Yesus Naha Newe Dangani Lawai Samaria ¹ Kole Mori tadawe ata Farisi bada range bewe inna Nyi nakolena mono naha riha rehi buta ana hakodona wali tai Yohanes, ² (loko Yesus dau aina hari hakna, tabolo ana ha kodoNa), ³ Nyi na ija kage Yudea mono hagga wali ta Galilea. ⁴ Tabolo, Nyi nalida daho kalingora Samaria. ⁵ Dik nage Yesus ta Samaria, ta wu harona ka ngarana Sikhar, ka nedana dahekawe tanah ulu hoge ha yiyo tai Yakub tabara anana, Yusuf. ⁶ Mata we hakojana Yakub dage neda bali. Bege, Yesus kajoli oro kakona, ngodo tahupu mata we hakoja inna. Nedda na, batau kage katutu jam anniyi. ⁷ Ammini wu lawai Samaria kauha weyo. Yesus linage tabarana, "Yikiga we nauwage." ⁸ (Oro, ana ha kodoNa atbedi ta harona lo hiyo ha yayo. ) ⁹ Lawai Samaria nada linage tabarai Yesus, "Aga linak kawe Yau, ata Yahudi, bamu karai we haenu tabaragu inna nauwa lawai Samaria?" (Oro, ata Yahudi wale hanewe dangak madi ata Samaria). ¹⁰ Yesus na balehawe mono linage tabarana, "Nyi yau tadawe tutu kanyurui Allah mono tadayi iyayi kaha newe tabaramu, 'Yiga nauwa we ha enu, ' yau enga karaimu tabaraNa, mono Nyi enga na yigu we morha." ¹¹ Lawai nada linage tabaraNa, "Marabba, Yau wale lakma koba kauhamu mono we hakoja inna kidiwe, gi dau walige Yaubamum kolena weyo morha inna? ¹² Inna Yau rehi madakka howu wali ta weda waikama nami, Yakub, ka yiwe weha koja inne tabrama nami mono kaenu dau bege wali ta weha koja inne lopo tangada anana mono ranga na?" ¹³ Yesus na balehawe mono linage tabarana, "Tangana ata kaenu wali ta weyo inne enga mari wal hona, ¹⁴ tabolo ata kaenu wali taweyo ha yiGu tabarana walna hilu marikma lage; loho weyo ha yiGuni tabarana inna enga dadi mata weyowe ta tauna kahudda hakitana kaha ta morha aika dukkana." ¹⁵ Lawai nada linage tabarai Yesus, "Mori, yikiga nauwa weyo inna dajalage nauwa ilag hil mariwa lage mono nauwa ilag hilu maiwa taha dau inne kauha weyo." ¹⁶ Yesus linage tabrana, "Kakowu, kamaikani laimu mono haggawu inne." ¹⁷ Lawai nada na balehawe, "Nauwa lakma laigu. Linage Yesus tabarana, "Yau tenawe bamu takkiwe, 'Nauwa lakma laigu'. ¹⁸ Oro yau dabedi laimu kalimmana, mono kabani kaengana olegu batauge wale lai mamuni. Ta hada inna, yau hanewemu na tenawe." ¹⁹ Linage lawai nada tabaraNa, "Mori, batauge nauwa ug tadawe Yau ba wuwu Nabi. ²⁰ Weda waikama nami daka wojo taletena inne, tabolo kabihu ataMu lida dage dukka Yerusalem he hadauna ata bana kawojo." ²¹ Yesus linage tabarana, "Hatena tabaraGu, ta lawai! Enga dikige rahige wale letek mana inne wale dumo ta Yerusalem ata bana kawojo tai Ama. ²² Mi kawojo ta aiha tadami, tabolo nami kawojo ta gai ha tadama oro mane mara amige wali ta kabihu Yahudi. ²³ Tabolo, enga dikige rahige, haluguna batauge, kawojo katena enga kawojo da ni Ama lar ta wadi mono katena; oroi Ama naka karuhuwe kataudana inna tutu kawojoi Nyi. ²⁴ Allah yikna Waddi mono yida kawojoni Nyi da kawojo da hoNi lar ta wadi mono katenguna." ²⁵ Lawai nada linage tabaraNa, "Nauwa tadawe inna nadai Mesias enga ammini ( Nyi ha ngaradai Kristus). Kole Nyi ba ammini, Nyi enga ug takkiwe tangage tabarami." ²⁶ Bale hawe Yesus tabarana, "Nauwa, ka tamrana hanewe tabramu yikna Nyi." ²⁷ Mahigo inna, amidi ana hakodoNa mono yida hangatara etayi Yesus tamrana hanewe dangani wu lawai. Tabolo, wale wuk ma ata kanukayi tabaraNa, "Agayi hama yegamu?" waleka "Aha yau mamu hanewe dangani nyi ?" ²⁸ Bege, lawai nada na ijakadi yarro wena mono kako ta harona loho linage tabarada ata neda bali, ²⁹ "Mai, etayige dani wu ata katak gage tabaragu tangage harayi begu. Wale nyikaknai Mesias ge?" ³⁰ Yida da kako tabali harona mono tabokayi Yesus. ³¹ Tamra hege inna, ana hakodoNa da karuhuyi Yesus lidage, "Rabi, yakiwuge." ³² Tabolo, Yesus linage tanrada yida, "Nauwa dadi hayagu aiha tadami." ³³ Nyiwe, ana hakodona da kanukka wikida, "Wale dakakna ata kangidin tabaraNa tutu hayayo?" ³⁴ Yesus linage, "hayaGu wale agak mana dokuge hakabu atena Nyi kaha lewawa Nauwa mono benage haulaNa. ³⁵ Mi wale lim kagge, ' pata wulla moge dikige rahi mangatti? Etawela, Nauwa luguge tabramu, bugeradi matamu mono torroyi oma dai ka rara be mono mangatti. ³⁶ Inna batau gege, nyi kamangatti ka hibabe kahewana mono ka kahayi wuge tutu morha aika dukka na dajalage kama ngatti mono ka habarana dadiwe lagahara kaha. ³⁷ Ta hada inne hanewe inna tenawe, ' nada wu ata nahabarana mono wadeka da mangatti. ' ³⁸ Nauwa ug halewami tutu mangatti aiha ulami; ata wadeka ha ula bena mono mi um tama bemi lar taha ulada yidda." ³⁹ Buta ata Samaria wali taharona inna kadadi hatena tabarai Yesus oro hanewena nada lawai, ka yiyo hadelaka, "Nyi na takgage nauwa tangadi hada ha rayibegu." ⁴⁰ Nyidawe, kole ata Samaria nada diki tabrai Yesus, yida da raiyiYi tutu enga danagadi yida mono Yesus engana neda bali kaduda ladona. ⁴¹ Mono, na rehi butai ata wali kaha tena oro hatak nai Yesus dau. ⁴² Yidda lidage tabara lawai nada, "Wale oro hatakik mamuge nami bama hatena, tabolo oro nami wik dau range bewe, mono tadawe ba Nyi katena hadda mane mara panu tana." Ana Hagawe Istana Katagaha ⁴³ Kole duda ladoge, Yesus tanage hadau neda mono na aro ta Galilea. ⁴⁴ (Ai tada hoge, Yesus dau na Yibewe padelakaNa nada wu Nabi wale hikmayi taha dauna dauna. ) ⁴⁵ Kole Yesus diki ta Galilea, ata Galilea da hibaYi oro yida da etabewe tangage ha ulanai Yesus ta lado Paskah ta Yerusalem oro yida kako dumo raya rameni. ⁴⁶ Oro batudage, Yesus am walini ta Kana, Galilea, tah dau Nyi bana rayige we dadi Anggur. Ta Kapernaum dani wu hagawe Istana ana kabanina tamrana kalawara. ⁴⁷ Kole Hagawe Istana nada rangeyi Yesus am beni wali ta Yudea ta Galilea, nyi na kako tabokayi mono rainoge tabranai Yesus dajalage ka ammini mono kana tagaha nani anana ka hodi mona mate. ⁴⁸ Loho, Yesus linage tabrana, "Aim etami tada mono kama hada ha bangara danga, mi walem hatenak mami, " ⁴⁹ Hagawe Istana nada linage, 'Mori, Maikiwuge toma anagu aina mateho." ⁵⁰ Yesus linage tabrana, "Haggawu ge, ananmu morha!" Ata nada hatenawe agawe hataknai Yesus tabrana mono kako nage ata nada. ⁵¹ Kole hagawe Istana nada bata lara hoyi, ana paha lewana da tabo kayi mono da taknage nada ana kabanina morhabe. ⁵² Hagawe Istana nada naka nukawe tabarada yida ba jam pirayi nada anana bana tagaha. Mono, yida balehawe, "Mono, yida da bale hawe, "Mana na baka katutu kawe jam pituyi kalawarana bungawe." ⁵³ Amana nada lakawa tadawe, ta jam neda nage Yesus ba lina tabarana, "Anamu morha." Yiwe, hagawe Istana nada mono tangadi ole ta umana dadi hatena tabarai Yesus. ⁵⁴ Inna nyi tada ha bangara danga kadudana ha rayinai Yesus kole bana hagga wali ta Yudea lopo ta Galilea.