SURATA NAI PAULUS TUTU 'DA TU MAKERI MURI TI EFESUS Syalam Walli Ti Paulus ¹ Walli ti Paulus mabokulanai Mori Yesus nipa wukku-Nai Muri Allah, tutuda tu makeri ni pawukku-Nai Muri Allah, ma enga na ti Efesus, ma pamannui ni ngara-Nai Muri Yesus. ² Kasih karunia dangngu damai sejahtera walli ti Muri Allah Ama'nda yitta dangngu walliti Muri Yesus Kristus mapawa'nda yitta. Ndewa Kanyurru Ti Dalu-Nai Muri Yesus ³ Ta sailanggi ni ngara-Nai Muri Allah Ama-Nai Muri Yesus Muri'nda yitta nimma ya'ndai ni kanyurru ba atta 'bosa ni ma'ona ti umma kalada-Nai Muri Allah. ⁴ Di keri tunihai, Muri Allah Na pedi'nda yitta ti dalu Ana-Nai Muri Yesus ba attana padadi punggi ni tana, dangngu kapiani yitta batta warrasa dangngu a'mbatta irraka ti saga-Nai Muri Allah. Ti dalu paosa-Nai ⁵ Muri Allah badda katukku nakka waliti kawungngani na 'dedikanda banna tutu ana'ndai Muri Allah. ⁶ Dinna padowi tunihaikasa, kasaila pajagai ni payanai Muri Allah, nippa badda ya juana ti sada nda yitta ti dalu Ana-Nai Muri Yesus ni pa'mbussaNai Muri Allah. ⁷ Ti dalu-Nai Muri Yesus, nimma badda sobugini ra'Na, mullanika banna tanggu bayagi ni ndoku djala nipapa ndowi nda, samatuni yitti ta kolinggi ni muripa nipa ya juana Muri Allah, ⁸ Nippa badda ya Nai Muri Allah ti sada nda yitta go lau nima nganni dangngu ni lakkasa. ⁹ Muri Allah badda pekanasa ni wukkuna ni makabunni, kanna patututnisa pani nipa badda woluna ti atina ni mandassa nippa badda wukkuna ti Ana-Nai Muri Yesus. ¹⁰ Nippa pasalakuna banna tomakassa ni rasini, ka piani ngara'ndukkanari kanna pakasisanari ti dalu-Nai Muri Yesus, ni ma'ona ti umma kalada-Nai Muri Allah dangngu ni ma'ona ti pannu tana. ¹¹ Ti dalu-Nai Muri Yesus yitta ta koli mannu na ngawu waliti umma kalada-Nai Muri Allah "Muripa pakoli 'jua" Nippa badda posana waliti kawunga ni kanna patutu nisa ni pawukku-Nai Muri Allah nippa badda posana, ¹² tuni yitta ma kawungnga punngu ma mannu ni Muri Yesus katta pamalangusa ni ndassa-Nai Muri Allah. ¹³ Ti dalu Nai Muri Yesus, yimmi badda rangngi mannu nisa ni pullu nimma pullu pia ni patakki nda "Injil" ma paluputawwu, dangngu 'batta pawai ti Muri Allah nippa tauna ta'ndai Ngasu M'atua ni palangina. ¹⁴ Ni kaddai ni Ngasu M'atua ni pa keta'nda yitta, lappaka banna tomai ni rasi banna bayagi ni ndoku djala nda, kapiani banna sullu ana 'bali ndai Muri Allah. Katta pamalangusa ni ndassa Nai Muri Allah. Sambaya Nai Paulus ¹⁵ Mullanika, 'bakku rangngikissa ni ngera mandunganni ti dalu ngara-Nai Muri Yesus dangngu ni ndassami ti sada da tu ma atta ndoku djala, ¹⁶ yauwa attaku ku panjamanna pa dangngi ti Muri tutumi yimmi 'bakku namumi ti kirra sambaya. ¹⁷ Yawwa ku sambaya ti Muri Allah, Ama Nai Muri Yesus, Amanni waliti ngara'ndukkani ni mandassa, kanna yaguka ngasu kanyakkata ati dangngu ni palau matami. ¹⁸ Yawwa ku sambaya bakku dangngi kanna patarrangui ni mata atimu kapiani 'bai lakkasanggi ni ma'ona ti dalu pakayeka waina Muri Allah, ngawu ni ma'ona waliti Muri Allah ni ma'ndassa ati tut'da tu ma atta ndoku djala. ¹⁹ Dangngu dirrani ni kaladani kuasa-Nai Muri Allah tut'nda yitta ma pawai kanna patutut nisa ni wandungani ni kuasa-Nai Muri Allah. ²⁰ Ni 'bisa mandingunna Muri Allah nappa takkigi, pa pakaddi wai 'bali-Nai Muri Yesus waliti tu ma badda matina. Dangngu na pama'diddi ni Ana-Nai Muri Yesus ti karasa kawana-Na ti umma kalada Nai Muri Allah, ²¹ nimma risi pa'jaga waliti ngara'ndukkanari ni pa pandowida tu rara, ni kuasa, ni kalua da, ni mapareta dangngu marisi pa'jaga waliti ngara'ndukkanari ni ngara nimma badda 'ona atta ni ammakissa nimma giana, takka tutni nimma hammi. ²² Muri Allah na tau dabbari ngara'ndukkanari ti 'bawa pareta-Nai Muri Yesus nimma katowanggi ngara'ndukkani ni tutuni gereja. ²³ Gereja nikadai ni kalitta-Nai Muri Yesus, ni mappa ndowi dangngu ma pamana'ndai ngara'ndukkanari.