Jala Mono Ba Hawalina ¹ Bege, Yesus linage tabara ana hakodo-Na, "Watu widda enga dahinguna, tabolo li lokowela ata kaha oro nadda. ² Rehi na dahha dahoge wuyo watu ngodo ba katti nani ta kokona mono nyi ba baitani lari ta bannu ba hilu nyi dalli watu widda tubada lakawa marraha nadde. ³ Hamataragela! Nyi angu wumu bana rayi kana jala ta baramu, ha ape kini nyi; nyi nyi bana tana duge jalana, ha wali kini nyi. ⁴ Lohho, nyi nyi bana jalaka tabarami hapitu wuddana inna dihha laddo, mono hagga tabaramu pittu wudda hagapege ba linna, ' Nauwa ug paddage,' ha wali kini nyi." Biktage Hatena ⁵ Lidage lede lina radda tabaranai Mori, "Tabak mage hatenama nami!" ⁶ Balehawei Mori tabarada yidda, "Nyi miyo ba dakage hatenami langka wu wiha watti kawe, miyo dadiwe ba limmige tabara pu yayu murbei nadde,' Ma batuwu wali ta tana mono ma tehka dawu ta bannu,' mono pu yayu nadda emga ha dokuna ta baramu." Ata Paha Lewa Dokuge Parehana Morina ⁷ "Iya duyi wali ta jongami kadayo ata paha lewana, katamrana karekata waleka jawa ranga, enga ka linna ta ata paha lewana nadda kole nyi bana hagga wali ta omana, ' Mai, ngodowu ge mono kamu yayo? ⁸ Nyi wale linna dage bana hanewe tabara ata paha lewana nadda, ' Ha inyakaga hayagu mono tau kalabbe kadahhaki bamu hanukkuwa ba tamragu nauwa yayo mono enu. Beyo inna, ubbum yawu mono enuwu? ⁹ Appa nyi enga wai kiwu linakge tabara ata paha lewana nadda oro bana dokuge paha rehana? ¹⁰ Tauda dummo nage miyo. Nyi miyo bamu rayi bege tangage paha rehagu tabaramu, miyo geha limmimi, 'Nami ata paha lewama ai kamangu hina. Nami dukka rayige agawer dahhowe ha rayima."' Kabullu Ata Katobi Paha Tagaha ¹¹ Nutu ta lara Nyi bana aro ta Yerusalem, Yesus na liyo nama tayi dau dukage Samaria mono Galilea. ¹² Bana tama ta dihha wu deha, Nyi na dikki di kabulu ata katobi ka dede dikka rau tabara-Na, ¹³ mono yidda da kawula waige lida kadahhaki, "Yesus, Guru, manawara ki gama nami!" ¹⁴ Kolei Yesus etayi yidda, Nyi linage tabarada yidda, "Kakomge mono hatingoge taumu tabrada rato-rato." Mono, kole yidda ta tillu larayi, yidda da tagaha. ¹⁵ Kole wuyo ata wali ta jongada yidda etawe tauna bana tagaha bewe, nyi na hagga mono daikayi Allah waige lina kadahhaki, ¹⁶ lohho naka wojo ta koko ledunai Yesus mono wai linage tabara-Na. Ata nadda wuyi ata Samaria. ¹⁷ Bege, Yesus linage tabarana ata nadda, "Walle kabullu kadumi ata katagahabe? Gikadudi kabani dihha ata wadeka? ¹⁸ Wale lakma ta jongada yidda ka hagga manadai Allah likkena wali ta ata li palaka mnadde? ¹⁹ Nyiwe, Yesus linage tabarana, "Kaddewu mono kakowula, hatenamu na pahoila bewu." Ammige Kalingora Parehanai Allah ²⁰ Kole ba kanukkayi kapirana ata Farisi tutu pirrage Kalingora nai Allah ba ammige, Yesus balehayi yidda waige ba linna, "Kalingora nai Allah enga amige wale lakma tadka pa eta, ²¹ lakma ata kalinna, 'Etawe, Kalingora nai Allah dage inne!" waleka ' Kalingora nai Allah dage neda bali!' oro katau takka na Kalingora nai Allah dage ta jongami." ²² Bege, Yesus linage tabara ana hakodo-Na, "Enga dikkege rahige mi kabu ate hingge wu laddo wali ta tangadi laddo Anana kadadi Ata, tabolo mi walem etak mayi. ²³ Ata enga lidage tabarami, "Etayi, neda bali!' waleka ' etayi inneyi!' Ta nyiduwe, mi ilam kakomi mono dokudi ata rada." Maina Anana Kadadi Ata ²⁴ "Oro katujjana kamillaka ka lolloka wali ta huppu langta wu kahha ta huppu langta wadeka, tauda dagela Anana Kadadi Ata ta laddo-Na. ²⁵ Ta nyiduwe, Anana Kadadi ata na pada ullu hoge ka butala kamayilla mono da tularani dalara ata radde. ²⁶ Mono, katau dana kadadibe ta laddo ta morhanai Nuh, tauda dummoge nimmi ta laddo Anana Kadadi ata. ²⁷ Ata yayo mono enu, ha ummana mono baha ummayi kahha ta laddo nai Nuh tama lari ta tena mono ammini lai weyo kalla lohho ha mateyi tangada yidda. ²⁸ Merage hadage ka dadi ta morhanai Lot, inna na ata da yayo, enu,hiyo, malajana, taddona, mono hakaddewe. ²⁹ Tabolo, ta laddo kolei Lot ija kage Sodom, latti mono karabka kadadi latti monuyi wali ta langta tujai urra mono hamateyi yidda tangada. ³⁰ Tauda dagela hadage ta laddo kole Anana Kadadi ata bana dedowe. ³¹ Ta laddo inna, iya hingu kayi katamra innana ta toko ummana, mono ngawuna dadi lari ta ummana, nyi ilna burruka bana ngalayi; mono iya hingu kayi katamra ta omayi,nyi ilna hagaka. ³² Apewela agawe kadadi ta ole ummanai Lot! ³³ Iya hinguka karunnige karawawe ngahuna, enga bungage ngahuna. Mono iya hinguka kabunga ngahuna, enga pa manemarayi. ³⁴ Nauwa luguge tabaramu, gaddi inna enga dadi duda ata ka dura ta wuyo hadau dura. Ta nyiduwe, nada wu ata enga ngidyi, ta nyiduwe wadeka enga tanadi. ³⁵ Duda lawai enga bai dabada gandum. Nada wu ata enga ngidiyi, tabolo wadeka enga tanadi. ³⁶ [Tauda dummoge duda ka ullana ta oma, nada wuyo ata enga ngidiyi, tabolo wadeka enga tanani."] ³⁷ Nyiwe ana hakodona kanukkawe tabrai Yesus, "Gini, Mori?" Balehawei Yesus tabrada yidda, "Ba gi dau dage karogo, neda dummoyi wikta enga makahhada."