Mate Oro Jala Monno Morha Oro Kristus ¹ Hil agada kahoi yitta hatakda? Nadadi ka'kwe yitta bada hakitana raina kajala tanammu kanyuru kanna majabola we? ² Enga walle tauda da'kmage! Agalinna da'kmawe yitta kabadda mate orodoku jala bada morha dalho tajongana? ³ Walem tadadamawe miyo oroge yitta tangngada pahariha tajonga mate Nai Yesus Kristus haparihabe tajonga mateNa? ⁴ Oro bataudage, yitta datani ole dangnga bedan-Ni nedo baharihada ta mate-Na; tannamu kataudana Yesus banaka'de wali ta jonga ata mate ledege manada Nai Ama, yitta wi'kna bada kako ta morha pahha beru. ⁵ Oroge, inne yitta da'kha ole dangnga bedan-Ni kahatu'ja tamate-Na, yitta wi'kna engadahwu ole dangadan kahatu'ja takaddeNa. ⁶ Yitta da tadawe hada ata mema da yitta ba'da kadailo haolen Kristus monno tauda jalada yitta walle nabungnga ma'kwe tannamu yitta walle ha ata wi'kna takajala. ⁷ Oroge, ngaradukka na ata kamatebe, nyi bada hatol kayi wali ta'kajala. ⁸ Batauge, nyi yitta bada mate olenNi Kristus, yitta dahatenawe yitta da morha danga-Ni. ⁹ Yitta da tadawe oroge Kristus ba'da haka'de Yi wali tajonga ata mate walle na hillu mate'ma; inne mate walle natailo'man-Nyi. ¹⁰ Oroge, ne mateNa, Nyi na mate oro jala hadakka henna kaha wali murri, tabollo tut ge ha'da morha na inna, Nyi na moriha tut Nai Allah. ¹¹ Katauda jallanage miyo, miyo pa'da wi'ki dahona oroge yauwu ba'da matemu ta jala, monno morha'daho tubai Allah ne'do tai Kristus Yesus. ¹² Oro nyiduwe, iam pahaikage kajala banna tailo guge tauwumu ka ak'ta lodoge miyo bammu dokuge hakabu atena. ¹³ Monno illam pahai'dummodi tangngadi kadana ta taumu banna waidi kajala. Tabollo, yidauwe taumu tai Allah tamorha walita tajongada kamate, monno tangnga ge tuba taumu kana da'we bana waigu Allah. ¹⁴ Oroge, inne kajala walle na tailo magu'ge tauwumu oronage miyo wallem hillu morha da'k mami ta kabbu Ukkupareha Taurat tanyiduwe ta kabu manawara. ¹⁵ Bege, agadahoyi harayida? Na dadi kawe yitta bada rayina kajala oronage yitta ba aida morha takabu Ukkupareha Taurat, tabollo takabu manawara? Engnga walle da'kma! ¹⁶ Miyo engam tadahingwe oromiyo bamu pahaddege taumu ba ata gemi kamma nono tabara wuyo waleka wu ata miyo na da'kwe banna ata gimmi tabara na nyio inne miyo hadau manono mi; tabara kajala ka kodogimmi ta tamate dangnga, ai walleka tamanono kaha'arogimmi katena. ¹⁷ tanyiduwe, Mahadi tabarai Allah miyo nut na ha'atana jala, nabatauge bammu manono waige ate kabanna tabara tangadi pudi hanuwa pahanuwabe tabaramu, ¹⁸ monno, oronage miyo behalohta bemi wali taka jala, miyo na ata gimmi katena. ¹⁹ Nauwa patakada kade ata oroge lo'ja ge kanamu. oroge katu'ja kaullu miyo harakage tauwumu ha ata na kamanyaraha. Monno kajapata kahangabe tabara japata karehi di korawu, batauge harakage taumu kanadadi ata gimmi katena hadukawai katenga. ²⁰ Oroge, miyo bana ata hogimi jala, miyo umtol kami wali taka tena. ²¹ Nyiduwe, aga'dawe ha utumi wali tabaradi tangadi hamake dangami batauge? Oroge, hadukka wai wali tangadi nyiwe mate. ²² Tanyiduwe batauge, kolebahatolkadi wali tajala monno bana ata gimi Allah, miyo umkolege wuge kamorha monno hadukka waige ²³ morha aikamangdukkana inne lari tabarai Yesus Kristus, morda yitta.