Yesus Naha Lewayi Pitu Kabulu Kadokuni-Nyi ¹ Be innage, Yesus naha didarayi pitu kabulu ata kadokuni wadeka, mono Nyi naha lewayi yidda kako dududa kapiku ulluda ta tangada harona mono dau lina-Nyi. ² Lina-Ge tabarada yidda, "Ngihi pa ulla na buta beyi, tabolo ka ullana hodi hekki. Oro bataudage, karaiyi tabaranai Mori kadauge ngihi pa ulla inna kaha halewa ka ullana kapiku kahhayi ngihi pa ulla-Na." ³ "Kakomla! Nauwa ug halewami tujayi ana bebbe ta jonga ranga bani. ⁴ Ilam ngidi kami kaleku amaha, tasimi, waleka kopa ledu. Mono, ilam hanewe danga hing kani langka iya hingu kayi ta lara. ⁵ Langka gi umma hingu kana miyo dau tamami, takki ullu wela, 'Moli kamaringina ta umma in.' ⁶ Nyi kadana ata nedda baige moli, moli maringimu enga engage nedda. Ta nyiduwe, nyi waleka, moli maringi mu inna enga haggage tabaramu. ⁷ Daumi ta umma inna. Yami mono enumi agayi paha inyakada tutumi, oro wu ata ka ullana na kole da hona uppage. Ilam dikki ma mai kami bamu nahiyi umma. ⁸ Nahiwe mi bamu tamami ta wuha harona mono ata neda bali hibami, yadila hayayo paha inyakada ta aromu. ⁹ Hatagahayi ata kalawara ka dau neda bali, mono takki dage tabarada yidda, 'Kalingora nai Allah na dahhe kabewe tabaramu.' ¹⁰ Ta nyiduwe, nyi miyo bamu tamami ta dihha wu deha mono ata neda bali aida hibami, kakomi ta lara harona inna mono limmage, ¹¹ 'Lohho kabka wali ta haronamu kadakta ta leduma nami ma kaba hayi yta aromi. Ta nyiduwe, apewe inna: Kalingora nai Allah na dahhe bewe.' ¹² Nauwa luguge tabarami: ta laddo inna, hataguge Sodom enga na lewara dahowe wali hataguge harona inna." Ha Ape Tubada Ka Tulla Rani Yesus ¹³ "Mayillawela yau, Khorazim! Mayillawela yau, Betsaida! Ba nyi rayi dahegu mujizat kaha tujja ta Tirus mono Sidon, nyiwe yidda enga da jarra be bada ngodo mono waina hingi kalallu monp kabka. ¹⁴ Ta nyiduwe, ta raho hokuge, taguge Tirus mono Sidon rehi na lewara howe wali ha tagumi. ¹⁵ Mono Yau, Kapernaum, appa yau enga keke tawu ta Surga? Walekma yau enga baitagu ta panu tana ata kamate! ¹⁶ Iya hingu kayi karangewu, range naga Nauwa. Ta nyiduwe, iya katulara gimi, nyi dummo tularaga Nauwa. Mono, iyayi ka tularaga Nauwa, nyi tularani Nyi kaha lewawa Nauwa." Kabalka Da Ka Ngak Ka Tabarada Ka Dokuni Yesus ¹⁷ Bege ka pitu kabuluna kadokuni radda hagga waina lagahara hagapege ba lidda, "Mori, kabalka dummo kangak ka gama nami lari ta ngara-Mu." ¹⁸ Yesus linage tabarada yidda, "Nauwa ug etayi pajode monu wali ta langta tujayi kamillaka. ¹⁹ Kam tadawela inna Nauwa ug yibewe kawaha kapiku deke mini nippe mono halatka, dummo kawaha ta tangage kulhana muhhu. WaLe hilu lakma kaha pak hami miyo. ²⁰ Ta nyiduwe, ilam lagaharami oro waddi rada ka ngakka tabarami, tabolo lagaharamila oro ngarami matolhawe ta surga." Yesus Na Sembayangna Tabara Nai Ama ²¹ Ta mahiggo inna, lagahara nagei Yesus lari ta Waddi Katenguna mono linage, "Nauwa wai luguge tabara-Mu Ama, Morige langta mono tana, oro Yau kabunyige hada inna wali ta ata maniwola mono tada. Ta nyiduwe, Yau hatingoge tabarada lakawa bila. O ama, oroge innage nyida howe kama rakka ta aro-Mu. ²² Ama-Gu na yibe gadi tangadi tabra-Gu, mono wale wu hing mana ata katadayi Ana dukka hegei Ama. Mono, wale wu hing mana katadai Ama, dukkai Ana lohho ata ta ata tabarada yidda ha kabu atenai Ana pa dedalage." ²³ Bege, Yesus na peli ta ana hakodo-Na mono naha newe danga mehadi yidda, "Maring kadi mata ka etawe agawe ha etami miyo, ²⁴ oro Nauwa luguge tabaramu: buta nabi mono raja kamaddige etawe hada ha etami batauge, tabolo yidda wale da etak mawe. Mono, bai hinguge rangewe hada inna ha range mi batauge, tabolo yidda wale da rangek mawe." Ata Samaria Kama Radda Atena ²⁵ Bege, wu ata katadayi Ukku Pareha Taurat dede kabani Yesus, linage, "Guru, aga dahona ha rayigu kagu kolege morha ai kadukana?" ²⁶ Balehawe Yesus tabarana, "Agawe kama tolha lari ta Ukku pareha Taurat? Agawe ha bahhamu neda lari?' ²⁷ Ata nadda balehawe, "Manawa rani Mori, Allahmu, waige kalaki atemu, waige urra dewamu, wai dummege kulhamu, mono waige paha ngadamu. Mono, manawa rani olem ata katauna bamu manawarage tau daumu." ²⁸ Yesus linage tabarana, "Bale hamu yannage. Rayige inna, nyiwe yau enga morhamu." ²⁹ Ta nyiduwe, ata nadda na kabu atege hatenawe tau dauna, nyiwe nyi linage tabarai Yesus, " Mono, iyayi ole atagu?" ³⁰ Yesus na balehawe inna waige balinage, "Dani wu ata kaburru wali ta Yerusalem kako ta Yerikho, nyi da na monu ta limmada ata karebo karama nadi kalabbena mono paluyi, bege da tanani baika hodi mowe matena. ³¹ Dadani, wu rato kalidani lara naddaKole bana etai ata nadda, nyi kako nage leleni ta hupu lara. ³² Tauda dummo nage harayina ata Lewi, kole ba ammini taha dau inna mono na etayi ata nadda, nyi na leleni waige bana liyo ta hupu lara. ³³ Ta nyiduwe, dani wu ata Samaria katamra palaka taha dau nedda. Mono, kole nyi bana etayi ata nadda nyi na marabbehawe atena tabarana. ³⁴ Nyiwe, ata Samaria nadda na dahekayi, mono na hpi nadi kapotana. Nyi na ora nadi waidi we lengha mono anggur, nyiwe na hai lani ata ta kele daina mono na ngidiyi ta wuha dau dau, nyiwe na tauni morro ata nadda. ³⁵ Damma hege tana, ata Samaria nadda na yiyi amahana duda dinar mono na yinadi ka anguge inna dau dauyo waige balinna, 'Tauni morro ata nadda ka pota. Mono, langka pirra hingu kayi amahana habayara hoyi, nauwa ug tau gadi jeludi bagu haggawa."' ³⁶ Nyiwe, Yesus linage, "Paha ngadamu, iyayi kataudana ata rada kadadi ole atana nadda ata kamono ta limma ata karebo radda?" ³⁷ Balehawe ahli Taurat nada, "Ata kaha tingoge maradda ate tabrana." Nyiwe, linagei Yesus, "Kakowula, mono rayige katauda dana." Maria Monoi Marta ³⁸ Kolei Yesus mono ana hakodo-Na ba talarayi, Yesus tama nage ta dihha wu deha mono wuyo lawai ka ngaranai Marta na hibayi Yesus ta ummana. ³⁹ Marta dani angu winne na ka ngara nai Maria ka ngodo ta bara ledunai Yesus mono rangewe hanua nai Yesus. ⁴⁰ Ta nyiduwe, Marta allu karinga kana ulladi tangadi ha ullana. Marta dummo dahekayi Yesus mono linage, "Mori, walem eta hing mawa nauwa Yau mono angu winnegu um pahaiga rayi ulla mehadi tangadi harayi ulla rada? Halewa gani nyi kana ulla dangaga!" ⁴¹ Ta nyiduwe, Mori na bale hawe, "Marta, Marta, yau um gela gaggage mono ha gibo kage tau daumu ta tangadi radda. ⁴² Dukka wu hewe ka banning na. Maria na pede bewe tubana kahadda dahha, tubana ai hangala na ata wali ta barana."