baisa didda salaku keri ni Yesus. ²¹ Tomaka banna takkai yidda ti Kapernaum, ti laddu minngu, na tama ti Sinagoge. Baisa, Na pa ajarrana. ²² Tomaka badda rangngi ni pa a'jarra-Na langada 'dassa baisa, da panewi Yesus banna a'jarranda yitta mbannu bissa takkana. Atta Na sama ma'ndara mabokul-mabokul Taurata. ²³ Tangnga hai ndarra, ti Sinagoge 'o ni mani sa'tu pa sadopara mangutana ma padowuna. ²⁴ Na panewi, "Pani ni paurissaMu Yo dangngu yami, Yesus tu Nazaret? Pani ni pawukku-Mu nggiana, angga ka pamosuma yami? Yauwa kulakkasanggu Yo. Yo ka ma 'bissa walli ti Allah!" ²⁵ Takka Yesus Na ka'jakkani, linna ni "ndangnguwu! Lusawu walli ti tu n'ia na!" ²⁶ Sa'mbali kahaina ni ndewai makka irraka na pakkanggoya-nggoyakai yinna banna kawawuka pawandina, basia ndinna lusah. ²⁷ Ngarrandukka da tu da langada baisaka da ranja pakatana wikki na, lidda, " ma pani sannngiana? Pa a'jara ma wuddisa nggia, ma dangngu 'bisana! A mapukkani ndewa-ndewa irraka na keri lolui Yesus" ²⁸ Baisaka, na nggesa langngu takkai ma mawewaranni ni lolukadai Yesus labba toma ti mbe-mbe lappaka ti manua Galilea. Inna Yera nai Simon dangngu tu ma'dangu da patanggasara ²⁹ Badda nggesaka pa'dunjakanggi ni Sinagoge, Yesus dangngu tama dassa ti umma nai Simon dangngui Anderias karangnga da Yakobus dangngu Yohanes. ³⁰ Takka, ni inna Yera nai Simon maturrunai tangga ana lalu maringnginai, baisa didda nggesa pa pekani Yesus nippa padda na. ³¹ Banna maika Yesus patomani dangngu banna katanai ni lumma na, banna pa ndengirai nggo mema banna tanggasa dangngu ni kawinni palawwangunaraka. ³² Banna tamasa ni laddu, tomanassa ni kajiddunga, karangnga ndabba ndarraka ti Yesus tu ma ana lalu dangngu pa sadopara mangutana. ³³ Baisaka, pakkabua dabba 'dassa ngaranduka da tu ti saga malowi umma. ³⁴ Yesus banna patanggasa dabbaraka tu madangu, ma senge-nge ana laluna dangngu banna wud'dara mangutana ma madangu. Tunisahai, na siri'ndarra mangutana ti panewi, mabba yidda da lakkasani Yinna. Yesus Na Sambaya Dangngu Na Patomanggi Ni Pullu-Na ³⁵ Mbarru-mbarru kawungnga walla, Yesus mbadda kaddinaka, baisaka Na salaku ti panyia ma kasika dinna sambaya. ³⁶ Baisaka Simon dangngu ngaranduka da tu da pakarangnga-Na lappa manyarrani Yesus. ³⁷ Tomaka badda etasa Yesus da panewi ndabba ngaranduka "ngarandukka da tu manyarada-Wu!" ³⁸ Dangngu Yesus Na panewi: "Maika katta salaku ni bassarri ni manua ma tukki, kapia-Nggu Yauwana baku palo'ndunggi ni panewi ti tu, mabba ni ma kaddai ni ma pamulla 'dukku pamaina." ³⁹ Mabba ni kaddai, Yesus dinna salaku ni'mbasai ni manua Galilea. Na patomanggi ni Pullu ti Sinagoge-sinagoge dangngu na wuddara mangutana-mangutana. Tu Katombu Pa Patanggasa ⁴⁰ 'O ni ni sa'tu ma kat'mbu ma mai ti Yesus,. Na dangngi dangngu na kasokura ti Yesus dangngu na panewi: "ba piapinnisa, 'bau Kau patanggasa wa." ⁴¹ Na kawuddakai ni ati Nai dangngu ni ayi nai Yesus na pa'jolanggi ni lumma na dangngu na ketani ni tu no dangngu na panewi: "Ku bissukadawa, warasawuka!" ⁴² Nggo mema, ni panyaki katombu na, na mallasarri dangngu mawarasaanassa. ⁴³ Yesus Na palewai no tu banna nggesa pa 'bali dangngu na panamu langutakkani. ⁴⁴ Yesus Na pekani no ni tu, "ni madadi nggiana ambai lolukaddai 'amma ti mbe-mbe, ti hengga widdi walli, takka salakuwukka kau patakka wikkina wu ti Imam dangngu kau yawukka tandani 'bau tanggasawu. Sama tu ni pa pareta wainai Musa ni pa patakkanai ti yidda. ⁴⁵ Takka tunisa haina, no ni tu na salaku banna na sabbaranggi na patanyallanggui. Ba tunihaisa, Yesus attana pasungnga wikki amma nakka ti manua haina, takka hammi nissa ti s'mbaliwwu ti manua ma kasika. Tu ammu nisa hai, tu walli ti sa'nge-nge panyia da piamannu badda mai pa elui Yesus.