¹ Paulus sino, ngoji manena ma Jou Madutu dema Kristus Yesus ai susuloko, labari mamaiman ifero nyawa-nyawa salaku ma Jou madutu ai ngingiriki de janako ibobanari la ijatuda ke jaloloaika. ² Supaya ona jamake ngonganono de ango ikokakali, de jaji manege dunia lo idadi wasi de jokulaiua. ³ Maorasi imasiadono, ma Jou Madutu osi sapolo ai demo de ai pareta salaku tongone na juruselamati. ⁴ Ngoji talefo surati kengonaika Titus, mangale ngona manege igogoungu maruka tongoji aji ngowaka, cocatu de damai ma Jou Madutuino, mia ama, de Yesus Kristus mia Jurusalamati. Titus ai manarama ojairiki jamaati mabalusu dokama Keretaka. ⁵ Karana tomanenalah ngoji tinimaja dokama Keretaka, la deaje ngini nisisoboloto okia jaaturu de ijagoraka jamaat mabalu-balusu dokama bendarioka toimatitingakika, maruka kangoji tobejejongo ngona ika. ⁶ Una harusu ua omasidodorouku, mamawejeka kamoi, mamangowaka bulasu jongaku, mamaango bulasu itiahi, de ua jopopoloi. ⁷ Sababu odadi, jamaat mabalusu, ua akana dorou, mangale una manege ma Jou Madutu ai leleaini, ua imalohi, ua ijatabadojata, ua ijadadaluku, ua jo popoloi, de ua ija totokana de ononu untung. ⁸ Ikilioro jakaino, salingofu ona wojasingosama wolaino, womagae tojaloloa, isiodaka isinonu maakali, adil, itetebini mamaango, de isiodaka mamaroese jojaga. ⁹ Una bulasu omasigocoho japuturungu demo-demo ika de jongaku, de okia dodotoko mademo ika, sahingga ijaike mangale de jamoteke dodotoko isesehati, de ona ijatawanono jotabacacapuaika. ¹⁰ Sababu, nyawa kaijangoe ona jo popoloi, de kajososomoa, de jotitipu, de ona manege mama asali sunat maaturan ja momoteke. ¹¹ Ona paralu mama uru isikatamunuku mangale ona isi susa mama keluarga ijangodumu de dodotoko ijasi dotokua, mangale ijagakana ona ijamajeke. ¹² Omatengo manege omasiromanga nabi, de una otemo, bari Kereta nia nyawa ijatotagarongo, maruka ka binatang iruruta, de jatotokana de ipopamalas. ¹³ Carita manege igogoungu, sababu manege, bulasu nijatawanono nimapoputurungu supaya isehat toona mama iman. ¹⁴ Ua ni isene carita igogonguwa Yahudi mamanyawa ino de toona mamapareta bari jatarimauwa ibobanari. ¹⁵ Nako sojaloloa, ingodumu jaloloa, de nagongo jofafaja de jongakuikauwa, kamoilo jaloloa meia, mamapikiranioka de mamasinyiaka, tomanegelah jatotorou. ¹⁶ Ona imangaku ma Jou Madutu inako, tapi de toona mamaparabuatang kaimasipongono ma Jou Madutuika, ona manege imaporosono, jotaatikauwa, de ona joholuku jakana okia to jaloloa.