(Langta Beru Mono Panu Tana Beru) ¹ Bewalge, nauwa ug etawe langta beru mono panu tana beru. Oro, langta kawungana mono panu tana kawungana na bunga bewe; mono bannu dumo wale hilu lakmage lage. ² Loho, nauwa ug etawe wu harona katenguna, Yerusalem Beru, burru wali ta langta, wali tai Allah, mono paha inyabe katujana bau winne kaha ummana kalewu tutu laina. ³ Nauwa ug rangewe liyo kama wangta wali hadau ngodona kalinna," Etawege, Rabonai Allah dage ta jonga kadadi ata. Nyi enga engana ta jongada yidda enga dadi ana huhuNa. Allah dau enga dani ta jongada yidda mono dadi Allahda yidda. ⁴ Nyi enga hopi nadi tangadi we mata wali ta matada yidda mono mate wale hilu lakmage lage, wale hilu lakmagela kalallu, hoyo, waleka liwe kalawara oro katinyo ba haipa bewe." ⁵ Nyi ka ngodo taha dau ngodo nada linnage, " Eatayige,Nauwa hadadidi tangadi beru!" LainNage lage," Tolhawe inne oro hanewe inne paha tenawe mono tenawe." ⁶ Bege, Nyi linalge tabaragu," Bebewe! Nauwagna Alfa mono Omega, kapuge mono kaha dukkawe. Nauwa enga yigudi ha enu tabara tangada ata kama riyo wali ta mata weyo kamorha ai kamangu hina. ⁷ Nyi katailo enga daunage tangage inna; Nauwa enga dadi Allah daga mono nyi enga dadi ana Gudi. ⁸ Ta nyiduwe, yidda ka madauta, aika hatena, mono japata katappa; kahamate ata, ata popara, tagu hamorro, tangada kahatena hala hatu, mono tangada kangidi hanewe paleka enga da kolena dauda yidda lari tabannu karewo oro latti mono kajuju jawa. Inna yiwe mate ka dudana.' (Yerusalem Beru) ⁹ Bewalge, wu wali pittu malaikat kanarrona pittu koba wepa enu kabanuna lohho pittu kadadi murrige inna amige mono linage tabaragu," Maige, nauwa kagu hatingo guni tabaramu bau winne kaha ummana, ole ummana ana bebbe nada." ¹⁰ Loho, nyi na ngidiwa lari ta Waddi aro ta wu letena kahadda madakka mono madehta, lohho hatingo gage tabaragu harona langna inna, Yerusalem, kaburru wali ta langta, wali tai Allah, ¹¹ banuge manadanai Allah mono magakaha tujai watu malilaka kahadda bikta hina, tujai watu yaspis, kahira tujai kristal. ¹² Harona inna dage gallu watuge kama dakka mono madehta kabulu dudadi binna kallage. Ta binna kalla inna dadi kabulu duda malaikat mono ngara na matolhayi kabulu duda kabihhu ata Israel. ¹³ Dadi tauda binna kalla tabara laddo koka, tauda binna kalla ta utara, tauda binna kalla ta selatan, mono tauda binna kalla ta laddo mali. ¹⁴ Gallu watu harona inna mangu kabulu duda watu halinnde mono ta panu watu halidde rada matolhayi ngara kabulu dudana rasul Ana Bebbe. ¹⁵ Malaikat naha newe tabaragu nada kanarrona takko ha ukra wai harayi wali ta amaha rara tutu ukkrage harona inna, binna kalladi, mono gallu watudi. ¹⁶ Harona inna na malauwe, malauge mono lurage nahamerawe. Nyi na ukrage harona inna waini takkona, kabulu duda rata stadiawe; maluge, lurage, mono madehtage hamerawe. ¹⁷ Loho, nyi na ukrage harona inna, ngahu pata kabulu pata hastawe, dokuge ukra kadadi ata, malaikat jala ka ukrage. ¹⁸ Gallu watu harona inna harayiwe wali ta watu malilaka yaspis mono harona inna harayiwe wali ta amaha rara tiyo, kakage tujawe kanino. ¹⁹ Puge gallu watu harona inna harayiwe wali ta tangage watu malilaka kabikta hina. Watu puge ka wungana yikna watu yaspis, ha duda wai watu safir, hatauda wai watu mirah, ha pata wai yikna watu zamrud, ²⁰ halima wai watu unam, ha anni wai watu sardis, ha pitu wai watu ratna cempaka, ha podo pata wai watu beril, ha bani dihha wai watu krisolit, ha kabulu wai watu krisopras, ha kabulu dihha wai watu lazuardi mono ha kabulu duda wai yikna wayu kecubung. ²¹ Kabulu dudana binna kalladi yidakna kabulu duda mutiara, nahiyi binna kalla wuyo mutiara ha rayi wai. Lara ta harona inna harayiyi wali ta amaha rara tiyo. tujai kanino hira. ²² Nauwa wale gu etak mawe Umma Allah ne lari taharona inna oroi Mori, Allah kahada bikta parehana, mono ana bebbe nyi dau heki ta Umma Allah inna. ²³ Harona inna wale na yannak mawe mata laddo waleka wulla kaha magakahage oro manada nai Allah kaha magakahage harona inna mono Ana Bebbe yikna lattige. ²⁴ Kabihu ata enga kakoda tama gakaha harona inna mono rajada ta panu tana enga da ngidiwe kama nadana ta yidda neda lari. ²⁵ Binna kalladi wale kalli tonik mayi bana laddoge, mono wale lakma gaddi neda bali. ²⁶ Yidda enga ngidi dage manadana mono pa aka kabihu ata neda lari taha rona inna. ²⁷ Tabolo, wale lakma wuakki ka paita katama taha rona inna, tauda dumuge ata karayige hada aika dahha waleka kawohhoka, tabolo kadukka ngara dahena kama tolha lari ta Jurata Morha Ana Bebbe.