¹ Ni manana, yimmi 'badda mati mukka mullanika ni palanggarami 'dangngu ni ndoku djalamu ni ma nana. ² Ti manana yimmi 'bai salaku 'baikeri ni lara pannu tana 'bau kerini pareta ngallu ni majahat. Ti manggiana 'banna ramma ti 'jonga lakawa 'bua atta pakeri loluna. ³ Ti 'jonga 'da yidda, yitta ngarandukka nda nana 'batta muripa kerilolu ndai ni pambussami ni tolu nda 'dangngu ni pangadda yittana. Yitta samani lakawa-lakawa juraka nda sama 'dangngu tu rara s'wawi. ⁴ Takka Allah ni ma'dedi 'dangngu ni paayina, mulla pa ayiNa ni ma kalada Yinna Na milla nda ati yitta. ⁵ Banna tomakasa ni rasi mati nda mullani ni padjala nda yitta. Yinna Na pamuripa 'bali nda yitta 'batta karangngani Kristus walli ti we maringngi yimmi 'baisa 'di muripami. ⁶ Yinna ma pakaddi nda yitta 'dangngu Yinna ma pa mandiddi nda yitta 'batta karangngani Yinna ti panyia ti awangu ti ngaraNai Yesus Kristus. ⁷ Lappaka toma 'ba hammini Yinna, Yinna 'banna patakkanggi 'dangngui ni pa ayi-Na ni pa aita kira ni ndassa-Na ti yitta ti sa'da-Nai Yesus Kristus. ⁸ 'Dangngu mulla panamunai yimmi 'da pamuripami ti pawaimu takka yimmi aita wallini ti yo wikki, takka wallini ti Allah. ⁹ Aitawu nda rammamui kapia amba ou sa'tu ma pa'jaga wikkina. ¹⁰ Yitta nggiana pawolu-Nai Allah 'da padadina ti ngaraNai Yesus Kristus 'batta pasalaku ni paramma nda ni mandassa ni pasa'ndianai Allah ni mahammina 'dangngu yitta 'ba piani 'batta muripahai 'da linna. Ta Pa Kasisana Ti 'Dalu-Nai Kristus ¹¹ Tuninggiaka, namu yimmi na 'bai 'dadimi sama tu kafir ni patakki'da tu ma aita salla, takka yidda ma takki wikkina samatu tu masalla ni salla ni paramma 'da ti kalitta 'da ni pawolu lumma tu rara. ¹² Namui ni manana, yimmi 'bai muripa ti sa'mbaliNai Kristus na pasewa 'dangngandara warga Israel 'dangngu tu ma tama 'badda randi ni panja'nji 'da 'dangngu ni nja'nji 'da yimmi aita kolimanggi ni pa harapami 'ba aita yinna kakka Allah ti pannu tana. ¹³ Tuninggiaka ti sa'da-Nai Yesus Kristus, yimmi hallu malerumi takka nggiana karangnga 'dammika 'bai tukki mulla ra-Nai Kristus. ¹⁴ 'Dangngu Yinna pungngi damai sejahtera, yitta ni mawolu duada ka'bissu 'dadi sisani 'dangngu Yinna na pa lanyapai ndabbadi ni tembok pamussuna 'dangngu ma pasewa, ¹⁵ 'dangngu ma podasai ni pamussu nda ti tolu-Na, ti Hukum Taurat ni issini pareta-pareta 'dangngu pa 'badda paposa wallini ti sa'da wikki-Na Yinna ma wolu ni ma duadana 'banna 'dadi sisa tu wuddi, 'baisaka na 'dadi ni padamina, ¹⁶ 'dangngu ma padamindara ma duadana 'dangngu Allah ti sisa kalitta 'banna lii ti sarikka lappaka 'ba o'nikka ma pamussuna. ¹⁷ Yinna hammini 'banna pa pekandara ni maringngi malala ti yimmi ma maleru 'dangngu yidda ma marani. ¹⁸ 'Batta lii ti Yinna, yitta maduada aita ta kolimanggi ni lara ma tama ti Yinna Ama ti dalu sisa Ngasu. ¹⁹ Takka yimmi aita tu asing 'dangngu ma mai 'di takka yimmi tu warasami 'dangngu olidadi-Nai Allah. ²⁰ Ni ma pakaddi ti pannu lata 'da Rasul 'dangngu Nabi 'dangngu Yesus Kristus wikki ma 'dadi watu penjuru. ²¹ Ti sa'da-Nai Kristus ti 'dalu-Nai Muri, yitta 'da pa kasisa'da 'banna tumbu ti umma-Nai Allah ti ngaraNai Muri. ²² Ti sa'daNai Yinna, yimmi matangngi pakaddi ndabba ni panyiaNai Allah 'dangngu Roh.