Yesus Naha Lewayi Tangada Ledeli-Na ¹ Bege, Yesus naka maikadi kabulu duda anaha kodo-Na nyiwe na yidi yidda bikta pareha mono li dete ta tngadi waddi japata, mono dummo ha tagaha kalawara. ² Nyi naha lewayi yidda talarage liyo tutu Kalingora Parehanai Allah mono hatagahana. ³ Linage-Nyi tabarada yidda, "Ilam ngidi kami aga ana nutu bamu kakomi, ilam ngidi kami takko, kaleku, kababa, amaha, waleka duda balla kalabbe. ⁴ Langka gi umma hingu kana miyo bamu tama, daumi neda bali kahha bamu kakomi wali taha dau nedda. ⁵ Tutu da yidda ai ka au hibami, tanage harona inna mono kabahayi kabka wali ta ledumi ka wuwe tadka tabrada yidda." ⁶ Bege kako dage lede lina mono nahiyi deha-deha hagapege talarage liyo ege ate mono hatagaha ata kalawara langka gika. Gela Gagganai Herodes Tutu Nai Yesus ⁷ Herodes, ba raja kalingora, rangewe tutu tangadi kadadi mono nyi manikkiwepaha ngadana oro kapirana ata takkiwe nadai Yohanes Pembaptis na kaddebe wali ta jonga ata mate, ⁸ mo wadeka lidage Elia na hudda haggabe, mono da dummodi ka linna wu wali tangada radda nabi ka morha nutuna ullu hoge na kaddebe. ⁹ Herodes linage, "Nauwa ug lai benage katakkuna Yohanes. Nyiwe, iya dummoyi ata tutu-Na haragegu liyo katauda hinguna inna?" Nyiwe, Herodes na kabu atege tabo kayi Yesus. Hayadi Limma Rata Ata ¹⁰ Kole tangada lede lina hagga, yidda da takkiwe tabrai Yesus tutu tangage parayi beda yidda mono Nyi na lekoyi yidda pa lihikke wikina ta wu harona ka ngarana Betsaida. ¹¹ Ta nyiduwe, ata buta katadawe kadadi inna mono yidda dummo dokuni-Nyi. Nyiwe, hagapege hibba tayi yidda, Yesus naha newe tabarada yidda tutu Kalingora nai Allah mono dummo yidda kabaina tagaha. ¹² Kole ba manari gaknage kabulu dudana ana hakodonai Yesus ammidi tabara-Na mono lidage, "Halewayi ata radda kako ta harona mono ta deha ta kalingora inne kada mayegana hadau dauda mono hayayo oro taha dau inne dau dada yitta hadau kamarauwe." ¹³ Ta nyiduwe, Yesus linage tabarada yidda, "Mi dahho ka yidi hayada." Balehawe ana hakodo-Na "Kadan ta nami limma hedi kababa mono duda hedi kaboko, dukka dahege inna nami bama kako ka hiyo hayayo tutuda tangada radda ata." ¹⁴ Neda bali dadi limma rata ata kabani. Yesus linage tabara ana hakodo-na, "Halewayi yidda ngodo ha kalibbona, limma kabullu ata dihha kalibbo." ¹⁵ Nyiwe yidda dummo dokuge hatakki nai Yesus mono halewayi tangada ata radda ngodo. ¹⁶ Nyiwe, Yesus ngalayi limma kababa mono duda kaboko radda, na tangara ta langta, naha maringiyi, na hibiyi, mono na yiyi ta anaha kodona dajalage yidda kada baweyi tabarada ata buta. ¹⁷ Mono, yidda tangada da yayo kahha bokta. Bege, karehi kole ba kahhayi kadibkadi kabulu duda dayi kawukata ka banuna. Petrus Mangakuni Yesus Bai Kristusuyi ¹⁸ Wu hadakka, kolei Yesus tamrana sembayang meha, anaha kodo-Na da oleni-Nyi. Nyiwe, Nyi naka nukkayi yidda, "Iyawa Nauwa inne dokudi ata buta?' ¹⁹ Belehada yidda, "Yohanes Pembaptis, wadeka lidage Elia, mono wadeka jalla dadi kalinna Yau wuwu wali ta jonga nabi-nabi wali ullu hoge ka kadde hagga." ²⁰ Bege, yesus linage tabarada yidda, "Tabolo, dokuge miyo, iyawa Nauwa?" Bale hawei Petrus, "Yau yauknai Kristus wali tai Allah." ²¹ Ta nyiduwe, Yesus daha namu dage yidda mono harehayi yidda ilda takkiwe ta iya hingu kayi tutuge inna. YESUS NA TAKKIWE MATENA-NYI ²² Bege, Yesus linage, "Anana Kadadi ata na mayilla ha buta hona mono da tulla rani bai ata, rato-rato kapala, mono ahli-ahli Taurat, lodoge hamateyi mono enga hakadde haggayi ta laddo hatauda waiyi." ²³ Yesus linage tabarada yidda tangada, "Nyi wu ata kabu atege dokuga Nauwa, nyi na ka ballu dahoge tau dauna, mono na dita daho gani yayu hadailona nahiyi laddo mono dokuga Nauwa. ²⁴ Oro, iya hingu kayi kapa hoilawe ngahuna, enga bungage ngahuna. Ta nyiduwe, ba iya hingu kayi ka bunga ngahuna orogu, Nauwa, nyi enga hamane maranage. ²⁵ Agawe utuge nyi wu ata bana kole kahhage panu tana, tabolo mate waleka bungawe ngahu dauna? ²⁶ Tabarana ata kamakke orogu Nauwa mono hatakki-Gu, anana Kadadi ata dummo enga makke danga nani ata nadda kole Nyi ba ammini lari ta manada-Na mono manada Ama-Na, lohho tangada malaikat katenguna. ²⁷ Nauwa ug takkiwe katau takkana tabarami, dadi kapirana ata ta jongami kadede taha dau inne aika mate aina eta dahowe Kalingora nai Allah." Yesus Na Oledi Musa Monoi Elia ²⁸ Kole, podo pata laddo bana hadikkigei hanuana-Nyi inna. Nyi na lekoyi Petrus, Yohanes, monoi Yakobus panne ta letena sembayang. ²⁹ Kolei Yesus bana sembayang, hadage mata-Na naha jeluge mono kalabbe-na dadi kaka magilla tadi. ³⁰ Bege, da dedala duda ata kahha newe dangani- Nyi. Kadudana ata radda yidaknai Musa monoi Elia, ³¹ kaha dedala wikina lari ta manadana mono hanewege tutu matenai Yesus pa geha pannuwe ta Yerusalem. ³² Ta mahiggo inna, Petrus mono olena tamrada kalubudi dura ngodo ai ka anana, tabolo kole yidda bada walla hadahhana, yidda da etawe manadanai Yesus mono duda ata kadede ole dangani Nyi. ³³ Kolei Musa monoi Elia bada tanani Yesus, Petrus linage, "Guru, dahhawe yitta bada engana taha dau inne. Nami enga hadedema watu tallu buyo kereka, Wuyo tangamu, wuyo tangani Musa, mono wuyo tangai Elia." Ta nyiduwe, Petrus wale na madammuk mage agawe inna hatakkina. ³⁴ Kolei Petrus bana takkiwe innage, ammige karabba kurrudi yidda dajalagei Petrus, Yohanes, monoi Yakobus da madauta dali kole yidda bada tana dali takarabba inna. ³⁵ Bege, dage liyo wali taka rabba ha range inna, "Yikna Ana-Gu, Nyilage ha pede-Gu, rangeyi Nyi lage." ³⁶ Kole li inna ngahuwe, Yesus meha kige tauna. Yidda da kabunyige mono wale da takkik mawe ta wu ak ata ta laddo inna tutu agawe ha etada. WU LAKAWA KABANI PAHOILAYI WALI TA WADDI JAPATA ³⁷ Damma hege tana, kole yidda burru wali ta letena, ata buta ammidi tabarai Yesus. ³⁸ Wu ata wali ta jonga ata buta inna kawula. "Guru, nauwa ug rainoge tabara-Mu, elok gani anagu oro nyiheki anagu. ³⁹ Etaila, dani waddi japata ka kalubbuni, mono ha yaddawe nyi nakawula. Waddi nadda dummo na kik kani dajalage bana na kawurra kage, waddi nadda naha pakha ha ngatani mono wale na auma tanani nyi. ⁴⁰ Nauwa nauwa ka rai bewe ta ana hakodo-Mu kapiku wugga dani, tabolo yidda waleda damukkak madi." ⁴¹ Bale hawei Yesus, "Ta, miyo dalara ata kadabbo hatenana mono kajallora! Pira hoge madige Nauwa bagu ole gimi mono bagu maloyawa tabarami? Ngidi gani nammi lakawa nimmi." ⁴² Kole lakwa nadda dahhe kayi Yesus, waddi japata nadda na pakba hani ta tana mono na kik kani. Ta nyiduwe, Yesus naha gagtayi waddi atora nada, ha tagahayi lakawa kabani nadda, nyiwe pahaga nani ta amana. YESUS NA TAKKIWE MATE-NA ⁴³ Tangada ata bangara inna bikta parehanai Allah, tabolo kole yidda bada hangatara ho ta tangage hada inna harayi nai Yesus, Nyi linage tabara ana hakodo-Na, ⁴⁴ "Rangewe hadagela hatakki inna: Anana Kadadi ata enga yiyi ta limmada kadadi ata." ⁴⁵ Ta nyiduwe, tangada ana hakodo wale da yapak mawe ngihige hanewe inna, mono hada inna kabilage tubada yidda dajalage yidda wale nadadik mawe yapawe. Ta nyiduwe, yidda da momo kanukkawe tai Yesus ngihige ha newe inna. IYAYI KAHADA BANNINGNA? ⁴⁶ Wuha dakka, dahha lummuge ta jonga ana hakodoi Yesus tutu ba iyayi ka hada banningna ta jongada yidda. ⁴⁷ Ta nyiduwe, Yesus na tadawe paha ngada ta ateda yidda, nyiwe na ngalayi wu lakawa marraha mono naha dedeyi ta tibbi-Na. ⁴⁸ Nyiwe, Nyi linage tabara ana hakodo-Na, "Ta ngana ata ka hibayi lakawa marraha nadde lari ta ngara-Gu, nyi na hibbawa Nauwa. Monno, iya hingu kayi kahibba-Wa, nyi dummo hibayi-Nyi kaha lewawa Nauwa. Oro, kahadda li bawa ta jongam miyo, nyikna ka hadda banningna." YIDDA KAHA MERA ⁴⁹ Yohanes na bale hayi-Nyi mono linage, "Guru, nami ma etayi wu ata kawugayi waddi japata lari ta ngara-Mu mono nami kababu atege pangahuyi nyi oro nyi kalibbo dani yitta." ⁵⁰ Ta nyiduwe, Yesus linage tabarana, Ilam pangahu kayi oro iya hingu kayi ai ka gaba gimi, nyi ole mini.' YESUS DA TULA RANI TA SAMARIA ⁵¹ Kole rahige manari dagge tanage tubai Yesus ba hama dehtayi, Nyi naha didarawe atena kako ta Yerusalem. ⁵² Nyi naha lewa kapirana ata ulluni Nyi. Nyiwe paha lewa rada dummo kako mono tama ta dihha wu deha ta kalingora Samaria tutu ha inya kawe tangage tubana Nyi. ⁵³ Ta nyiduwe, ata taha dau nedda wale da hibak mayi Yesus oro Nyi tamra aro dage ta Yerusalem. ⁵⁴ Kole ana hakodoi Yesus, nadai Yakobus monoi Yehanes, etawe hada inna, yidda lidage, "Mori, appa yau kabu atege nami kapiku harehawe latti burru wali ta langta mono ha karhadi yidda?" ⁵⁵ Ta nyiduwe, Yesus gilaka kage lirana mono takki dage yidda. ⁵⁶ Nyiwe, Yesus mono ana hakodo-Na kako ta deha heka. Kama HapaTuba Dokuni Yesus ⁵⁷ Kole yidda bata larayi, dani wu ata ka linna tabarai Yesus, "Nauwa ug baige dokugu Yau ba gihinu kagu Yau dau kakom." ⁵⁸ Yesus dummo linage tabarana, "Ranga daho liyo dau dauna mono kawurruna daho hadduna. Ta yiduwe, Anana Kadadi ata wale lakma hadau ngahuNa." ⁵⁹ Yesus linage tabarana wu ata wadeka, "Dokuga Nauwa!" Ta nyiduwe, ata nadda linage, "Mori, pahai toga nauwa kako tani ulluni amagu." ⁶⁰ Ta nyiduwe, Yesus linage tabarana, "Yammadi ata kamate tanini ata mate yidda, tabolo mi um kako dahomi mono talara dahoge tutu Perdehanai Allah." ⁶¹ Mono, dani wu ata wali ka linna, "Nauwa ug dokugu Yau,Mori, tabolo pahai toga nauwa hanau ullu toyi ole baigu." ⁶² Yesus linage tabarana, "Wale wu hingmana ata ka ijalay limmana ta bahhi karekata, ka gilla ka dahho ta lirana, ka tuba tutu Perehanai Allah."