Pahha Dinyakannai Yohanes ¹ Inne Yoda dau kapuge li ege ate Yesus Kristus Ana Allah, ² katujawe kama tulha tajuratanai Nabi Yesaya: "Toroy la Ug halewa gunni ledu limma-Gu nyiyo kaha hadhinyaka guni lara tangam-Mu. ³ Dage li ata kaka kawula tamarada gilra, ha dhinyakayi lara tutnai Mori, halurhanani laranai Mori. ⁴ Yohanes, nahariha ata tamarada gilra monna nakawula yiwe taumu kaharihau loppo jarrawu harayina kajapata. Tangkahada ata Yudea, ⁵ ata Yerusalem ammiddi tabarai Yohanes. Nyi naharihai ra ata ta laiwe Yordan badda mangak ge jala harayida. ⁶ Yohanes na waina wullu unta monna kalarbagge lita monna nawojelage ta kabuna. Hayana kabala monna we kanena rami. ⁷ Yohanes nahanewe, tabalig nauwa ammin na wu ata karehi kawahana wal tabaragu. Nauwa waleg marakka mawa kangaka dahoni monna bugera naddi kalar kopaledu-Na. ⁸ Nauwa ug hariha waigim we, tabollo Nyiyo nahariha waigimmi Wad Bihha. Yohanes Na Babtisuyi Yesus ⁹ Monna, na dadiwe neda laddo, Yesus ammini walta Nasaret, loda Galilea, monnai Yohanes naha rihaiyi Yesus ta laiwe Yordan. ¹⁰ Kole ban-Na huna walla ta weyo, Yesus na etawe langta banna mabugerawe, monno Wad Bihha na tujayi kawurru merpati burru ta bara-Na. ¹¹ Monna narangewe li walta sorga, "Yau Ana hamanawara-Gu, tabara-Mu ug yiwe ngihi ate-Gu. Yesus Nakabaniyi Kabalka ¹² Kole banna langngage, Wad Bihha na ngidiyi Yesus ta maradda gilra. ¹³ Nyiyo engana ta maradda Gilra namonyage pata kabullu lado. Monna ammini kabalka bana kaba-Ni. Yesus dani ta tillu ranga bani, monna ammidi Malaikat badda tulun Nyiyo. Yesus Natalaragge Injil nai Allah ta Galilea ¹⁴ Kole Yohanes ba ta gallui, Yesus na kako ta kalinggora Galilea monno Na talarage li nai Allah. ¹⁵ Nyi nahanewe, "Dig'ge rah ge, kalinggora harehanai Allah banna dagetawe. Jarram haraina kajapata monno hatenawe na li ege ate". Yesus Napedeyi Rade Kapirrana Ana Hakodo Halolena ¹⁶ Na kakoi Yesus ta huppu hoba Galilea, Nyi na etai Simon monnai Andreas, olebaina, tangrada badda wewuwe jalada ta hoba oro nage yidda bamajala dage kaboko. ¹⁷ Beggei, Yesus nahanewe ta barada yidda, "mai doku Ga, tannam kag hadagim mi kamajala ata" ¹⁸ Simon monnai Andreas da tannad jalada yidda monna da dokun-Nyi. ¹⁹ Kole badda kako kamma rau hodi, Na etai Yakobus, ananai Zebedeus, monnai Yohanes olebaina, ka dana ta tena monno tangrada badda hamadwe jalada. ²⁰ Beggei, Yesus namaikaddi yidda monna yidda datannani amada, Zebedeus, ta tena oled rade ata pahewana monno dakako, dadokuni Yesus. Yesus Tatillu Hanuwana Banuni Kuaha ²¹ Begge, yidda dadikki ta Kapernaum monno badiki na lado rahi ngahu, Yesus na tama nedo ta Sinagoge monno naha nuadi. ²² Daha hangatra rangewe inna li hanuwa-Na banna hanuwadi tujdai na wu ata kamannu kuwahana, walna tujamayi ra ahli-ahli Taurat. ²³ Ne ta sinagoge dani na wu ata kabani hatamanana wad jabata monno nakawula, ²⁴ Linnage, "agai ha orham tabaram Yau monno nami, Yesus kawali ta Nasaret? Yau bamu maiyi kag hokudi lumgamma? Nauwa tadawe ba iyau Yau. Yau ka murraha waltai Allah!" ²⁵ Tabollo, Yesus nahagaktaiyi, lina-Da "kadanawu" huna wal ta na ata!' ²⁶ Kole na wad kajapata banna kunyakanni monno bana kawula loppo waige li-Na kamadaka, huna wad jabata wal ta tauna. ²⁷ Tangkahada da hangatara-Ni ma tomage badda kanukka-nukka wikna yidda, malidage, "agawe inne? wuwe hanuwa beru banna waige kawahana! lohho Nyi naha rehayi rak wad japata da kangakka ta bara-Na." ²⁸ Begge, na geha diktakawe tutna Nyiyo namahabarawe tangngage ta loda Galile Yera Lawayinai Simon monno Ata Buta Hataggahayi Yera Lawayinai Simon monno Ata Buta Hataggahayi ²⁹ Kolei Yesus monno oled ana hakodona badda tannage na sinagoge, da tama ta ummanai Simon monnai Andreas, oleddi Yakobus monnai Yohanes. ³⁰ Tabollo yeranai Simon tangra baika nage oroge banna kalikka, begge daha legewe badda takina ge Yesus. ³¹ Yesus na dikkini monno na naronani limmana mo natulluni banna hakadeyi. Bataudage nedona bungnga memawe kalikkana mo na lawaiyi halegenage banna hamadiyi. ³² Dikge banna gadi'ge, banna tama mata laddo, yidda da ngidkahayi ra ata mo hatamawad japata. ³³ Kolege, tangakahada ra ata kadana ne taha dauwu, damakahha ne ta aro bau binna. ³⁴ Yesus nahatagahadi ra ata kalawara tangga ngara lawara monno butayi kabalka hawuga-Na. Tabollo, naheridi ra kabalka ha newe, oronage badda tadai-Nyi. Yesus Nasembayang monno Todotalaragge Linai Mori ³⁵ Ko-koka gaula, banna kapagtahoge, Yesus nakadde monno kako tawu hadau kahika, bekna sembayang-Na. ³⁶ Kolenai Simon monno ra ata wadeka oledna dama yeganni Yesus. ³⁷ Kole badda etaiyi Yesus da hanewe, "tangkahada ra ata dama yega-Gu!" ³⁸ Begge, Yesus nahanewe, "maiyi kadda kako neda dihha harona-dihha harona tannam ka-Gu intage todo talarage ta barada ra ata redo ball. Oronage, nyidawe kappege bagu Maiwa." ³⁹ Nyidauwe, Yesus nakako kahage tangngage loda Galilea. Na talarage li nai Mori ta sinago-sinagoge yidda monno wuggayi tangngadi rada mortana. Ata Kusta Hataggahayi ⁴⁰ Bewali, dani na wu ata kalawara katobi na maiyi ta baranai Yesus. Nahaohayi monno takkodi kuddona ta barana Nyiyo banna hanewe, "Yau bam aukaduwu, Yau nadadiwe bam hataggahaga nauwa?. ⁴¹ Manna maregawe ate-Na oro manawara Yesus nahanyokatani limma-Na monna j'oj'ayi na ata monno hanewe, Nauwa nyigauwa naba tauge kamu taggahawu!" ⁴² Nadadi memawe kalawara katobina banna bungawe kalarana monna na ata natagaha. ⁴³ Yesus nahalegewe banna halewayi na ata kako monno ha ape takkanage. ⁴⁴ Nyi nahanewe tabarana, "illa dahingkanna dau takmuge langka iyyadahingkai tutge inne. Tabollo, kako hatingngoge taumu tabara rato monno yiyi marakammu oroge bam taggaha kataudana hataknai Musa tannam kanna dadiwe wu li hatujja tabarada." ⁴⁵ Tabollo, nadde ata na kako monno nahalegewe banna talarage banna bugerage lohho nahabbarage na li walle nahilka bunyimawe. Oro bataudage, Yesus wallenahilluintama tama banna hatingngo wik takkana ne taharona, tabollo dani tabal ha'du tahadau kahika. Tobollo ra ata kawal ta diha hadau-diha hadau engage badda maiyi tabara-Na.