Herodesa Narengngewe Berita taguna Yesu ¹ Ne rapa ne, Herodesa, raja wilayah, rengngewe berita-berita taguna Yesu. ² Monno, nia natekkidawe ata-atana, "Naniaba Yohanesa Pembaptisa. Nia nakedde ba wali barra ata mate monno oro niadowe mukjizat-mukjizat neghe napaghilliwe ne barra-Na." Peristiwa Banamate Yohanesa Pembaptisa ³ Sebab, Herodesa na ghappabaza Yohanesa, ketteni, monno nataini ne gollodana orona Herodiasa., maghinnei Filipusa, oledadina Herodesa. ⁴ Orona Yohanesa pernah bana paneghe barrana, "Dana duakiwe tagumu bumilikiza Herodiasa." ⁵ Monno, lakkakupu Herodesa nabeige pamateza Yohanesa, nia namadauta barrada ata mangeda orona ghidda anggapza Yohanesa bania nabi. ⁶ Ba ka, ne loddo dadina Herodesa nariakawe, ana maghinnena Herodiasa nanego ne aroda ghidda, monno nia napatenangngaza Herodesa, ⁷ lappata nia na aura tagu banaya kalla appakowe ne padengngina na maghinne na. ⁸ Baka, neba pangattaza na innana, maghinne na napaneghe, "Yagawe barragu ni nia, Kapala Yohanesa Pembaptisa ne ponnu nampan." ⁹ Lakkakupu raja namilla, takka orona aurana monno orona ata-ata a ngaa dangngani, nia kaina naparetawe gai hal ne ka yawe. ¹⁰ Nia napatukani taguna bakerrinawe katowana Yohanesa ne golludana. ¹¹ Monno, Yohanesa ngindiza ne ponnu nampan, yanawe barrana maghinne na monno nia nangindiwe barra innana. ¹² Badommo, murid-murid Yohanesa mai, dekewe touna, monno tanege. Bage, Ghidda kako monno tekkinawe Yesu. Limma Kababa monno Duada Igha taguna Limma Rata Ata ¹³ Na Yesu banarengngewe hal neghe, Nia naeru wekkina wali ne nee waina tena, nee paddou karingngi akanuana. Mono, na ata-ata banarengnge ne, ghidda dekuni-Nia waige kako tanah wali kota-kota. ¹⁴ Na Yesu bana louza, Nia naetaza ata mangeda pakuana, monno namanawwara waliate barrada ghidda, monno napalangngadadi karodduka ghidda. ¹⁵ Natti loddo menjelang gedde, ghidda muridta mai barrana Yesu monno paneghe, "Paddou ne karingngiwe monno loddo nazaga bana geddena. Patukadi ghidda ata mangeda kakako nee desa-desa monno ghoi pangaa tagu ghidda douna." ¹⁶ Ba ka, Yesu napaneghe barrada ghidda, "Ghidda da perluki kako. Yemmi, yadi ghidda ngaa." ¹⁷ Ghidda paneghe barra-Na, "Ni nia ghitoo daike ghaina, watteda limma kababa monno duada igha." ¹⁸ Monno, Nia napaneghe, "Mai ngindizi ninia, barra-Gu." ¹⁹ Badommo, Nia napatukadi ghidda ata mangeda madii neponnu ruta, monno Nia nadekezi limma kababa monno ghidda duada igha, bage sambil bana pazarrana ne togolangita, Nia namengucap syukura monno napaddo-paddozi ghidda kababa. Baba ne, Nia nayazi barra murid-murid-Na, monno murid-murid-Na barra ata mangeda. ²⁰ Monno, ghidda ngarakua ngaa monno pabekutazi. Bage, ghidda dekezi paropo-paropo a rei, ghaide kabullu duada kadoge bonnuna. ²¹ Monno, ghidda ngaa kira-kira ghaide limma rata kabani-kabani, da tamakipo maghinne monno lakawa-lakawa. Yesu Nakako ne Ponnu Wee ²² Yesu napangattazi murid-murid-Na tama ne tenadana monno kako ulluni-Nia ne bali, tangngara neena patukadi ghidda ata babali. ²³ Monno, nebaba Yesu napatukadi ghidda ata mangeda babali, Nia na penne kanua ne ponnuna kaladdakana monno tabaya. Ne bana geddege, Nia nakanuakidona ne nee. ²⁴ Ba ka, na tena namarro ba wali tanahmarah, akudda-kuddakani gelombang orona berlawanan dangngani paringngi. ²⁵ Monno, ne jam pakapata ne gedde, Nia namai barrada ghidda, nakako ne ponnu wee. ²⁶ Netti ghidda muridta etaza-Nia banakako ne ponnu wee, ghidda madauta tetakka monno berseru,Nammi wanne!" Bage, ghidda kabuara-kabuara orona madauta. ²⁷ Ba ka, Yesu langsung bana paneghe barrada ghidda, ghinnage-Nia, "Paghezzige atemu! Neghe Zauwadona, ammana pamadauta." ²⁸ Monno, Petrusa napaneghe barra-Na, "Mori, niaka ne Ghou, patukaga zauwa kako barra-Mu ne ponnu wee." ²⁹ Yesu napaneghe, "Mailolo!" Baka, Petrusa nalouza wali tenadana, monno kako ne ponnu wee, monno mai barrana Yesu. ³⁰ Takka, ne baeta paringngi, nia namadauta monno zaga tadanena. Nia nakawaro. "Mori, pasalamataga zauwa!" ³¹ Yesu nabona bana padoladi limma-Na, terreni Petrusa, monno paneghe, "Yemmi kurang atewaina, appane yemmi biragu-ragu?" ³² Netti ghidda batama ne tena dana, paringngi kaina nakadanna. ³³ Badommo, ghidda a ghaina ne tenadeta kaghodoni Yesu monno paneghe, "Ghinnatakkana, Ghou dona Anai Mori!" Yesu Napalangngazi Ata-Ata Karodduka ³⁴ Nebaba papala, ghidda dukki nee tanah Genezareta. ³⁵ Natti ata-ata ne paddou ne apaddeni-Nia, ghidda tekkinawe ngarakua daerah ne monno ngindi ngarakuazi ata a karodduka barrana Yesu. ³⁶ Ghidda dengngiwe barrana Yesu gai katodowe uppu jubah-Na, monno ngarakua ata todowe ba langngana.